ރާއްޖެ ޕްރޮމޯޓް ކުރަން ޓޫރިޒަމް މިނިސްޓަރު ފައިސަލް އިންޑިއާއަށް

ރާއްޖެ ޕްރޮމޯޓްކުރުމަށް އިންޑިއާގެ މުމްބާއި އާއި ބެންގަލޫރުގައި ބާއްވާ ރޯޑްޝޯތަކުގައި ބައިވެރިވެވަޑައިގަތުމަށް ޓޫރިޒަމް މިނިސްޓަރު އިބްރާހިމް ފައިސަލް މިއަދު އެގައުމަށް ފުރާވަޑައިގެންފިއެވެ.

ޓޫރިޒަމް މިނިސްޓްރީން ބުނީ، މި ރޯޑްޝޯގެ މަގުސަދަކީ އިންޑިއާގައި ރާއްޖޭގެ ފަތުރުވެރިކަން ޕްރޮމޯޓްކުރުމާއި އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު އިތުރުކުރުން ކަމަށެވެ.

މިއީ، މާދަމާއިން ފެށިގެން އަންނަ ހޮނިހިރު ދުވަހުގެ ނިޔަލަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)އާއި މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ) އަދި ނޭޝަނަލް ހޮޓެލް އެންޑް ގެސްޓްހައުސް އެސޯސިއޭޝަން (އެންއެޗްޖީއޭއެމް) ގުޅިގެން ބާއްވާ ރޯޑްޝޯއެކެވެ.

އެމްއެމްޕީއާރުސީއާއި މަޓާޓޯއާއި އެންއެޗްޖީއޭއެމްގެ އިތުރުން ޓޫރިޒަމް ދާއިރާގައި ހަރަކާތްތެރިވާ ގިނަ ފަރަތާތްތަކެއް މި ރޯޑްޝޯގައި ބައިވެރިވާނެ ކަމަށް އެ މިނިސްޓްރީން ބުނެފައިވެއެވެ.

އެ ރޯޑްޝޯގައި ބައިވެރިވާ ފަރާތްތަކަަށް ރާއްޖޭގެ މެހެމާންދާރީ ތަޖުރިބާ ކުރުމުގެ ފުރުސަތު ލިބޭއިރު، ކޮންމެ ރޯޑްޝޯއެއްގައި ރެފްލް ގިވްއަވޭއެއް ބޭއްވުމަށް ވަނީ ނިންމާފައިވާ ކަމަށް އެމްއެމްޕީއާރުސީން ބުނެފައިވެއެވެ. އަދި، ނަސީބުވެރި ފަރާތްތަކަށް ރާއްޖޭގައި ޗުއްޓީ ހޭދަކޮށްލުމުގެ ފުރުސަތު ވެސް މި ރޯޑްޝޯއިން ފަހިވާނެ ކަމަށް އެ ކޯޕަރޭޝަނުން ބުނެފައިވެއެވެ.

އިންޑިއާއަކީ ރާއްޖެއަށް ހަ ވަނައަށް އެންމެ ގިނައިން ފަތުރުވެރިން ޒިޔާރަތްކުރާ ގައުމަކަށްވާއިރު، އިއްޔެގެ ނިޔަލަށް އެ ގައުމުން ވަނީ 71،012 ފަތުރުވެރިން ޒިޔާރަތްކޮށްފައެވެ.

މީގެ ކުރީ އަހަރުތަކުގައި ރާއްޖޭގެ އެންމެ ބޮޑު މާކެޓުގެ ގޮތުގައި އިންޑިއާ އޮތުމަށް ފަހު، އެގައުމު ލިސްޓުގެ ތިރިއަށް ޖެހުނީ މިއަހަރުގެ ކުރީކޮޅެވެ. އެއީ މި ސަރުކާރުގެ ތިން ނައިބު ވަޒީރުން އިންޑިއާގެ ބޮޑުވަޒީރު ނަރެންދުރަ މޯދީ އާއި އެގައުމުގެ ރައްޔިތުންނަށް ކުޑައިމީސްކޮށް ސޯޝަލް މީޑިއާގައި ޕޯސްޓުތަކެއް ކުރި ފަހުންނެވެ.

އެ މައްސަލައިގައި އިންޑިއާގެ މަޝްހޫރު ފަންނާނުން ހިމެނޭ ގޮތަށް، ރާއްޖެ ބޮއިކޮޓް ކުރުމަށް ގޮވާލައި ބޮޑު ކެމްޕެއިނެއް ކުރިއަށްގެންދިޔައެވެ. ނަމަވެސް އެ މައްސަލަ ހައްލުވެ، ދެ ގައުމުގެ ގުޅުން ރަނގަޅުވެފައިވާ ކަމަށް ސަރުކާރުން ބުނެއެވެ.

އޭގެ ފަހުން ސަރުކާރުން އަންނަނީ އިންޑިއާގައި ރާއްޖޭގެ ފަތުރުވެރިކަން އިޝްތިހާރު ކުރުމަށް ގިނަ މަސައްކަތްތަކެއް ކުރަމުންނެވެ.