ދަސްވެނިކަމަކީ ހަމައެކަނި ސަނަދެއް ނޫން ކަމަށާއި އެއީ އެކި ކަންކަމުގައި ތިމާގެ ޤާބިލުކަން އިތުރުކުރުން ކަމަށް ރައީސް ޑރ. މުހައްމަދު މުއިއްޒުގެ އަނބިކަނބަލުން މެޑަމް ސާޖިދާ މުޙައްމަދު މިއަދު ވިދާޅުވެއްޖެއެވެ.
ފަސްޓް ލޭޑީ މިފަދައިން ވިދާޅުވީ، ދިވެހިރާއްޖޭގެ އިސްލާމިކް ޔުނިވާސިޓީ (އައިޔޫއެމް)ގެ މި އަހަރުގެ ދަސްވެނިވުމުގެ ރަސްމިއްޔާތު ޝަރަފުވެރުކޮށްދެއްވައި ދެއްކެވި ވާހަކައިގައެވެ.
މެޑަމް ސާޖިދާ ވިދާޅުވީ، ޔުނިވާސިޓީގައި ކިޔަވަމުންދާއިރު މީހުންނާ ގުޅިގެން އުޅުމާއި މުޢާމަލާތުކުރުމުގެ ޤާބިލުކަމާއި ކަންކަން ވަޒަންކޮށް ފާޑުކިޔުމުމާއި ކަންކަމަށް އާ ބަދަލުތައް ގެނެސް އުފެއްދުންތެރިކަން ކުރިއަށް ނެރުމުގެ ޤާބިލުކަންފަދަ ކަންކަން އަށަގެންނެވުމަށް ވަރަށް ބޮޑު އިސްކަމެއް ދޭންޖެހޭ ކަމަށެވެ.
އަދި، ޔުނިވާސިޓީން ދަސްވެނިވުމާ ހަމައިން ކިޔެވުން ނިންމައިނުލައި ޢިލްމާއި ހުނަރު ތަރައްޤީކުރަން އަބަދު ވެސް އަމިއްލައަށް މަސައްކަތްކުރަމުން ގެންދިއުމަށް އެ ކަމަނާ ދަސްވެނީންގެ ކިބައިން އެދިވަޑައިގެންނެވިއެވެ.
މެޑަމް ސާޖިދާ ވަނީ ރާއްޖޭގެ އިސްލާމީ ޔުނިވާސިޓީއަކީ ފަހުގެ ތާރީޚުގައި ދިވެހި މުޖުތަމައަށް އިންޤިލާބީ ބަދަލުތަކެއް ގެނެސްދިން ތާރީޚީ ހިޔާވައްސެއްކަން ފާހަގަކުރައްވައި އެ ޔުނިވާސިޓީ ފެށިގެންއައި ގޮތުގެ ތާރީޚަށް އަލިއަޅުވާލައްވާފައެވެ.
މި ރަސްމިއްޔާތުގައި ރައީސްގެ އަނބިކަނބަލުން ވަނީ މިއަދު ހެނދުނުގެ ދަންފަޅީގައި ދަސްވެނިވި ބައެއް ދަރިވަރުނަށް ސަނަދު ހަވާލުކޮށްދެއްވާފައެވެ.