މިދިޔަ އެމްޑީޕީ ސަރުކާރުގައި ފިނޭންސް މިނިސްޓަރުކަން ކުރައްވާފައިވާ އިބްރާހިމް އަމީރު ވަނީ ގައުމަށް 'ޣައްދާރު' ވެފައި ކަމަށާއި އޭނާ ހައްޔަރުކޮށް މައްސަލަ ޝަރީއަތަށް ފޮނުވަން ޖެހޭ ކަމަށް ރައްޔިތުންގެ މަޖިލީހުގެ އޭދަފުށީ ދާއިރާގެ މެމްބަރު އަހުމަދު ސަލީމް (ރެޑްވޭވް ސަލީމް) މިއަދު ވިދާޅުވެއްޖެއެވެ.
ސަލީމަކީ ސަރުކާރުގެ މައި ޕާޓީ ޕީއެންސީގައި އިސްކޮށް ހަރަކާތްތެރިވެވަޑައިގަންނަވާ، މަޖިލީހުގައި 15 އަހަރު ހޭދަކުރެއްވި އެންމެ ދުވަސްވީ އެއް މެންބަރެވެ.
ސަރުކާރުގެ ފަރާތުން ރައްޔިތުންގެ މަޖިލިހަށް ހުށަހަޅާފައިވާ ދައުލަތުގެ ދަރަންޏާ ބެހޭ ބިލަށް ބަހުސް ކުރައްވަމުން މިއަދު ސަލީމް ވިދާޅުވީ އޭނާއަކީ ވޭތުވެދިޔަ ތިން ދައުރުގައި ވެސް މާލިއްޔަތު ކޮމިޓީގައި ހިމެނިވަޑައިގެންނެވި އެއް މެންބަރު ކަމަށެވެ.
އަދި އެ ކޮމިޓީގެ ބައްދަލުވުންތަކަށް އަމީރު ވަޑައިގަންނަވާ ކޮންމެ ފަހަރަކު "ތިވަރަށް ދަރަނި ނުނަންގަވާށޭ" ބުނާ ކަމަށް އޭނާ ވިދާޅުވިއެވެ.
ނަމަވެސް ދަރަނި ބޭނުންވަރަކަށް ނަގާނެކަމަށް އަމީރު ވިދާޅުވި ކަމަށާއި، އެހެންކަމުން އަމީރަކީ ގައުމަށް ޣައްދާރުވެފައިވާ މީހެއްކަމަށް ސަލީމް ވިދާޅުވިއެވެ.
ކޮންމެ ފަހަރަކު އާދޭސްކޮށް އަޅުގަނޑު ދަންނަވަން މިނިސްޓަރޭ އެއްގޮތަކަށް ވެސް ތިހެން ނުހައްދަވާށޭ މިއީ އަޅުގަނޑުމެންގެ ގައުމޭ، ތިވަރަށް ދަރަނި ނުނަންގަވާށޭ. ހަމަ ކޮންމެ ފަހަރަކު ވެސް ވިދާޅުވަނީ، ނޫނެކޭ ތިމަންނަ ބޭނުން ވަރަކަށް ދަރަނި ނަގާނަމޭ. އެހެންވީމަ، ގައުމަށް ޣައްދާރުވި މީހެއްގެ ގޮތުގައި މީނަ [އަމީރު] އެބަ ޖެހޭ ހިފައި ހައްޔަރުކޮށް ޝަރީއަތަށް ފޮނުވަން،އޭދަފުށީ ދާއިރާގެ މެމްބަރު އަހުމަދު ސަލީމް
އަމީރު ހައްޔަރުކޮށް ޝަރީއަތަށް ފޮނުވަން ޖެހޭކަން ފާހަގަކުރައްވައި ސަލީމް ވިދާޅުވީ އެހެން ނޫނީ ދެން އަންނަ ވަޒީރަކު ވެސް އެފަދައިން އަމަލުކޮށްފާނެ ކަމަށެވެ.
ސަލީމް މިފަދައިން ވާހަކަތައް ދައްކަވާފައި މިވަނީ ރާއްޖޭގެ އިގްތިސާދީ ހާލަތު ވަރަށް ބޮޑަށް ގޯސްވެފައިވާ ދަނޑިވަޅެއްގައެވެ.
ސަލީމް ވަނީ މިދިޔަ އެމްޑީޕީ ސަރުކާރުގެ އިގްތިސާދީ ސިޔާސަތުތައް ގޯސްކުރައްވައި ފާޑުވިދާޅުވެފައެވެ. އަދި އެ ސަރުކާރުގައި ފައިސާ ޗާޕުކޮށްފައިވާތީ އެކަމާ ނުރުހުން ފާޅުކުރައްވާފައެވެ.
ކުރީގެ ފިނިސްޓަރު އަމީރު: މި ސަރުކާރުން ދަނީ ހާލަތާ ނުބައްދަލު މިންވަރަކަށް ޚަރަދު ކުރަމުން ކަމަށް މިދިޔަ ބުރާސްފަތި ދުވަހު އޭނާ ވިދާޅުވި -- ސަން ފޮޓޯ/ ނާއިޝް ނާހިދު
ރާއްޖޭގެ އިގުތިސާދީ ހާލަތު ދަށްވަމުންދާ ކަމަށް ބުނެ އެމްޑީޕީން މިދިޔަ ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި އަމީރު ވިދާޅުވީ މި ސަރުކާރުގެ ނާގާބިލުކަމުގެ ސަބަބުން މާލީ ހާލަތު ގޯސްވެފައިވާ ކަމަށާއި އެކަން ފޮރުވުމަށް މި ސަރުކާރުން ހަގީގަތާ ޚިލާފު ވާހަކަ ދައްކަމުން އަންނަ ކަމަށެވެ.
ކޮވިޑް-19 ތެރޭގައި އާމްދަނީ ލިބުން ދަށްވި ނަމަވެސް ކުރީ ސަރުކާރުން ދަރަންޏާއި ބިލްތައް ދައްކަމުން އައި ކަމަށް ވިދާޅުވެ އަމީރު ތުހުމަތުކުރެއްވީ މި ސަރުކާރުން ހާލަތާ ނުބައްދަލު ގޮތަކަށް ޚަރަދު ކުރަމުން އަންނަ ކަމަށެވެ.
ގައުމުގެ މާލީ ހާލަތު ގޯސްވެ، ދަރަނި އަދާކުރުމަށް ހުރަސްތައް ގިނަ ކަމަށް ބޭރުގެ މާލީ އިދާރާތަކުން އިންޒާރު ދެމުންއަންނައިރު، މި ހާލަތުން އަރައިގަތުމަށް އެ ފަރާތްތަކުން އެންމެ ބޮޑަށް ބާރު އަޅަނީ ޚަަރަދު ކުޑަކުރުމަށެވެ.
މިދިޔަ ބުރާސްފަތި ދުވަހު ރައީސް ޑރ. މުޙައްމަދު މުއިއްޒު ވަނީ، ގައުމުގެ މާލީ ހާލަތާއި އިގްތިޞާދު މިހާރު އޮތް ގޮތުން ސިޔާސީ މަގާމުތައް މަދުކުރުމަށް ނިންމަވައިފައިވާކަން އިއުލާން ކުރައްވައިފައެވެ. އަދި ޚަރަދު ކުޑަކުރުމަށް ޓަކައި އެކި މުނާސަބަތުތަކުގައި ބާއްވާ ހަފުލާތައް ކުޑަކުރުން ނުވަތަ ނުބޭއްވުން ހިމެނޭކަމަށް ރައީސް ވިދާޅުވެފައިވެއެވެ.