ވޮޝިންޓަން (7 ޖުލައި 2024): އެމެރިކާގެ ރައީސް ޖޯ ބައިޑެންއަށް ކުރިމަތިވެފައިވާ ސިކުނޑީގެ މައްސަލަތަކުގެ ސަބަބުން އޭނާގެ ކެންޕޭނަށް ފަންޑުކުރަން ބައެއް ފަރާތްތަކުން ދެކޮޅުހަދަމުން ގެންދާކަމަށް ޚަބަރު ލިބިއްޖެއެވެ.
އެމެރިކާގައި ޝާއިއުކޮށްފައިވާ ބައެއް މީޑިއާ ރިޕޯޓްތަކާއި އޭބީސީ ނިއުސް ބުނާގޮތުން ބައިޑެންގެ ބުއްދީގެ ސިއްހަތު ބަލިކަށިކަމުން އޭނާއަށް ރިޔާސީ އިންތިޚާބު ކާމިޔާބު ނުކުރެވޭނެކަމަށް ބައިޑެންގެ ކޭންޕޭނަށް ފަންޑުކުރާ ކުންފުނިތަކާއި މަހުޖަނުންގެ ގިނަ ބަޔަކުވެސް މިހާރު ގަބޫލުކުރެއެވެ. އެހެންކަމުން އެފަރާތްތައް މިހާރުތިބީ ވަރަށް ބޮޑު ކަންބޮޑުވުމެއްގެ ތެރޭގައެވެ.
ބައެއް ރިޕޯޓްތައް ބުނާގޮތުން ބައިޑެންއަށް ފަންޑުކުރާ ބައެއް ފަރާތްތަކުން މިހާރުވަނީ ފަންޑްކުރުމުގެ ކަންތައް ކުރިޔަށް ނުގެންދިޔުމަށް ނިންމާފައެވެ. ނަމަވެސް ޑިމޮކްރެޓިކް ޕާޓީގެ ފަރާތުން މިކަން ކަށަވަރު ކޮށެއް ނުދެއެވެ. އެހެންކަމުން އެފަރާތްތައް މިހާރު ތިބީ ބައިޑެންއަށް ބޭނުންވާ ކޭންޕޭން ޚަރަދުތައް ކުރުމުގައި ކުރިޔަށްދާނީތޯ ނުވަތަ އެހެން ކެންޑިޑޭޓަކު ނެރުމަށް ބާރުއަޅާނީތޯ މިކަމާމެދު ގޮތެއް ނިންމުމުގެ މަގުމަތީގައެވެ.
ބައިޑެންގެ ބުއްދީގެ ސިއްހަތު މިހާރުވަނީ އޭނާގެ ޑިމޮކްރެޓިކް ޕާޓީއަށާއި އެޕާޓީއަށް ތާއީދުކުރާ ފަރާތްތަކަށް ބޮޑު މައްސަލައަކަށް ވެފައެވެ. ނަމަވެސް ބައިޑެން ހުންނެވީ އޭނާގެ ބުއްދީގެ އެއްވެސް މައްސަލައެއް އުޅޭކަން ގަބޫލުކުރާ ގޮތަކަށް ނޫނެވެ.
ބައިޑެންގެ ތަރުޖަމާނު ކެރިން ޖޭން ޕިޔޭރު ވަނީ ބައިޑެންގެ ބުއްދީގެ ސިއްހަތު ރަނގަޅު ކަމަށާއި އޭނާ ރިޔާސީ ރޭހުން ވަކިވެވަޑައި ނުގަންނަވާނެ ކަމަށް ވިދާޅުވެފައެވެ. ނަމަވެސް ބައިޑެންވަނީ މުސްތަގިއްލު ގޮތެއްގައި އޭނާގެ ބުއްދީގެ ސިއްހަތާބެހޭ ޗެކްއަޕް އެއް ހެދުމަށް ދެކޮޅު ހައްދަވާފައެވެ.
ހައުސް އޮފް ރެޕްރެޒެންޓެޓިވްސްގައި ހުންނަވާ ޑިމޮކްރެޓިކް ޕާޓީގެ މައިނޯރިޓީ ޒަޢީމް ހަކީމް ޖެނިފާޒް ވިދާޅުވިގޮތުގައި ބައިޑެންގެ ބަދަލުގައި އެހެން ބޭފުޅަކު ރިޔާސީ ރޭހަށް ނެރުމާބެހޭގޮތުން ޑިމޮކްރެޓިކް ޕާޓީގެ އެންމެ އިސްފަރާތްތަކުގެ މަޝްވަރާ ބައްދަލުވުމެއް އާދީއްތަ ދުވަހު ބާއްވާގޮތަށް ވަނީ ހަމަޖެހިފައެވެ.
ޖެނިފާޒް ވިދާޅުވިގޮތުގައި ޑިމޮކްރެޓިކް ޕާޓީގެ އިސް ފަރާތްތަކުގެ ތެރޭގައިވެސް ބައިޑެން ރިޔާސީ ރޭހަށް ނެރުމަށް ފާޅުގައި ދެކޮޅު ހައްދަވާ ބޭފުޅުން މިހާރު އެބަތިއްބެވިއެވެ. އެބޭފުޅުން ބޭނުންވަނީ ބައިޑެންގެ ބަދަލުގައި އެހެން ކެންޑިޑޭޓަކު އެޕާޓީން ރިޔާސީ އިންތިޚާބަށް ނެރުމަށެވެ.
ޑިމޮކްރެޓިކް ޕާޓީގެ އިސް ބޭފުޅެއްކަމަށްވާ މިނިސޫޓާގެ ފަރާތުން ހައުސްގައި ތަމްސީލުކުރައްވާ މެންބަރު އެންޖީ ކްރޭޖްވަނީ ޒުވާން ޖީލަށް ފުރުސަތު ދެއްވުމަށްޓަކައި ރިޔާސީ ރޭހުން ވަކިވެވަޑައިގަތުމަށް އެދި ބައިޑެންއަށް ސިޓީއެއް ފޮނުއްވާފައެވެ.
ހައުސް އޮފް ރެޕްރެޒެންޓެޓިވްސްގައި ޑިމޮކްރެޓިކް ޕާޓީއަށް ނިސްބަތްވެ ވަޑައިގަންނަވާ އެހެން ހަތަރު ބޭފުޅަކުވެސްވަނީ ޒުވާން ޖީލަށް ފުރުސަތު ދެއްވުމަށްޓަކައި ރިޔާސީ ރޭހުން ވަކިވެވަޑައިގަތުމަށް ދަންނަވައި ބައިޑެންއަށް ސިޓީތަކެއް ފޮނުއްވާފައެވެ.
ޚިޔާލު ހޯދުމުގެ ސާވޭތަކުގެ ނަތީޖާ ދައްކާގޮތުން ބައިޑެންއަށް އޮތް ރައްޔިތުންގެ ތާއީދު ދަނީ އޭނާގެ ވާދަވެރިޔާ ޓްރަމްޕް އާ އަޅައިބަލާއިރު ދުވަހެއް ދުވަހަކަށް ކުޑަވަމުންނެވެ. މިހާރުވެސް ފަސް ޕޮއިންޓުން ބައިޑެން އުޅުއްވަނީ ޓްރަމްޕަށް ވުރެ ފަހަތުގައެވެ.
އަނެއްކޮޅުން ރިޔާސީ ރޭހުން ވަކިވެވަޑައިގަތުމަށް ޑިމޮކްރެޓިކް ޕާޓީގެ ތެރެއިންވެސް ބައިޑެންއަށް ކުރިމަތިވާ ފިއްތުންތައްދަނީ ދުވަހެއް ދުވަހަކަށް ބޮޑުވަމުންނެވެ.
ބައިޑެންއާ ޓްރަމްޕް އާ ދެމެދު ބޭއްވި ރިޔާސީ ބަހުސުގައި ބައިޑެންވަނީ ވަރަށް ނިކަމެތި ގޮތަކަށް ޓްރަމްޕްގެ ކުރިމަތީގައި ބަލިވެފައެވެ. މިބަހުސަށްފަހު ބައިޑެންވަނީ ވަރަށް ބޮޑަށް "ހޫނުފެނަށް" ވެއްޓިފައެވެ. އަދި ރިޔާސީ ރޭހުން ބައިޑެން ވަކިވުމަށް ގޮވާލާ ގޮވާލުންތަކުގެ އަޑުތައްވެސްވަނީ ގަދަވެފައެވެ.
މުހައްލިލުން ވިދާޅުވާގޮތުގައި ބައިޑެންގެ ކެންޕޭނަށް ފަންޑުކުރަން ގިނަ ފަރާތްތަކުން ބައިޑެންގެ ބުއްދީގެ ސިއްހަތު ދަށްކަމަށް ބަލައި އޭނާގެ ކޭންޕޭނަށް ޚަރަދު ކުރަން ދެކޮޅުހަދާނަމަ މިކަން ވަރަށް ބޮޑު މައްސަލައަކަށް ވެގެންދާނެއެވެ. އަދި ފަހަރުގައި ބައިޑެން ރިޔާސީ ރޭހުން ވަކިކޮށް އޭނާގެ ބަދަލުގައި އެހެން ބޭފުޅަކު ޑިމޮކްރެޓިކް ޕާޓީގެ ފަރާތުން ނެރުމަށް އެޕާޓީއަށް އެންމެ ފަހުވަގުތު މަޖުބޫރު ވުމަކީވެސް އެކަށީގެންވާ ކަމެކެވެ.