މާލޭގެ ސެލޫނެއްގައި ހަށިވިއްކުމުގެ މައްސަލައެއްގައި ތައިލެންޑުގެ ދެ އަންހެނަކު ހައްޔަރުކޮށް، އިއްޔެ ކްރިމިނަލް ކޯޓުން ބަންދުގެ މުއްދަތު ޖަހައިފިއެވެ.
ކްރިމިނަލް ކޯޓުގެ ބަންދު އަމުރުގައިވާ ގޮތުން ހައްޔަރުކޮށްފައިވަނީ 22 އަހަރުގެ އަންހެނަކާއި 39 އަހަރުގެ އަންހެނެކެވެ.
އެ ދެ މީހުން ވެސް ހަށިވިއްކި ކަމަށް ބެލެވޭ މިންވަރަށް ހެކި ހުށަހަޅާފައިވާ ކަމަށް ކޯޓު އަމުރުގައިވެއެވެ. އެގޮތުން ސީނަށް ދިޔަ ފުލުހުންގެ ބަޔާންތަކާއި އެ މީހުން އެކި މީހުންނާއެކު ކޮށްފައިވާ ފޯނު މުއާމަލާތްތަކުގެ ސްކްރީންޝޮޓްތައް ލިބިފައިވާ ކަމަށް އަމުރުގައިވެއެވެ.
"މި ހެކިތަކަށް ބަލާއިރު މީނާ މަސައްކަތްކުރާ ސެލޫންގައި ހަށިވިއްކުމުގެ އަމަލު ހިންގާފައިވާކަން އެނގޭނެ ހެކިތައް ހުށަހަޅާފައިވޭ،" ދެ އަމުރުގައި ވެސްވެއެވެ.
އެ ދެ މީހުން މަސައްކަތް ކުރާ ސެލޫން ބަލައިފާސްކުރިއިރު ބަރަހަނާ ހާލުގައި ތިބި ދެ މީހުން ފެނުނު ކަމަށާއި ޖިންސީ އަމަލު ހިންގުމަށް ބޭނުންކުރާ އާލާތްތައް ވެސް އެތަނުން ފެނިފައިވާ ކަމަށް ކޯޓު އަމުރުގައިވެއެވެ.
އެ މައްސަލައިގައި ދެ އަންހެނުންގެ ބަންދަށް ވެސްވަނީ 15 ދުވަސް ޖަހައިފައެވެ.
ރާއްޖޭގައި ހަށިވިއްކުމުގެ ވިޔަފާރި ފުޅާވެފައިވާއިރު، މާލޭގެ އިތުރުން އެހެން ސަރަހައްދުތަކުން ވެސް ހަށިވިއްކުމުގެ ތުހުމަތުގައި މިފަހުން މީހުން ހައްޔަރުކޮށްފައިވެއެވެ.
މިދިޔަ ފެބްރުއަރީ މަހު ހޯމް މިނިސްޓަރު އަލީ އިހުސާން ވަނީ، މާލޭ ސަރަހައްދުން އެކަނި ވެސް އެކިއެކި ނަންނަމުގައި ހަށިވިއްކުމުގެ ވިޔަފާރިކުރާ 111 ތަނެއް ފާހަގަކުރެވިފައިވާ ކަމަށް ވިދާޅުވެފައެވެ. އޭގެ ތެރެއިން ބައެއް ތަންތަނަށް ޓޫރިސްޓު ވިސާގައި ބިދޭސީން ގެނެސްގެން، އެ މީހުން ލައްވައި ހަށިވިއްކުމުގެ ވިޔަފާރި ހިންގާ ކަމަށް އޭނާ ވިދާޅުވެފައިވެއެވެ.