މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ހަވާލުވި ނަމަވެސް މިހާތަނަށް އަމަލީ މަސައްކަތް ނުފަށާ މަޝްރޫއުތައް، ނުފަށައި ބޭއްވުމަށް އިންފްރާސްޓްރަކްޗާ މިނިސްޓްރީން އެ ކުންފުންޏަށް އަންގައިފިއެވެ.
އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ އެމްޓީސީސީއާ ހަވާލުކޮށްފައިވާ މަޝްރޫއުތަކުގެ ތެރެއިން އަމަލީ މަސައްކަތް ފެށިފައިވާ އެއްވެސް މަޝްރޫއެއް މަޑުޖައްސާލަން ސަރުކާރުން ނިންމާފައި ނުވާ ކަމަށެވެ.
ނަމަވެސް، އެމްޓީސީސީން ސޮއިކޮށް އަމަލީ މަސައްކަތް ނުފެށިވާ މަޝްރޫއުތައް މިވަގުތައް ނުފަށައި އަމަލީ މަސައްކަތް ފަށާފައިވާ މަޝްރޫއުތައް ނިންމުމަށް އިސްކަން ދިނުމަށް ނިންމާފައިވާ ކަމަށް އޭނާ ވިދާޅުވިއެވެ.
މުއްތަލިބު ވިދާޅުވީ އެ ނިންމުމުގެ މައިގަނޑު ސަބަބަކީ އެ މަޝްރޫއުތައް ކުރިއަށް ގެންދަން ބޭނުންވާ މިންވަރަށް މިއަހަރުގެ ބަޖެޓުގައި ފައިސާ ހިމަނާފައި ނެތުމުން ކަމަށެވެ.
މުއްތަލިބު އެ ޕޯސްޓު ކުރެއްވީ، އެމްޓީސީސީން އަމަލީ މަސައްކަތް ފަށައިފައިވާ މަޝްރޫއުތައް ހިމެނޭ ގޮތަށް މަޝްރޫއުތަކެއް މަޑުޖައްސާލަން މިނިސްޓްރީން އަންގައިފައިވާ ކަމަށް ނޫހަކުން ރިޕޯޓުކުރުމާ ގުޅިގެންނެވެ.
ފިނޭންސް މިނިސްޓްރީން މިދިޔަ އަހަރުގެ އޮކްޓޯބަރު މަހު އާންމުކޮށްފައިވާ ތަފާސްހިސާބުން ދައްކާ ގޮތުގައި ގައުމުގައި ހިންގާ ތަރައްގީގެ މަޝްރޫއުތަކުގެ 60 ޕަސެންޓް މަސައްކަތް ހިންގަނީ އެމްޓީސީސީންނެވެ.
ރާއްޖޭގެ ދަރަނި ބޮޑުވެ، އިގުތިސާދީ ހާލަތު ދަށަށް ދިޔުމުން ސަރުކާރުން އަންނަނީ ޚަރަދު ކުޑަކުރަން ފިޔަވަޅުތައް އަޅަމުންނެވެ. އެގޮތުން މުސާރަ އާއި ދަތުރު ޚަރަދު ފަދަ ރިކަރަންޓު ޚަރަދުގެ އިތުރުން، މަޝްރޫއުތަކަށް ކުރާ ޚަރަދުތައް ވެސް ސަރުކާރުން ވަނީ ކުޑަކޮށްފައެވެ.
މަޝްރޫއުތައް މެދުކެނޑުމެއްނެތި ކުރިއަށްގެން ދިއުމަކީ ރައީސް ޑރ މުޙައްމަދު މުޢިއްޒުގެ ވައުދުފުޅެކެވެ.