ރައީސް އިބްރާހީމް މުޙައްމަދު ޞާލިޙްގެ ވެރިކަން ނިމުނުއިރު، އެންސްޕާއިން އެކި ފަރާތްތަކަށް ދައްކަން ޖެހި، ނުދެއްކި ހުރި ފައިސާގެ އަދަދު 871 މިލިއަން ރުފިޔާއަށް އަރާ ކަމަށް، އެ އެޖެންސީއިން މިއަދު ބުނެފިއެވެ.
މާލިއްޔަތު ކޮމިޓީގެ އެންގުމަށް އެންސްޕާއިން ފޮނުވި މައުލޫމާތުގައިވާ ގޮތުން، 871 މިލިއަން ރުފިޔާއަކީ މިދިޔަ ސަރުކާރު ނިމުނުއިރު އަމިއްލަ ކުންފުނިތަކާއި ދައުލަތުގެ އިދާރާތަކަށް ނުދައްކާ ހުރި ފައިސާއެވެ.
މި އަހަރުގެ ބަޖެޓުގައި އެންސްޕާ މެދުވެރިކޮށް އެހީ ފޯރުކޮށްދިނުމަށް ހަތަރު ބިލިއަން ރުފިޔާ ކަނޑައަޅާފައިވާއިރު، އެ ފައިސާގެ ތެރޭގައި އެކަނިވެރި މައިންނާއި ސިއްހީ ތަފާތު ބޭނުންތަކަށް ދޭ އެހީތައް ހިމެނެއެވެ.
އޭގެއިތުރުން، މިއަދުގެ ކޮމިޓީ ބައްދަލުވުމުގައި އާސަންދައާއި އެންސްޕާއިން އޭޑީކޭއަށް ނުދީ ހުރި ބިލުތަކުގެ ތަފްސީލުތައް ހާމަކޮށްފައިވެއެވެ. އެގޮތުން އޭޑީކޭއަށް އެކަނި އާސަންދައާއި އެންސްޕާއިން 144 މިލިއަން ރުފިޔާ ނުދައްކާ އެބައޮތެވެ.
އެންސްޕާއިން މައުލޫމާތު ދިން ނަމަވެސް ކޮމެޓީއިން އެދުނު މައުލޫމާތު އާސަންދައިން ދީފައެއް ނުވެއެވެ. އެކަމާ މެންބަރުން ވަނީ ނުރުހުން ފާޅު ކުރައްވައިފައެވެ. އަދި އެ މައުލޫމާތުތައް ދިނުމަށް އަލުން ވަނީ އާސަންދައަށް އަންގައިފައެވެ.