ދެކުނު ކޮރެއާގެ މަޝްހޫރު ޓެކް ކުންފުނި ސެމްސަންގުން އެ ކުންފުނީގެ އާޓިފިޝަލް އިންޓެލިޖެންސްގެ ދެވަނަ ޖީލުގެ މޮޑެލް ތައާރަފުކޮށްފިއެވެ.
ގައުސް2ގެ ނަމުގައި ތަޢާރަފުކުރި މި އައު އޭއައި މޮޑެލް ކުރީގެ މޮޑެލްއަށްވުރެ ހަލުވިވެފައި، އެޕްލިކެޝަންތަކުގައި ބޭނުންކުރެވޭ މިންވަރު އިތުރުވާނެ ކަމަށް ސެމްސަންގުން ބުނެއެވެ.
މި އައު ލާޖް ލޭންގުއޭޖް މޮޑެލް (އެލްއެލްއެމް) ތަޢާރަފުކޮށްފައިވަނީ އޮންލައިންކޮށް ބޭއްވި ސެމްސަންގް ޑިވެލޮޕާ ކޮންފަރެންސް ކޮރެއާ 2024 (އެސްޑީސީ24 ކޮރެއާ)ގެ ކީނޯޓް ތަގުރީރުގައެވެ. މި އޭއައި މޮޑެލްގެ ސޮފްޓްވެއާ ޑިވެލޮޕްމަންޓާއި ރިސާޗް މަސައްކަތްތަކުގައި މިހާރު ވެސް ބޭނުންކުރަމުންދާކަން ސެމްސަންގުން ފާހަގަކޮށްފައިވެއެވެ.
ސެމްސަންގެ ނިއުސްރޫމް ޕޯސްޓެއްގައި ބަޔާންކޮށްފައިވާ ގޮތުގައި، ގައުސް އޭއައި މޮޑެލްގެ ދެވަނަ ޖީލުގައި އެތައް އަޕްގްރޭޑެއް ހިމެނިފައިވެއެވެ. އެގޮތުން، އެކި ބާވަތުގެ ޑޭޓާ ސެޓްތައް ބެލެހެއްޓުމުގެ މަލްޓިމޯޑަލް ގާބިލިއްޔަތު ރަނގަޅުކޮށްފައިވާ ކަމަށް އެ ކުންފުނިން ބުނެއެވެ.
މީގެ އިތުރުން، މި އޭއައި މޮޑެލް މިހާރު 9-14 ބަހަކުން ބޭނުންކުރެވޭނެއެވެ. އަދި ބަހާއި، ކޯޑު އަދި އިމޭޖްތަކުގެ ޕަފޯމަންސްވެސް ރަނގަޅުކޮށްފައިވާ ކަމަށް ބުނެއެވެ.
ސެމްސަންގް ގައުސް2 ލިބެން ހުންނާނީ ޕެރަމީޓާ ސައިޒަށް ބިނާކޮށް ތިން ވައްތަރަކަށެވެ. އެއީ ކޮމްޕެކްޓް، ބެލެންސްޑް އަދި ސުޕްރީމްއެވެ. ކޮމްޕެކްޓަކީ އެފިޝެންސީއަށް އަމާޒުކޮށް، ހަލަބޮލި މާހައުލެއްގައި މަސައްކަތްކުރުމަށް ފަރުމާކޮށްފައިވާ ކުޑަ ސައިޒުގެ މޮޑެލެކެވެ. ބެލެންސްޑް މޮޑެލަކީ ޕަފޯމަންސްއާއި އެފިޝެންސީއަށް ވެސް އަމާޒުކޮށްފައިވާ މޮޑެލެކެވެ. އަދި ސުޕްރީމް މޮޑެލަކީ މިކްސްޗާ އޮފް އެކްސްޕާޓްސް (އެމްއޯއީ) ޓެކްނޮލޮޖީ ބޭނުންކޮށްގެން މަތީ ފެންވަރުގެ ކޮމްޕިއުޓިން މަސައްކަތްތައް ކުރެވޭ މޮޑެލެކެވެ.
ސެމްސަންގް އަކީ ޓެކްނޮލޮޖީގެ ދާއިރާއިން އާ އުފެއްދުންތަކެއް އުފެއްދުމަށް މަޝްހޫރު ކުންފުންޏެއް ކަމަށްވާއިރު، ސްމާޓްފޯނާއި ޓެބްލެޓް، ޓީވީ، އަދި ގޭތެރޭގެ ސާމާނު ފަދަ ގިނަ އުފެއްދުންތަކެއް އެކުންފުނިން އުފައްދައެވެ.
އެ ކުންފުނިން ވަނީ ދުނިޔޭގެ ޓެކް އިންޑަސްޓްރީގައި މުހިންމު ދައުރެއް އަދާކޮށް، ގިނަބައެއްގެ މަގުބޫލުކަން ހޯދާފައެވެ. އަދި ސެމްސަންގް ސްމާޓްފޯނަކީ ދުނިޔޭގައި އެންމެ ގިނައިން ވިކޭ އެއް މޮޑެލްއެވެ.