އުތުރު ކޮރެއާގެ ހެކަރުން އެޕަލް މެކް ޑިވައިސްތަކަށް އަމާޒުކޮށް އައު މެލްވެއާއެއް ފަތުރަން ފަށައިފިކަމަށް ސައިބާ ސެކިއުރިޓީ ދާއިރާގެ ފަރާތްތަކުން މަޢުލޫމާތު ދީފިއެވެ.
މި މެލްވެއާ ފަތުރަނީ އޮޅުވާލައިގެން ވަޒީފާގެ އިންޓަވިއުތަކެއް ކުރިއަށް ގެންދާ ކަމަށް ދައްކައިގެންނެވެ.
މި އައު މެލްވެއާއަކީ "ބީވާޓެއިލް އިންފޮސްޓީލާ މެލްވެއާ"ގެ އައު ވެރިއަންޓެއްކަން ފާހަގަކުރެވިފައިވެއެވެ.
މި މެލްވެއާ މެދުވެރިކޮށް ވެބް ބްރައުޒަރތަކުން މަޢުލޫމާތު ހޯދުމާއި، ކްރިޕްޓޯކަރަންސީ، ލޮގިން ކްރެޑެންޝަލްސް އަދި އައިކްލައުޑް ކީޗެއިންގެ މަޢުލޫމާތު ވަގަށް ނެގުމުގެ ގާބިލުކަން ހެކަރުންނަށް ލިބިފައިވެއެވެ. އަދި މީގެ އިތުރުން އިންވިޒިބަލްފެރެޓް ބެކްޑޯ ޑިޕްލޯއި ވެސް ކުރެވޭނެކަމަށް ރިޕޯޓްތަކުން ހާމަވެއެވެ.
މި މެލްވެއާ ފައިލް ވަނީ "މައިރޯޓޯކް.ޑީއެމްޖީ" ގެ ނަމުގައި ފޮރުވާފައެވެ. މިއީ އާދައިގެ ވީޑިއޯ ކޯލް ސަރވިސްއަކާ އެއްގޮތަށް ފަރުމާކޮށްފައިވާ ފައިލެކެވެ.
މި ގޮތަށް ކޮށްފައިވާ ފަރުމާކުރުމަކީ މީގެ ކުރީގައި ވެސް ލަޒަރަސް ހެކިން ގްރޫޕުން ކާމިޔާބުކަމާއެކު ބޭނުންކޮށްފައިވާ ގޮތެކެވެ.
މި ހަމަލާތަކުން ރައްކާތެރިވުމަށްޓަކައި ވަޒީފާގެ ފުރުސަތުތަކާ ގުޅޭ ގޮތުން ލިބޭ މެސެޖުތަކާމެދު ސަމާލުވުމަށާއި، ކުންފުނިތަކާއި ރެކްރޫޓަރުންގެ މަޢުލޫމާތު ރަނގަޅަށް ބެލުމަށް އާންމުންނަށް އިރުޝާދު ދެވިފައިވެއެވެ.
މި ކެމްޕެއިނަކީ އެޕަލް ބޭނުންކުރާ ފަރާތްތަކަށް ޚާއްސަކޮށްގެން ކުރިއަށް ގެންދާ ކެމްޕެއިނެއްކަން ފާހަގަކުރެވެއެވެ.