އަންނަ ޖެނުއަރީ މަހުގެ 20 ވަނަ ދުވަހުން ފެށިގެން، އީލޮން މަސްކުގެ ސޯޝަލް މީޑިއާ ޕްލެޓްފޯމު، އެކްސްގައި ކޮންޓެންޓު ޕޯސްޓު ކުރުން ހުއްޓާލާނެ ކަމަށް ޔޫރަޕިއަން ފެޑެރޭޝަން އޮފް ޖާނަލިސްޓްސް (އީއެފްޖޭ) އިން ބުނެފިއެވެ.
އީއެފްޖޭއިން ނެރުނު ބަޔާނެއްގައި، އެކްސްގައި ޕޯސްޓްކުރުން ހުއްޓާލާނެ ކަމަށް ބުނެފައިވަނީ މަސްކްގެ ތާއިދާއެކު އެމެރިކާގެ ވެރިކަމުގެ ދެވަނަ ދައުރަކަށް އިންތިޚާބުވެވަޑައިގަތް ޑޮނަލްޑް ޓްރަމްޕް ހުވާ ކުރައްވާ ދުވަހާ ދިމާކޮށެވެ.
އެ ޖަމިއްޔާއިން ބުނީ އެކްސްގެ ވެރިފަރާތުން އެ ޕްލެޓްފޯމް ބޭނުންކުރަނީ ސައްހަ ނޫން މައުލޫމާތާއި ޕްރޮޕަގަންޑާ ފަތުރާ މެޝިނެއްގެ ގޮތުގައި ކަމަށެވެ. އެހެންވުމުން، އެ ޕްލެޓްފޯމްގައި އިތުރަށް ބައިވެރިވެވެން ނެތް ކަމަށް އީއެފްޖޭއިން ބުނެފައިވެއެވެ.
އީއެފްޖޭގެ އިތުރުން ދަ ގާޑިއަން އާއި ޑޭޖެންސް ނައިހެޓާ، ލާ ވެންގާޑިއާ، އޮއެސްޓް-ފްރާންސް އަދި ސުޑް-އޯއެސްޓް ފަދަ ޔޫރަޕްގެ އެހެން މީޑިއާތަކުންވެސް ވަނީ އެކްސްގައި ޕޯސްޓު ނުކުރާނެ ކަމަށް ބުނެފައެވެ.
"ސޯޝަލް މީޑިއާ ސައިޓް އެކްސް ވެފައިވަނީ ކޮންސްޕިރެސީ ތިއަރީތަކާއި ނަސްލީ ތަފާތުކުރުމާއި ކަނާތު ފިޔައިގެ ފިކުރު އިސްކަންދޭ ޕްލެޓްފޯމަކަށް. އެކްސް އަކީ މިހާރު އެއްގޮތަކަށްވެސް އާންމު މަސްލަހަތު އިސްކުރާ ޕްލެޓްފޯމެއް ނޫން. އެއީ އޭގެ ވެރިފަރާތާއި އޭނާގެ ސިޔާސީ އެކުވެރިންގެ ޚާއްސަ ފިކުރީ އަދި މާލީ މަސްލަހަތަށް ޚިދުމަތްކުރާ ޕްލެޓްފޯމެއް،" އީއެފްޖޭ ގެ ރައީސް މާޖާ ސިވާ ވިދާޅުވިއެވެ.
އީއެފްޖޭއަކީ ޔޫރަޕްގެ އެންމެ ބޮޑު ނޫސްވެރިންގެ ޖަމުއިއްޔާއެވެ. އެ ޖަމުއިއްޔާގައި 44 ގައުމެއްގެ 295،000އަށް ވުރެ ގިނަ ނޫސްވެރިން ބައިވެރިވެއެވެ.