މި އަހަރު ޙައްޖުގެ އަޅުކަން އަދައިކުރުމަށް ޓަކައި ދިޔަ އެންމެ ހަގު ހައްޖުވެރިޔާ އިއްޔެ ނިޔާވެއްޖެއެވެ.
ނިޔާވެފައިވަނީ މިސްރަށް ނިސްބަތްވާ ޔަޙްޔާ މުޙައްމަދު ރަމަޟާނެވެ. ނިޔާވިއިރު އޭނާގެ އުމުރު ސާފެއް ނޫނެވެ.
ޔަހްޔާގެ އާއިލާއާ ހަވާލާދީ ބޭރުގެ ބައެއް ނޫސްތަކުގައި ރިޕޯޓުކޮށްފައިވާ ގޮތުގައި، އޭނާ ނިޔާވާން މެދުވެރިވި މައިގަނޑު ސަބަބަކީ މައްކާގެ ހޫނު މިނަށް ކެތް ނުކުރެވުމެވެ. ނަމަވެސް ބައެއް ނޫސްތަކުން ރިޕޯޓުކުރި ގޮތުގައި ޔަހްޔާ މަރުވީ އުސް އިމާރާތަކުން ވެއްޓިގެން ކަމަށް ވެސް ވެއެވެ.
ޔަހްޔާގެ ކަށުނަމާދު ބާއްވައިފައިވަނީ މަސްޖިދުލް ޙަރަމްގައެވެ. އަދި އޭނާ ވަޅުލައިފައިވަނީ ވެސް މައްކާގައެވެ. ޔަހްޔާއަކީ މިޞްރުގެ ރައްޔިތެއް ކަމަށްވާ މުޙައްމަދު ރަމަޟާންގެ ފިރިހެން ދަރިފުޅެވެ. ރަމަޟާން ވަޒީފާ އަދާކުރަނީ ސައުދީއަރަބިއްޔާގައިކަމުން އޭނާއާއި އޭނާގެ އާއިލާ ވެސް ދިރިއުޅެނީ އެ ގައުމުގައެވެ.
ޔަޙްޔާގެ މަރުގެ ޚަބަރާއެކު ގިނަ ބައެއްގެ ސަމާލުކަން ވަނީ އެ ކަމަށް ލިބިފައެވެ. ގިނަ ބަޔަކު އަންނަނީ ތައުޒިޔާގެ މެސެޖުތައް ސޯޝަލް މީޑިއާގައި ހިއްސާކުރަމުންނެވެ.
މި އަހަރުގެ ޙައްޖު މޫސުމަކީ މައްކާގެ ހޫނުމިން ރެކޯޑް މިންވަރަކަށް މަތިވާނެކަމަށް ލަފާ ކުރާ ދުވަސްވަރެކެވެ. ހަމައެއާއެކު އަރަފާތު ބިމުގެ ހޫނުމިން ވެސް ރެކޯޑު މިންވަރަށް މަތިވާނެކަމަށް ވަނީ ލަފާކޮށްފައެވެ. އެހެންވެ ރައްކާތެރިކަމުގެ ފިޔަވަޅުތައް އަޅައި ފިނިކުރުމުގެ ނިޒާމުތައް ސައުދީން އަންނަނީ ގާއިމްކުރަމުންނެވެ.