ޖިނާއީ ހުކުމްތައް ސާބިތުވެ، ހުކުމް ތަންފީޒުކުރަމުން އަންނަ ކުށްވެރިން ވެސް އިސްތިއުނާފު މަރުހަލާގައި ކަފާލާތުގެ ދަށުން މިނިވަންކުރެވޭ ގޮތަށް ޖިނާއީ އިޖުރާއަތުގެ ގާނޫނަށް އިސްލާހެއް ހުށަހަޅައިފިއެވެ.
ކަފާލާތުގެ ދަށުން މިނިވަންކުރުމަކީ ކުށެއްގެ ތުހުމަތުގައި ހައްޔަރުކުރެވި، ތަހުގީގުގެ ނުވަތަ ޝަރީޢަތުގެ މަރުޙަލާއެއްގައި ބަންދުގައި ބެހެއްޓިފައި ހުރި މީހަކު، ބަންދުން މިނިވަންވުމަށްޓަކައި ކޯޓުގައި ވަކި ވަރަކަށް ފައިސާ ބަހައްޓައިގެން ނުވަތަ މީހަކު ޖާމިނުކޮށްގެން މިނިވަންކުރުމެވެ.
ސަރުކާރުގެ ފަރާތުން މަނަދޫ ދާއިރާގެ މެންބަރު ހުޞްނީ މުބާރަކު ހުށަހެޅުއްވި އިސްލާހުގައި ވާގޮތުން، މީހެއްގެ މައްޗަށް އިއްވާފައިވާ ޖަލު ހުކުމެއް އިސްތިއުނާފުކޮށްފި ނަމަ، އިސްތިއުނާފު މަރުހަލާ ނިމެންދެން އޭނާ ބަންދުން ދޫކުރެވިދާނެއެވެ. އެ ގޮތަށް މިނިވަންކުރެވޭނީ:
- އިސްތިއުނާފަކީ އެކަށިގެންވާ އަސާސެއްގެ މައްޗަށް ބިނާވާ މައްސަލައަކަށްވުން
- ކަފާލާތުގެ ޝަރުތުތަކަށް އަމަލުކުރުން
- އިތުރަށް ބަންދުގައި ބަހައްޓައިގެން ހާސިލުވާނެ އާންމު މަސްލަހަތެއް ނެތުން
އަދި، ދަށު ކޯޓުން ކުށް ސާބިތުވާ މީހުންނަށް ވެސް އަދަބު ކަނޑައެޅުމުގެ ކުރިން ކަފާލާތުގެ ދަށުން ދޫކުރެވޭނެ ގޮތަށް ބިލުގައި ވަނީ ހިމަނައިފައެވެ. ނަމަވެސް، އެ ގޮތަސް މީހުން ދޫކުރެވޭނީ އެއީ އިންސާފު ގާއިމުކުރަން މުހިންމު ކަމެއް ކަމަށް ސާބިތުކޮށްދިނުމުން ކަމަށް ވެސް އެ ބިލުގައި ވަނީ ބުނެފައެވެ.
އެކަމަކު، އެ ގޮތަށް ދޫކުރާއިރު، ފުރުން މަނާކުރުމާއި، އަންގާ ގަޑިއަށް ކޯޓަށް ހާޒިރުވުމާއި މައްސަލައިގައި ހިމެނޭ މީހުންނާ މުއާމަލާތްނުކުރުން ފަދަ ޝަރުތުތައް ކުރެވިދާނެ ކަމަށް ބިލުގައި ބުނެފައިވެއެވެ.
ކުށްވެރިއަކު ކަފާލާތުގެ ދަށުން ދޫކޮށްލަން ވާނީ އޭނާ ބަންދުން ދޫކޮށްލަން އޮތް މަސްލަހަތާއި ކުށުގެ ޝިކާރައަކަށްވީ މީހާގެ މަސްލަހަތާއި މުޖުތަމައުގެ އާންމު މަސްލަހަތާ އަޅައިބަލާއިރު، އޭނާ ބަންދުން ދޫކޮށްލައިފި ނަމަ އޭގެ ސަބަބުން ކުށުގެ ޝިކާރައަކަށްވީ މީހާގެ މަސްހަލަތަށް ނުވަތަ މުޖުތަމައުގެ އާންމު މަސްލަހަތަށް އުނިކަމެއް ނާންނާނެ ކަމަށް ބުރަވެވޭ ހާލަތުގައި ކަމަށެވެ.
މީގެ އިތުރުން، ރައްކާކޮށްފައިވާ ކޮމްޕިއުޓަރު ޑޭޓާ އަވަސް ގޮތެއްގައި ޕްރިޒާވްކުރުމާއި ޓްރެފިކް ޑޭޓާ ވަކި މިންވަރަކަށް ހާމަކުރަން އެންގުމާ ގުޅޭ އިޖުރާއަތުތަކެއް ވެސް މި ބިލުގައި ވަނީ ހިމަނައިފައެވެ. އަދި، ރައްކާކޮށްފައިވާ ކޮމްޕިއުޓަރު ޑޭޓާ ބަލައި ފާސްކުރުމާއި އެ ޑޭޓާ ހިފެހެއްޓުމާ ގުޅޭ އިޖުރާއަތުތަކެއް ވެސް ބިލުގައި ވަނީ ހިމަނައިފައެވެ.
މިހާރު ގާނޫނު އޮތް ގޮތުން ކަފާލާތުގެ ދަށުން މިނިވަންކުރެވެނީ ކުށުގެ ތުހުމަތުގައި ހައްޔަރުކުރާ މީހުން އެކަނި ކަމަށް ހައިކޯޓުން މީގެ ކުރިން ބުނެފައިވެއެވެ.