އެންމެ ދެކެން ބޭނުންވަނީ، ރާއްޖޭގެ ކޮންމެ އަތޮޅެއްގައި ވެސް މަދުވެގެން 7،000 ނުވަތަ 8،000 ވަރަކަށް ޓޫރިސްޓު ބެޑު ތަރައްގީވެ، ގިނައިން ފަތުރުވެރިން އަންނަ ދުވަސް ކަމަށާއި، ސަރުކާރުން އިޚްލާސްތެރި މަސައްކަތެއް ކޮށްފިނަމަ، ކުރިޔަށް އޮތް 10ވަރަކަށް އަހަރުގެ ތެރޭގައި އެކަން ހާސިލްވާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް މިރޭ ވިދާޅުވެއްޖެއެވެ.
ދައުލަތުގެ މީޑިއާ ޕީއެސްއެމްގައި، ޓޫރިޒަމް ކުރިއެރުވުމަށް ކުރެވޭ މަސައްކަތްތަކާ ގުޅޭ ގޮތުން ވާހަކަ ދައްކަވަމުން ފައިސަލް ވިދާޅުވީ ރާއްޖޭގައި ޓޫރިޒަމް ނެތް ހިސާބުތަކަށް އެ ސިނާއަތް ތައާރަފު ކުރުމަށް މަސައްކަތްތަކެއް ކުރައްވަމުން ގެންދަވާ ކަމަށެވެ.
"އަޅުގަނޑު ދެކެން ބޭނުންވާ ދިވެހިރާއްޖެއަކީ، ކޮންމެ އަތޮޅެއްގައި މަދުވެގެން 7،000، ނުވަތަ 8،000 އެނދު އުފެދި، އެ ތަންތަނުގައި އިންޓަނޭޝަނަލް އެއާޕޯޓު އެޅި، ޑައިރެކްޓު ފްލައިޓުތައް ވަރުގަދަ މާކެޓުތަކުން ގެނެވި.. ޗާޓާޑް ފްލައިޓްސް ގެނެވުން.... އެއީ މިއަދު އަޅުގަނޑުމެން އިޚްލާސްތެރި ކަމާއެކު ހެޔޮ ނިޔަތުގައި [މަސައްކަތް] ކޮށްފި ކަމަށް ވަންޏާ 10-15 އަހާރާ ދޭތެރޭ ހާސިލް ކުރެވޭނެ ކަމެއް," ފައިސަލް ވިދާޅުވިއެވެ.
ފައިސަލް ވިދާޅުވި ގޮތުގައި ޓޫރިޒަމް އިންޑަސްޓްރީ ސިންދަފާތުކޮށް، ކުރިއެރުވުމުގެ ގޮތުން މެޑިކަލް، އެޑިއުކޭޝަނަލް އަދި ސްޕޯޓްސް ޓޫރިޒަމް ރާއްޖެއަށް ތައާރަފު ކުރުމަކީ ރައީސް ޑރ. މުހައްމަދު މުއިއްޒު ވަރަށް ބޮޑު އިސްކަމެއް ދެއްވާ ކަމެކެވެ.
ފައިސަލް ވިދާޅުވާ ގޮތުގައި ދުނިޔޭގެ އެކި ސަރަހައްދުތަކުން މުއްސަނދިންނާއި އެ ނޫން ވެސް ފަރާތްތަކުން ރާއްޖެ އަންނަނީ މި ތަނުން ލިބޭ ޚިދުމަތް ވެސް ކަމުދާތީއެވެ. ރާއްޖެއަކީ ޓޫރިޒަމް ދާއިރާއަށް މީހުން ތަމްރީނު ކުރުމުގެ ގާބިލްކަން ހުރި ގައުމެއް ކަމަށް އޭނާ ގަބޫލު ކުރައްވައެވެ.
އެ ގޮތުން ރާއްޖޭގައި ޓޫރިޒަމް ދާއިރާގެ ޓްރެއިނިން ސްކޫލެއް އަޅައި، އެ ތަނުން ދިވެހީންގެ އިތުރުން، ބޭރު ގައުމުތަކުން އަންނަ ފަރާތްތަކަށް ވެސް އެ ދާއިރާއިން އުނގެނުމުގެ ފުރުސަތު ފަހިވުމަކީ ރައީސް މުއިއްޒު ވަރަށް އިސްކަން ދެއްވާ ކަމެއް ކަމަށް ފައިސަލް ވިދާޅުވިއެވެ.
ރާއްޖޭގައި ފަސްތަރީގެ ރިސޯޓެއް ތަރައްގީކޮށް ހޮޓެލް ސްކޫލެއް ގާއިމްކުރުމަށް ޓޫރިޒަމް މިނިސްޓްރީން ވަނީ މިދިޔަ އަހަރުގެ ނޮވެންބަރު ނުވަވަނަ ދުވަހު ގައުމީ ޔުނިވާސިޓީއާ ހަވާލުކޮށްފައިވެއެވެ. ޓްރެއިނިން ރިސޯޓު ގާއިމްކުރަނީ ލ. މާމެންދޫ ކައިރީގައި އޮންނަ ހުޅިމެންދޫގައެވެ.
ހުސްވި 2024ވަނަ އަހަރު ނިންމައިލީ ސަރުކާރުން ކަނޑައެޅި ދެ މިލިއަން ފަތުރުވެރިންގެ އަމާޒު ހާސިލްކޮށްގެންނެވެ.