ހުޅުމާލޭ ދެވަނަ ފިޔަވަހީގެ ހިޔާ ފްލެޓެއް ކުއްޔަށް ދޭ ކަމަށް ބުނެ މީހަކު ގެންގޮސް ފޭރުނު ހަތަރު މީހުން އެހެން ބައެއްގެ އަތުންވެސް ފޭރިފައި ވާކަމަށް ދިވެހި ފުލުހުންގެ ޚިދުމަތުން ބުނެފިއެވެ.
ރޭ ހަތަރު މީހުންގެ ގުރޫޕަކުން ވަނީ ހިޔާ ފްލެޓުގެ ކޮޓަރިއެއް ކުއްޔަށް ދޭ ކަމަށް ބުނުމުން އެ ތަން ބަލަން ދިޔަ މީހެއް ބަރަހަނާކޮށް ފޭރިފައެވެ. އެ އަނިޔާ ލިބުނު މީހާ ފަހުން ބަޔަކު ގޮވައިގެންގޮސް އެ ހަތަރު މީހުން އަތުލައިގަނެ ވަނީ ބަރަހަނާ ކޮށްފައެވެ.
ފުލުހުން ބުނީ މި މައްސަލައާ ގުޅިގެން މައުލޫމާތު ސާފުކުރުމުން އެ ހަތަރު މީހުން އެހެން މީހެއްގެ އަތުންވެސް އެކިފަހަރު މަތިން ގިނަ އަދަދުތަކުން ފައިސާ ފޭރިފައި ވާކަމަށް މައުލޫމާތު ލިބިފައި ވާކަމަށެވެ.
މިކަން ކޮށްފައި ވަނީ ހަތަރު ދިވެހީން ކަމަށާއި އޭގެ ތެރޭގައި ހިމެނެނީ 32 އަހަރުގެ ދެ ފިރިހެނުންނާއި 36 އަހަރުގެ ފިރިހެނަކާއި 45 އަހަރުގެ ފިރިހެނެކެވެ. މި ހަތަރު މީހުންވެސް މިހާރު ހައްޔަރު ކޮށްފައިވާ ވާކަމަށް ފުލުހުން ވަނީ ބުނެފައެވެ.
މިކަމާއި ގުޅިގެން އިތުރަށް ކުރަންޖެހޭ ތަހުގީގުތައް ފުލުހުން ދަނީ ކުރަމުންނެވެ.
މީގެ ކުރިން، ހިޔާ ސަރަހައްދުގައި އަންހެނުންތަކެއް ދަޅަދައްކައިގެން ފޭރުނު މައްސަލައެއް ވެސް ފެންމަތިވިއެވެ. އެ މައްސަލާގައި ވެސް ވަނީ ބަޔަކު ހައްޔަރުކޮށްފައެވެ.