ދުނިޔޭގެ އެކި ކަންކޮޅުތަކުގެ ޖަލުތަކުގައި ތިބި ނޫސްވެރިން މިނިވަން ކުރުމަށް މަސައްކަތްކޮށް، މީޑިއާގެ މިނިވަންކަމަށް މަސައްކަތްކުރާ ގްރޫޕް ރިޕޯޓާސް ވިތްއުޓް ބޯޑާސްގެ ވެރިޔާ ކްރިސްޓޮފް ޑެލޮއިސް މަރުވެއްޖެއެވެ.
މިދިޔަ މެއި މަހުގެ އަށްވަނަ ދުވަހު ޕެރިހުގައި އޭނާ މަރުވިއިރު، އުމުރުން 53 އަހަރެވެ.
ރިޕޯޓާސް ވިތައުޓް ބޯޑާސްގެ މެމްބަރުން ބުނާ ގޮތުގައި ޑެލޮއިސްއަށް ވަނީ ކެންސަރު ޖެހިފައެވެ.
ޑެލޮއިސްއަކީ ފާޑުކިޔުންތަކާއެކު ވެސް ހިތްވަރާއެކު މަސައްކަތްކުރަމުން ދިޔަ މީހެކެވެ. އޭނާ ވަނީ އެފްރިކާ، ތުރުކީވިލާތް، ޔޫކްރޭން ފަދަ ގައުމުތަކަށް ޒިޔާރަތްކޮށް ސަރުކާރުތަކަށް ވިސްނައިދީ، ޖަލަށްލާނެ ކަމަށް އިންޒާރުދީފައިވާ ނޫސްވެރިންގެ ހައްގުގައި ތެދުވެފައެވެ.
ބައިނަލްއަގުވާމީ ނޫސްވެރިކަމުގެ މިނިވަންކަމަށް ވަކާލާތުކުރާ ފަރާތްތަކުން ވަނީ އޭނާގެ ޚިދުމަތްތަކަށް ޝުކުރު އަދާކޮށް، އޭނާ ނެތިދިއުމުގެ ހިތާމަ ފާޅުކޮށްފައެވެ.
ރަޝިއާއިން ޔޫކްރެއިން ގައި ހިންގަމުންދާ ހަނގުރާމަ ކުށްވެރިކޮށް 2022ވަނަ އަހަރު ލައިވް ޓީވީގައި ވާހަކަދެއްކި ރަޝިއާގެ ނޫސްވެރިއާ މެރީނާ އޮވްސިއަންނިކޯވާއަށް ރަޝިއާއިން ޕްރެޝަރު ކުރުމާ ގުޅިގެން ސިއްރު އޮޕަރޭޝަނެއްގައި އޭނާ ފިލުމަށް ޑެލޮއިސްވަނީ އެހީތެރިވެދީފައެވެ.
އަދި ރަޝިއާ ޔޫކްރެއިން ހަނގުރާމަ ފެށުމާ ގުޅިގެން ނޫސްވެރިންނަށް ރައްކާތެރިކަމުގެ ސާމާނާއި ތަމްރީނު ދިނުމުގެ ޕްރޮގްރާމްތައް ވެސް ރިޕޯޓާސް ވިތައުޓް ބޯޑާސްއިން ވަނީ ފޯރުކޮށްދީފައެވެ.
އިސްލާމީ ހަރުކަށި ފިކުރުގެ މީހުންގެ އަތްދަށުގައި ދެ އަހަރު ވަންދެން ހިފައްހައްޓައިފައި ހުރި ނޫސްވެރިއާ އޮލިވިއާ ޑޫބޮއިސް މިނިވަން ކުރުމަށް ވެސް ޑެލޮއިސް ވަނީ ވަރަށް ބޮޑަށް މަސައްކަތްކުރައްވައިފައެވެ. އޭނާ މިނިވަންވެފައި ވަނީ މިދިޔަ އަހަރެވެ.
ރިޕޯޓާސް ވިތައުޓް ބޯޑާސްގެ ވެރިއެއްގެ މަގާމުގައި ހޭދަކުރެއްވި 12 އަހަރު ދުވަހުގެ ތެރޭގައި އެ ގްރޫޕް އިތުރަށް ފުޅާކޮށް، ސަރުކާރުތަކުގެ މެދުގައި އެ ގްރޫޕްގެ ޕްރޮފައިލް މަތިކުރެއްވިއެވެ.
އޭނާގެ ބެލުމުގެ ދަށުން އެ ގްރޫޕުން ވަނީ ޚަބަރުތަކަށް އާންމުންގެ އިތުބާރު އަލުން ހޯދުމަށް މީޑިއާ ޖަމިއްޔާތަކަށް ސެޓްފިކެޓް ދިނުމުގެ ޕްރޮގްރާމެއް ކަމަށްވާ ޖާނަލިޒަމް ޓްރަސްޓް އިނިޝިއޭޓިވް އާއި ޑިމޮކްރެޓިކް ފިކުރާއި މިނިވަންކަމަށް ކުރިމަތިވާ ނުރައްކާތައް ނައްތައިލުމުގެ މަގުސަދުގައި ފޯރަމް ފޯ ޑިމޮކްރަސީގެ ނަމުގައި ޕްރޮގްރާމެއްވެސް ފަށައިފައެވެ.
ނަވާރަސަތޭކަ ހަތްދިހަ އެއްވަނަ އަހަރުގެ މެއި މަހުގެ 22ވަނަ ދުވަހު ބާގަންޑީގެ ޕެރޭ ލެ މޮނިއަލް އަށް އުފަން ޑެލޮއިސް ވަނީ ރިޕޯޓާސް ވިތައުޓް ބޯޑާސްގެ ޑިރެކްޓަރަކަށްވުމުގެ ކުރިން އިންވެސްޓިގޭޓިވް ރިޕޯޓަރެއްގެ ގޮތުގައި މަސައްކަތްކޮށްފައެވެ.