ހުޅުމާލޭ ދެވަނަ ފިޔަވަހީގެ ހިޔާ ފުލެޓެއް ކުއްޔަށް ދޭ ކަމަށް ބުނެ މީހަކު ގެންގޮސް ފޭރުނު މައްސަލައިގައި ހައްޔަރުކުރި ހަތަރު މީހުން ވެސް ދޫކޮށްލައިފިއެވެ.
ފުލުހުން "ސަން"އަށް މައުލޫމާތު ދެމުން ބުނީ ރޭ ހިޔާ ފުލެޓުން ފޭރުނު މައްސަލައާ ގުޅިގެން ފުލުހުންގެ ބެލުމުގެ ދަށަށް ގެންދިޔަ ހަތަރު މީހުންވެސް ދޫކޮށްލައިފައިވާ ކަމަށެވެ.
ރޭ ހަތަރު މީހުންގެ ގުރޫޕަކުން ވަނީ، ހިޔާ ފްލެޓެއް ކުއްޔަށް ދޭ ކަމަށް ބުނެ މީހަކު ގެންގޮސް އެ މީހާގެ އަތުން ފޭރިފައެވެ. އަދި އެ އަނިޔާ ލިބުނު މީހާ ފަހުން ބަޔަކު ގޮވައިގެންގޮސް އެ ހަތަރު މީހުން އަތުލައިގަނެ ވަނީ ބަރަހަނާ ކޮށްފައެވެ.
ފުލުހުން މީގެ ކުރިން ބުނީ އެ މައްސަލައިގައި ހައްޔަރުކުރީ ހަތަރު ދިވެހީން ކަމަށާއި އޭގެ ތެރޭގައި ހިމެނެނީ 32 އަހަރުގެ ދެ ފިރިހެނުންނާއި 36 އަހަރުގެ ފިރިހެނަކާއި 45 އަހަރުގެ ފިރިހެނެއް ކަމަށެވެ.
މީގެ ކުރިން، ހިޔާ ސަރަހައްދުގައި އަންހެނުންތަކެއް ދަޅަދައްކައިގެން ފޭރުނު މައްސަލައެއް ވެސް ފެންމަތިވިއެވެ.
ފޭރުމާއި ރަހީނުކުރުމުގެ މައްސަލަތައް ވެސް މިފަހުން ވަނީ ފެންމަތިވެފައެވެ. އެކަމަށް ސަމާލުވާން ފުލުހުން ވަނީ މީގެ ކުރިންވެސް އިލްތިމާސްކޮށްފައެވެ.