ސްރީލަންކާގައި ދިވެހި އިސްރަށްވެހީންނަށް ފަސޭހައިން ވަޒަންވެރިވެވޭނެ ގޮތް ފަހިކޮށްދޭން ފޮރިން މިނިސްޓަރު މޫސާ ޒަމީރު އެދިވަޑައިގެންފައިވާ ކަމަށް އެ ގައުމުގެ ނޫހަކުން މިއަދު ރިޕޯޓުކޮށްފިއެވެ.
ލަންކާގެ ޑެއިލީ މިރާގައިވާ ގޮތުން ޒަމީރު މިއަދު ޕަބްލިކް ސެކިއުރިޓީ މިނިސްޓަރު ޓިރަން އެލެސްއާ ބައްދަލުކުރައްވައި، ދިވެހި އިސްރަށްވެހީން ލަންކާގައި ވަޒަންވެރިވާން ބޭނުންވާ ކަމަށް ވިދާޅުވެ، އެކަން ފަހިކޮށްދިނުމަށް އެދިވަޑައިގަތެވެ.
އެ ބައްދަލުވުމަށް ޕަބްލިކް ސެކިއުރިޓީ މިނިސްޓްރީއަށް ވަޑައިގަތް ދިވެހި ވަފުދުގައި އިސްކޮށް ހުންނެވީ ސްޓޭޓް މިނިސްޓަރު ޝެރީނާ އަބްދުއްސަމަދު ކަމަށް އެ ނޫހުގައިވެއެވެ.
އެ ބައްދަލުވުމުގައި މައިގަނޑު ގޮތެއްގައި މަޝްވަރާކުރީ ވިސާ ހަމަޖެއްސުން ހިމެނޭ ގޮތަށް، އިމިގްރޭޝަނާ ގުޅޭ ގޮތުން ކަމަށް ޑެއިލީ މިރާގައިވެއެވެ. އަދި، ލަންކާއިން ވިސާ ދެމުން އަންނަ ގޮތަށް ދާދި ފަހުން ގެނައި ބަދަލަށް ޒަމީރު ތައުރީފުކުރެއްވި ކަމަށް އެ ނޫހުގައިވެއެވެ.
ލަންކާގެ ބޮޑުވަޒީރު ދިނޭޝް ގުނަވަރުދަނައާ ޒަމީރު ބައްދަލުކުރެއްވުން -- ފޮޓޯ/ ފޮރިން މިނިސްޓްރީ
ލަންކާއިން ޓޫރިސްޓް ވިސާގެ އިންތިޒާމުތަކަށް މިދިޔަ މަހު ބަދަލުތައް ގެނައި ނަމަވެސް، ދިވެހީންނަށް ކުރިއެކޭ ވެސް އެއްގޮތަށް ވިސާ ލިބޭނެ ކަމަށް ފޮރިން މިނިސްޓްރީން ވަނީ ބުނެފައެވެ.
އަވައްޓެރި ލަންކާއަކީ ކިޔެވުމަށާއި ސިއްހީ ފަރުވާއަށް ގިނަ އަދަދެއްގެ ދިވެހީން މިހާރު ވެސް ދިރިއުޅޭ ގައުމެކެވެ. އަދި އެއީ ޗުއްޓީއަށާއި ވިޔަފާރިއަށް ވެސް އާންމުކޮށް ދިވެހިން ޒިޔާރަތްކުރާ ގައުމެކެވެ.