އަވައްޓެރި ސްރީލަންކާއަށް ފޮރިން މިނިސްޓަރު މޫސާ ޒަމީރު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ ގައުމުގެ ބޮޑުވަޒީރު ދިނޭޝް ގުނަވަރުދަނައާ މިއަދު ބައްދަލުކުރައްވައިފިއެވެ.
އެ ބައްދަލުކުރެއްވުމުގައި، ދެ ގައުމުގެ ދެމުދުގައި އޮތް ޒަމާންވީ ގުޅުމާއި، އެ ގުޅުން އިތުރަށް ބަދަހިކުރެވޭނެ ގޮތްތަކާއި ގުޅޭގޮތުން މަޝްވަރާކޮށްފައިވާ ކަމަށް މިނިސްޓަރު ޒަމީރު ވިދާޅުވިއެވެ.
މިނިސްޓަރު ވަނީ ރާއްޖޭގެ އިގްތިޞާދީ އަދި އިޖްތިމާއީ ތަރައްޤީއަށް ދެމުންދާ އެއްބާރުލުމަށް ބޮޑުވަޒީރަށް ޝުކުރު އަދާކުރައްވާފައެވެ.
ފާހަގަކޮށްލެވޭ ގޮތުގައި، މި ދަތުރުފުޅުގައި މިނިސްޓަރު ޒަމީރު ވަނީ އެ ގައުމުގެ ރައީސް ރަނިލް ވިކްރަމަސިންހައާ ބައްދަލުކުރައްވައިފައެވެ.
މީގެ އިތުރުން އެ ގައުމުގެ ފޮރިން މިިނިސްޓަރާ ވެސް އިއްޔެވަނީ ބައްދަލުކުރައްވައިފައެވެ.
ހަމައެއާއެކު މިއަދު ވަނީ ޕަބްލިކް ސެކިއުރިޓީ މިނިސްޓަރު ޓިރަން އެލެސްއާ ބައްދަލުކުރައްވައިފައެވެ.
އަދި ދިވެހި އިސްރަށްވެހީން ލަންކާގައި ވަޒަންވެރިވާން ބޭނުންވާ ކަމަށް ވިދާޅުވެ، އެ ކަން ފަހިކޮށްދިނުމަށް އެދިވަޑައިގަތް ކަމަށް އެ ގައުމުގެ ނޫސްތަކުން ރިޕޯޓުކުރިއެވެ.
އެ ބައްދަލުވުމުގައި މައިގަނޑު ގޮތެއްގައި މަޝްވަރާކުރީ ވިސާ ހަމަޖެއްސުން ހިމެނޭ ގޮތަށް، އިމިގްރޭޝަނާ ގުޅޭ ގޮތުން ކަމަށް ޑެއިލީ މިރާގައިވެއެވެ.
އަދި، ލަންކާއިން ވިސާ ދެމުން އަންނަ ގޮތަށް ދާދި ފަހުން ގެނައި ބަދަލަށް ޒަމީރު ތައުރީފުކުރެއްވި ކަމަށް އެ ނޫހުގައިވެއެވެ.
މިއީ ލަންކާއަށް ރަސްމީ ދަތުރުފުޅެއްގައި ޒަމީރު ވަޑައިގެންނެވި ފުރަތަމަ ފަހަރެވެ.