ކުރިއަށް އޮތް އަހަރު ތެރޭ އޭއައި ޓެކްނޮލޮޖީ ދިރިއުޅުމުގެ ހުރިހާ ދާއިރާއަކަށް ވެސް އަންނާނެ ކަމަށް ސެމްސަންގް އިލެކްޓްރޯނިކްސްގެ އޭއައި ވެރިޔާ ޔަންގްޖިޕް ކިމް ވިދާޅުވެއްޖެއެވެ.
ކިމް މިހެން ވިދާޅުވީ ސެމްސަންގްގެ ގެލެކްސީ އެސް24 އެފްއީ އަދި ގެލެކްސީ ޓެބް އެސް10 އަދި އެ ޑިވައިސްތަކުގައި ހުންނަ ގިނަ އޭއައި ފީޗާތައް ތަޢާރަފުކުރުމަށް ސެޕްޓެމްބަރު 26، 2024 ގައި ވިއެޓްނާމްގައި ބޭއްވި ޙަފުލާގައެވެ.
ކިމް ވިދާޅުވި ގޮތުގައި ފާއިތުވި މަދު މަސްތަކެއްގެ ތެރޭގައި އާންމުންގެ އޭއައިއާ މެދު އޮންނަ އުންމީދު ވަރަށް ބޮޑަށް އިތުރުވެފައިވެއެވެ. އެހެންކަމުން ގިނަ ޓެކްނޮލޮޖީ ކުންފުނިތަކުން މިހާރު އަންނަނީ އެ ކަމަށް ވަރަށް ބޮޑަށް މަސައްކަތްކުރަމުންނެވެ. ކުރިއަށް އޮތްތަނުގައި މީހުންނަށް އޭއައި ބޭނުންކޮށްގެން އިތުރު ތަޖުރިބާތައް ލިބޭނެ ކަމަށާއި، އޭއައި އެސިސްޓެންޓުންނާއި މުޢާމަލާތްކުރާނެ އާ ގޮތްތަކެއް ތަޢާރަފުވާނެ ކަމަށް އޭނާ ވިދާޅުވިއެވެ.
ސެމްސަންގްގެ ޑިވައިސްތަކުގައި އޭއައި ފީޗާތައް އިތުރުކުރަމުންދާކަން ފާހަގަކުރައްވާ ކިމް ވިދާޅުވީ، މީގެ ތެރޭގައި ކެމެރާއާއި ފޮޓޯ ނެގުމުގެ އޭއައި ޓޫލްތައް ހިމެނޭއިރު، މިއީ އޭނާ އަމިއްލައަށް ވެސް ވަރަށް ގިނައިން ބޭނުންކުރާ ފީޗާތަކެއް ކަމަށެވެ.
ކިމް އިތުރަށް ވިދާޅުވެފައިވަނީ އެންމެ އާދައިގެ އޭއައި ބޭނުންތަކުން ވެސް މީހުންގެ ދިރިއުޅުން ބަދަލުކޮށްލެވިދާނެ ކަމަށެވެ. އޭނާ މިސާލެއްގެ ގޮތުން ދެއްކެވީ ސެމްސަންގްގެ މުވައްޒަފެއްގެ ވާހަކައެވެ. މި މުވައްޒަފާއި އޭނާގެ އަނބިމީހާގެ މައިންބަފައިންނަށް ސެމްސަންގްގެ ގެލެކްސީ އެސް24ގެ އޭއައި ތަރުޖަމާ ފީޗާ ބޭނުންކޮށްގެން ވާހަކަދެއްކުމުގެ ފުރުޞަތު ލިބުނު ވާހަކައެވެ.
ކުރިއަށް އޮތްތަނުގައި އޭއައި ޓޫލްތައް ތަރައްޤީވެގެންދާނީ މީހުން އޭއައި ބޭނުންކުރާ ގޮތާއި އެއާ މެދު ވިސްނާ ގޮތަށް ބަލައިގެން ކަމަށް ކިމް ވިދާޅުވިއެވެ. އަދި، އަމިއްލަ ފަރުދުންގެ ބޭނުންތަކަށް ފެތޭގޮތަށް އޭއައި ބަދަލުވާނެ ކަމަށް ވެސް އޭނާ ވިދާޅުވިއެވެ.
"ކުރިއަށް އޮތް އަހަރު މީހުންނަށް ފެންނާނެ އެއް ބަދަލަކީ އޭއައި ޓެކްނޮލޮޖީ ފުޅާކޮށް ބޭނުންކުރަން ފެށުން. މިއަދު މީހުން އޭއައި ބޭނުންކުރަނީ ވަކި ވަގުތުތަކުގައި އެކަނި. ނަމަވެސް، ކުރިއަށް އޮތް އަހަރު އޭއައި ޓެކްނޮލޮޖީ ދިރިއުޅުމުގެ ހުރިހާ ދާއިރާއަކާ ފުންކޮށް ގުޅި ލާމެހިގެންދާނެ،" ކިމް ވިދާޅުވިއެވެ.