ދިވެހި ދައުލަތަށް 47 އަހަރަށް ވުރެ ގިނަ ދުވަހު ޚިދުމަތްކުރައްވައި، ދިވެހި ދައުލަތަށް ޚިދުމަތްކުރުމުގެ ގައުމީ އިނާމު ވެސް މިދިޔަ އަހަރު ލިބިވަޑައިގެން މުޙައްމަދު ޒަކީ އަވަހާރަވެއްޖެއެވެ.
މުޙައްމަދު ޒަކީ، ދިވެހި ދައުލަތަށް ޚިދުމަތް ކުރައްވަން ފެއްޓެވީ، 3 މާރިޗު 1973 ގައެވެ.
އޭނާ އަވަހާރަވީ އުމުރުން 68 އަހަރުގައެވެ. އޭނާ ނިޔާވި އިއްޔެއެވެ. ޒަކީގެ މައްޗަށް ކަށު ނަމާދު ކޮށްފައިވަނީ މިއަދު މެންދުރު ނަމާދަށް ފަހު ހުޅުމާލޭ ސަހަރާ މިސްކިތް، މަސްޖިދުލް ޒައިދުބިން ޘާބިތުގައެވެ.
ރައީސް ޑރ. މުހައްމަދު މުއިއްޒު ވެސް ވަނީ މުޙައްމަދު ޒަކީ އަވަހާރަވުމުން އާއިލާއަށް ތައުޒިޔާ ވިދާޅުވެފައެވެ.
އުމުރުން 65 އަހަރުވެގެން، 28 އޮކްޓޫބަރު 2020 ގައި ޒަކީ ރިޓަޔާ ކުރެއްވިއިރު ހުންނެވީ، ޑިޕާޓްމަންޓް އޮފް ޕަބްލިކް އެގްޒޭމިނޭޝަންސްގެ ސީނިއާ ޕްރިންޓިން ސުޕަވައިޒަރެއްގެ މަގާމުގައެވެ. މުޙައްމަދު ޒަކީ ވަނީ، 47 އަހަރަށްވުރެ ގިނަ ދުވަހު ދައުލަތަށް ޚިދުމަތް ކުރައްވައިފައެވެ.
މުޙައްމަދު ޒަކީ ފުރަތަމަ އަދާކުރެއްވީ، މިނިސްޓްރީ އޮފް އެގްރިކަލްޗަރުގެ ސީއައި ޑިވިޜަންގެ ފޯމޭނެއްގެ ވަޒީފާއެވެ. އޭގެ ފަހުން، މިނިސްޓްރީ އޮފް އެޑިޔުކޭޝަންގެ ޕިޔޯނު ކަމާއި، އެޑިޔުކޭޝަނަލް ޕްރޮޖެކްޓް އޮފީހުގެ ޕިޔޯނުކަން ކުރެއްވިއެވެ. އަދި، އެ އޮފީހުގެ ޕްރިންޓަރު ކަމާއި، އެޑިޔުކޭޝަނަލް ޑިވެލޮޕްމަންޓް ސެންޓަރުގެ ޕްރިންޓަރު ކަމާއި، ދިވެހިރާއްޖޭގެ ތަޢުލީމު ކުރިއަރުވާ މަރުކަޒުގެ ސީނިއާ ޕްރިންޓަރުކަން ވެސް ކުރެއްވިއެވެ.
މީގެ އިތުރުން، އެ މަރުކަޒުގެ ޗާޕާބެހޭ އެހީތެރިއާކަމާއި، ފޮތް ޗާޕުކުރާ ބައިގެ ސީނިއާ ޕްރިންޓަރުކަމުގެ ވަޒީފާ އަދާކުރެއްވިއެވެ. އަދި، ޑިޕާޓްމަންޓް އޮފް ޕަބްލިކް އެގްޒޭމިނޭޝަންސްގެ ސީނިއާ ޕްރިންޓަރުކަމާއި، ޕްރިންޓިން ސުޕަވައިޒަރުކަން ވެސް މުޙައްމަދު ޒަކީ ކުރެއްވިއެވެ.
މުޙައްމަދު ޒަކީ ދިގު މުއްދަތެއްގައި މި މަސައްކަތް ކުރެއްވިއިރު، އެއްވެސްއިރެއްގައި މައްސަލައެއް ޖެހިގެން ސުވާލެއްކުރަން ޖެހިފައިނުވާކަމަށް ގައުމީ އިނާމު އެރުވި ދުވަހު ރައީސް އޮފީހުގައި ލިޔެފައިވާ ލިޔުމުގައި ބުނެފައިވެއެވެ.