ސެމްސަންގް ގެލެކްސީ ޒެޑް ފޯލްޑް 6 ސްޕެޝަލް އެޑިޝަން ނެރެފި

ސެމްސަންގް ގެލެކްސީ ޒެޑް ފޯލްޑް 6 ސްޕެޝަލް އެޑިޝަން ނެރެފިއެވެ.

ސެމްސަންގުން މިއަދު އިޢުލާނުކުރި ގޮތުގައި، ގެލެކްސީ ޒެޑް ފޯލްޑް 6 ސްޕެޝަލް އެޑިޝަން ވިއްކަން ފަށާނީ އަންނަ ހަފުތާގައެވެ.

މި އައު ފޯލްޑަބަލް ސްމާޓްފޯނަކީ މިއަހަރު ކުރީކޮޅު ނެރުނު އާންމު ގެލެކްސީ ޒެޑް ފޯލްޑް 6 އާ އަޅާބަލާއިރު ތުނި އަދި ލުއި މޮޑެލެކެވެ.

މީގެ އިތުރުން ކެމެރާ ސިސްޓަމާއި ޑިސްޕްލޭވެސް ވަނީ ރަނގަޅުކޮށްފައެވެ. ނަމަވެސް މި މޮޑެލް ވިއްކަން ފަށާނީ ހަމައެކަނި ކުންފުނީގެ މައި އޮފީސް ހުންނަ ދެކުނު ކޮރެއާގައެވެ.

ގެލެކްސީ ޒެޑް ފޯލްޑް 6 ސްޕެޝަލް އެޑިޝަންގެ އަގު ފަށާނީ 2،789،600 ކޮރެއާ ވޮންއިންނެވެ. އެއީ ގާތްގަނޑަކަށް 2,040 ޔޫއެސް ޑޮލަރު ކަމުގައި ބެލެވެއެވެ.

މި ފޯނު ލިބެން ހުންނާނީ 16ޖީބީ އަދި 512ޖީބީ ސްޓޯރޭޖް ކޮންފިގަރޭޝަނުގައި ބްލެކް ޝެޑޯ ކުލައިގައެވެ.

މި ފޯނުގެ ބޭރު ސްކްރީނަކީ 6.5 އިންޗީގެ ސްކްރީނެއް ކަމަށާއި އެތެރޭގެ ސްކްރީނަކީ އަށް އިންޗީގެ ސްކްރީނެއްކަމަށް ސެމްސަންގުން ވަނީ ހާމަކޮށްފައެވެ.

އާންމު މޮޑެލާ އަޅާބަލާއިރު މި ސްޕެޝަލް އެޑިޝަން 1.5 މިލިމީޓަރު ތުންޏެވެ. އަދި ތިން ގްރާމް ލުއެވެ.

މި ފޯނުގެ މައި ކެމެރާއަކީ 200 މެގަޕިކްސެލްގެ ކެމެރާއެކެވެ. އަދި މި ފޯނު ރަން ކުރަނީ ކުއަލްކޮމްގެ ސްނެޕްޑްރެގަން 8 ޖެން 3 ޕްރޮސެސަރުންނެވެ.

މީގެ އިތުރުން ގެލެކްސީ އޭއައި ކުންފުނީގެ އާޓިފިޝަލް އިންޓެލިޖެންސް ފީޗާތައް ވެސް މި ފޯނުގައި ހިމެނެއެވެ.