ގޫގުލްގެ އެޑްވާންސް ފޮޓޯ އެޑިޓިން ޓޫލް "މެޖިކް އެޑިޓަރު" މިހާރު ސެމްސަންގް އަދި ޕިކްސެލް ފޯނުތަކުން ލިބެން ހުންނާނެ ކަމަށް ޓެކް ރިޕޯޓްތައް ބުނެފިއެވެ.
ޓެކް ރިޕޯޓްތައް ބުނާގޮތުގައި ގޫގުލްއިން އަންނަނީ މެޖިކް އެޑިޓަރުގެ އިތުރުން އެހެނިހެން ޒަމާނީ ވަސީލަތްތައް ގޫގުލް ފޮޓޯސް އެޕްލިކޭޝަނަށް އަޕްޑޭޓެއް މެދުވެރިކޮށް، ސެމްސަންގް ސްމާޓްފޯނުތަކާއި ކުރީގެ ޕިކްސެލް މޮޑެލްތަކަށް ތައާރަފުކުރަމުންނެވެ.
އާޓިފިޝަލް އިންޓެލިޖެންސް ބޭނުންކޮށްގެން ފަސޭހައިން ފޮޓޯތައް މޮޑިފައިކުރެވޭ ގޮތަށް ފަރުމާކޮށްފައިވާ މެޖިކް އެޑިޓަރު އެންމެ ފުރަތަމަ ތައާރަފުކުރީ 'ޕިކްސެލް8' ލައިންއަޕާ އެކުއެވެ. މި ވަސީލަތާ އެކު ފޮޓޯގެ ބެކްގްރައުންޑް ބަދަލުކޮށް، އިތުރު އެޑިޓިންގެ މަސައްކަތްތައް ކުރެވޭނެއެވެ.
މި ފީޗާތައް މެއި މަހުގެ 15 ވަނަ ދުވަހުން ފެށިގެން އެހެން އެންޑްރޮއިޑް ޑިވައިސްތަކަށް ގެންނަން ނިންމާފައިވާކަން ގޫގުލްއިން އިއުލާނުކޮށްފައިވާއިރު، އެންމެ ފަހުގެ ގޫގުލް ފޮޓޯސް އެޕް އަޕްޑޭޓް (ވާޝަން 9.85)އާ އެކު އަޕްޑޭޓްތައް މިހާރު އަންނަނީ ރޯލްއައުޓް ކުރަމުންނެވެ.
ނަމަވެސް، ޕިކްސެލް ނޫން އެހެން ފޯނުތަކަށް ބައެއް ލިމިޓޭޝަންތައް އެބަހުއްޓެވެ.
ކުރީގެ ޕިކްސެލް ސްމާޓް ފޯނުތަކުގައި މެޖިކް އެޑިޓަރު ބޭނުންކުރުމުގެ ފުރުސަތު ހިލޭ ލިބޭއިރު، ސެމްސަންގް އަދި އެހެނިހެން އެންޑްރޮއިޑް ފޯނުތަކަށް އެޑިޓަރު ލައިބްރަރީގައި މަހަކު ސޭވްކުރެވޭނީ 10 މެޖިކް އެޑިޓިންއެވެ. އެއަށް ވުރެ އިތުރަށް ފީޗާ ބޭނުންކުރަން 'ގޫގުލް ވަން' ސަބްސްކްރިޕްޝަނެއް ބޭނުންވާނެއެވެ.
މި ފިޔަވަޅާ އެކު ގޫގުލްއިން އަންނަނީ އެ ކުންފުނީގެ ޒަމާނީ ފޮޓޯ އެޑިޓިންގެ ގާބިލުކަން ފުޅާ ދާއިރާއެއްގައި ޔޫޒަރުންނާ ހަމައަށް ގެނެސްދެމުންނެވެ.