މޯލްޑިވްސް މީޑިއާ ކައުންސިލްގެ ރައީސަކަށް ތިލަދުން އޮންލައިންގެ ސީއީއޯ ހުސައިން ސަގީފް މިއަދު އިންތިޚާބުކޮށްފިއެވެ.
އެ މަގާމު ސަގީފް ކާމިޔާބުކުރީ މިހާރު އޮންލައިންގެ ފާތިމަތު ޝަނާ މުޙައްމަދުގެ މައްޗަށް ކުރިހޯދައިގެންނެވެ. ދެ މެންބަރުންގެ މެދުގައި ކައުންސިލުގައި އިއްޔެ ފުރަތަމަ ނެގި ވޯޓުގައި، ދެ މެންބަރުންނަށް ވެސް ލިބުނީ ހަތް ވޯޓެވެ.
އެއަށްފަހު މިއަދު ދެވަނަ ފަހަރަށް ވޯޓަށް އެހުމުން ސަގީފް އިންތިޚާބުވީ އެންމެ ވޯޓެއްގެ ތަފާތުންނެވެ. މިގޮތުން، ސަގީފަށް އަށް ވޯޓު ލިބުނުއިރު، ޝަނާއަށް ލިބުނީ ހަތް ވޯޓެވެ.
މީގެއިތުރުން، އެ ކައުންސިލްގެ ނައިބު ރައީސަކު ހޮވަން އިއްޔެ ނެގި ވޯޓުގައި ނުވަ ވޯޓުން ކުރިހޯދައިގެން އެ މަގާމަށް އިންތިޚާބުވީ އިބްރާހީމް މުޙައްމަދެވެ. އޭނާއަކީ އަމިއްލަ ގޮތުން ކައުންސިލަށް ހޮވުނު މެންބަރެކެވެ.
މީޑިއާ ކައުންސިލްގައި ޖުމްލަ 15 މެންބަރުން ތިބޭއިރު، އޭގެ ތެރޭގައި ހިމެނެނީ މީޑިއާތަކަށް ނިސްބަތްވާ އަށް ނޫސްވެރިންނާއި އަމިއްލަ ގޮތުން ހޮވާ ހަތް މެންބަރުންނެވެ. އެ ކައުންސިލްގެ މެންބަރެއްގެ ދައުރަކީ ދެ އަހަރެވެ.
މިފަހުން ތިބި މެންބަރުންގެ ދައުރު ހަމަވުމާ ގުޅިގެން، އާ މެންބަރުން ހޮވީ މިމަހުގެ ހަތެއްގައެވެ.