ރާއްޖޭގެ ތިން ސްކޫލަކަށް ޕާކިސްތާންގެ ހައި ކޮމިޝަނުން އެހީ ފޯރުކޮށްދީފިއެވެ.
ޕާކިސްތާނުގެ ހައި ކޮމިޝަނުން ވަނީ މަދްރަސަތުލް އަމީރު އަޙްމަދު ޕްރީސްކޫލް، ކެންގަރޫ ކިޑްސް އަދި ބިލަބޯންގް ހައި އިންޓަނޭޝަނަލް ސްކޫލަށް އެހީގެ ގޮތުގައި ޓީވީ އަދި ކޮމްޕިއުޓަރުތަކެއް ހަދިޔާ ކޮށްފައެވެ.
މިކަމަށް ހާއްސަކޮށްގެން ބިލަބޯންގް ސްކޫލުގައި ބޭއްވި ރަސްމިއްޔާތުގައި ޕާކިސްތާންގެ ހައި ކޮމިޝަނަރު ވައިސް އެޑްމިރަލް (ރ) މުޙައްމަދު ފައްޔާޒް ގިލާނީ ވިދާޅުވީ މިތަކެތި ހަވާލުކުރެއްވުމަށް ލިބުނު ފުރުސަތާމެދު ވަރަށް އުފާކުރުރައްވާ ކަމަށެވެ.
މި ރަސްމިއްޔާތުގައި ވާހަކަފުޅު ދައްކަވަމުން ހައި ކޮމިޝަނަރު ވަނީ ތަޢުލީމީ ނިޒާމުގައި ސައިންސާއި ޓެކްނޮލޮޖީގެ މުހިންމުކަން ފާހަގަކުރައްވާފައެވެ.
ޕާކިސްތާނު ހައި ކޮމިޝަނުން މަދްރަސަތުލް އަމީރު އަޙްމަދު ޕްރީސްކޫލް، ކަންގަރޫ ކިޑްސް އަދި ބިލަބޯންގް ހައި އިންޓަނޭޝަނަލް ސްކޫލަށް އެހީގެ ގޮތުގައި ޓީވީ އަދި ކޮމްޕިއުޓަރުތަކެއް ހަދިޔާކުރުމުގެ ތެރެއިން--- ފޮޓޯ/ ޕާކިސްތާން ހައި ކޮމިޝަން
"މިހާރުގެ އިޤްތިޞާދުތަކުގައި ކުރިއެރުމުގެ އިންޖީނުތަކަކީ ސައިންސާއި ޓެކްނޮލޮޖީ ކަމަށްވާތީ، އެއީ އަޅުގަނޑުމެންގެ ތައުލީމީ ނިޒާމުގެ މުހިންމު ބައެއް ކަމުގައި ވާންޖެހޭ." ހައި ކޮމިޝަނަރު ވިދާޅުވިއެވެ.
ހައި ކޮމިޝަނަރު ވިދާޅުވީ ޓީވީ އަދި ކޮމްޕިއުޓަރުތަކުގެ ސަބަބުން ސްކޫލުތަކުގައި ޑިޖިޓަލްކޮށް އުނގެނުމުގެ މާހައުލު އިތުރަށް ފުރިހަމަވެގެންދާނެ ކަމަށެވެ.
މި ރަސްމިއްޔާތުގައި އައިލެންޑާސް އެޑިޔުކޭޝަންގެ ޗެއާމަން އަބްދުއްރަޝީދާއި އެގްޒެކެޓިވް ޑައިރެކްޓާ އަދުލީ ރަޝީދު އަދި ސްކޫލުތަކުގެ ޕްރިންސިޕަލުންނާއި މުދައްރިސުންނާއި ދަރިވަރުންނާއި ބެލެނިވެރިންގެ އިތުރުން އެހެނިހެން އިސް ބޭފުޅުން ވަނީ ބައިވެރިވެވަޑައިގެންފައެވެ.
ޕާކިސްތާންގެ ހައި ކޮމިޝަނާގެ އިތުރުން ޑެޕިއުޓީ ހެޑް އޮފް މިޝަން ޒުލްގުރުނައިން އަޙްމަދުވެސް ވަނީ މި ރަސްމިއްޔާތުގައި ބައިވެރިވެވަޑައިގެންފައެވެ.