ރައްޔިތުންގެ މަޖިލީސް މެންބަރުންގެ މުސާރަ ކުޑަކުރަން ދެކޮޅު ކަމަށް މަޝްހޫރު ވިޔަފާރިވެރިޔާ އަދި މާމިގިލީ ދާއިރާގެ މެންބަރު ގާސިމް އިބްރާހިމް މިއަދު ވިދާޅުވެއްޖެއެވެ.
މަޖިލީސް މެންބަރުންގެ އަދަދު ދައުރަކަށް ފަހު ދައުރެއް އިތުރުވަމުން އަންނަ އައުމަށް ނިމުމެއް ގެނެސް، މެންބަރުންގެ އަދަދު މަދުކުރަން މެންބަރުންގެ ހިޔާލު ހޯދަން ޕީއެންސީގެ ޕާލިމަންޓްރީ ގްރޫޕުގެ ސީނިއާ ޑެޕިއުޓީ ލީޑަރު އަދި ބާރަށު ދާއިރާގެ މެންބަރު އިބްރާހިމް ޝުޖާއު ވަނީ ގަރާރެއް ހުށަހަޅުއްވައިފައެވެ.
އެ ގަރާރަށް ބަހުސްކުރައްވަމުން ގާސިމް ވިދާޅުވީ، މެންބަރުންގެ އަދަދު މަދުކުރަން ޖެހޭ ކަމަށް ގަބޫލުކުރައްވާ ކަމަށެވެ.
އޭނާ ވަނީ މިދިޔަ 19 ވަނަ މަޖިލީހުގައި ވެސް މެންބަރުންގެ އަދަދު މަދުކުރަން ހުށަހަޅައިފައެވެ. އެކަމަކު، އޭރު އޮތް އެމްޑީޕީގެ ސުޕަމެޖޯރިޓީން އެ ހުށަހެޅުން ބޭރުކޮށްލިކަން ފާހަގަކުރައްވައި ގާސިމް ވަނީ މި ސަރުކާރު ތަމުސީލުކުރާ ޕީއެންސީގެ ފަރާތުން މެންބަރުންގެ އަދަދު މަދުކުރަން ހުށަހެޅުއްވުމުން އުފާކުރައްވާ ކަމަށް ވިދާޅުވެފައެވެ.
![](http://s3-ap-southeast-1.amazonaws.com/sun.assets/uploads/l_166547732353q4sp.jpeg)
މެންބަރު ގާސިމް: އޭނާ ވަނީ މެންބަރުންގެ މުސާރަ ކުޑަކުރަން ދެކޮޅު ހައްދަވާފައި --- ފޮޓޯ/ މަޖިލިސް
އެކަމަކު، މެންބަރުންގެ އަދަދު މަދުކުރި ނަމަވެސް މެންބަރުންނަށް މިހާރު ލިބޭ ބޮޑު މުސާރަ ކުޑަކުރަން ވިޔަފާރިވެރިޔާ ގާސިމް ވަނީ ދެކޮޅު ހައްދަވައިފައެވެ.
"މިއަދު ރައްޔިތުންގެ މަޖިލީހުގެ އިއްޒަތްތެރި މެންބަރުންނަށް ލިބިވަޑައިގަންނަވާ މުސާރައިގެ އަދަދު ކުޑަކުރަން ވެސް ނުފެންނަ ކަމަށް، އިނާޔަތްތައް ވެސް ކުޑަކުރަން ނުފެންނަ ކަމަށް އަޅުގަނޑު ދަންނަވަން،" އޭނާ ވިދާޅުވިއެވެ.
"އެކި ރަށްރަށުން ކަންކަމުގައި ހޮވިވަޑައިގެން މި ތަނަށް ވަޑައިގަންނަވާ ބޭފުޅުން 20،000 ރުފިޔާގެ އެލަވަންސެކޭ ބުންޏަސް 20،000 ރުފިޔާއަކުން އެ ބޭފުޅުންނަށް ހަމަނުޖެއްސޭކަން އަޅުގަނޑުމެންނަށް ވަރަށް ރަނގަޅަށް އެނގޭ،"
އޭނާ ވިދާޅުވީ، މިހާރު މި އޮތީ މަޖިލީސް މެންބަރުންގެ މުސާރަ ކަނޑައަޅަން ޔުނިޓަރީ ދައުލަތެއްގައި އޮންނަންވާނެ އެންމެ ރަނގަޅު ގޮތަށް ކަމަށެވެ. އެގޮތުން، ފެޑަރަލް ސިސްޓަމަށް އަމަލުކުރާ ގައުމުތަކުގެ މިސާލު ބައެއް މެންބަރުން ދައްކަވާއިރު އެ ތަންތަނާ ދިވެހިރާއްޖެއާ ވަރަށް ތަފާތުކަމަށް ގާސިމް ގަބޫލުކުރައްވައެވެ.
"ރައްޔިތުންގެ މަޖިލީސް މެންބަރުންނަކީ އެހެން އެއްވެސް ގޮތަކަށް ޙައްގު ގޮތެއްގައި އަތަށް ލާރިއެއް ލިބޭނެ ގޮތެއް އޮތް ބައެއް ނޫން. ދައުލަތުގެ ހުރިހާ މަސައްކަތްތައް ކުރާ ވުޒާރާތަކާއި އަދި އެ ނޫން އެހެން ކުންފުނިތަކާއި ތަންތަނުން ވެރިންނާއި އެ ތަންތަނުގެ މުވައްޒަފުންހެން ލިބޭ ފަދައިން ފައިސާ އަތުގައި ޖެހޭ ބައެއް ނޫން،" އޭނާ ވިދާޅުވިއެވެ.
މީގެ އިތުރުން، އެކަކަށް މެންބަރުކަން ކުރެވޭނީ އެންމެ ގިނަވެގެން ދެ ދައުރުގައި ކަމަށް ކަނޑައެޅުމާ ވެސް ދެކޮޅު ކަމަށް ގާސިމް ވިދާޅުވިއެވެ. އޭނާ ވިދާޅުވީ، އެއީ އެއްވެސް ގައުމެއްގައި އަމަލުކުރާ އުސޫލެއް ނޫން ކަމަށެވެ.
އޭނާ ވިދާޅުވީ، 19 ވަނަ މަޖިލީހުގެ ސުޕަމެޖޯރިޓީ އޭރު ވެރިކަން ކުރި ޕާޓީއަށް ދިނީމާ ވީގޮތާއި މިއަދު ސުޕަމެޖޯރިޓީ ލިބުނީމާ ވާނެ ގޮތް ރައްޔިތުން ވަރަށް ޝައުގުވެރިކަމާ އެކު ބަލަން ތިބި ކަމަށެވެ. އަދި، އާސަންދައާއި ސަބްސިޑީ ހަމައެކަނި ހައްގުވެރިންނަށް ދޭން ވެސް ގާސިމް ވަނީ ދެކޮޅު ހައްދަވައިފައެވެ.
"އެންމެ ގިނައިން ސަރުކާރަށް ޓެކްސް ދައްކާ މީހާތޯ ހައްގުނުވަނީ ދައުލަތުން އެހީތެރިކަމާއި އިނާޔަތެއް ލިބެން. މިއީ ސުވާލަކީ،" ގާސިމް ފާހަގަކުރެއްވިއެވެ.
"އެންމެ ބޮޑު ޚިދުމަތެއް ކުރާ މީހާއަށްތޯ ދައުލަތުން އެހީތެރިކަމެއް ލިބެން ނުޖެހެނީ؟ ނޯ. އަޅުގަނޑު ދެކޮޅު އެ ކަމާ،"
ފާހަގަކޮށްލެވޭ ގޮތުގައި މަޖިލީސް މެންބަރުންނަށް މިހާރު މުސާރައިގެ ގޮތުގައި ކޮމިޓީ އެލަވަންސާ އެކު 82،500 އެއްހައި ރުފިޔާ ލިބިވަޑައިގަންނަވައެވެ. އަދި، އެ މެންބަރުންނާއި އަނބިދަރީންނަށް އާސިޔާންގެ ގައުމުތަކުން ހިލޭ ބޭސް ފަރުވާ ވެސް ކުރެވެއެވެ.
މި ހިނގާ 20 ވަނަ މަޖިލީހުގައި ވެސް 93 މެންބަރުން ތިއްބަވާއިރު، އެ މެންބަރުންނަށް އިންތިހާއަށް ބޮޑު ހޭދައެއް ކުރަންޖެހޭތީ މެންބަރުންގެ އަދަދު މަދުކޮށް، މެންބަރުންގެ މުސާރައާއި އިނާޔަތްތައް ކުޑަކުރަން ގިނަ އާންމުން އަންނަނީ އަޑުއުފުލަމުންނެވެ. މަޖިލީހުގެ ގިނަ މެންބަރުން ވެސް އެ ގޮތަށް އެ ބަދަލު ގެންނަން ތާއީދުކުރައްވައެވެ.
މިއީ ގާސިމް އިބްރާހިމް ޖެހިޖެހިގެން މަޖިލީހުގައި އިންނަވާ ފަސްވަނަ ދައުރެވެ. އޭނާ ވަނީ މީގެ ކުރިން މަޖިލީހުގެ ރައީސްކަން ވެސް ކުރައްވައިފައެވެ. އޭނާއަކީ މަޝްހޫރު ވިލާ ކުންފުނީގެ ވެރިޔާއެވެ.