ރާއްޖޭގެ މާލީ ހާލަތު ބެލުމަށް ފިނޭންސް މިނިސްޓަރު ޑރ. މުޙައްމަދު ޝަފީގް ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރު ކުރުމަށް އެ ކޮމިޓީން މިއަދު ނިންމައިފިއެވެ.
މިއަދު ކުރިއަށް ދިޔަ އެ ކޮމިޓީގެ ބައްދަލުވުމުގައި، ރާއްޖޭގެ މާލީ ހާލަތު ދެނެގަތުމަށް ހުށަހެޅުއްވީ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙުމަދު ނާޒިމެވެ.
އެގޮތުން، މިހާރު މާލީ ގޮތުން ރާއްޖެ އޮތް ހާލަތު އެ ކޮމިޓީން ވަރަށް ރަނގަޅަށް ދެނެގަންނަން ޖެހޭ ކަމަށާއި އެކަމާ ގުޅުން ހުރި ސާފު މައުލޫމާތު ދެއްވުމަށް މިނިސްޓަރު ހާޒިރު ކުރުމަށް ފެނިވަޑައިގަންނަވާ ކަމަށް ނާޒިމް ވިދާޅުވިއެވެ.
މިއަދުގެ މާލިއްޔަތު ކޮމިޓީގެ ބައްދަލުވުމުގެ ތެރެއިން --- ފޮޓޯ/ މަޖިލިސް
"މިހާރު މާލީ ހާލަތު އޮތް ގޮތް އަޅުގަނޑުމެން އެބަޖެހޭ ވަރަށް ރަނގަޅަށް ދެނެގަންނަން، ސާފުކުރަން، އެހެންވީމަ އަޅުގަނޑު އެންމެ ފުރަތަމަ ކަމަކަށް ކޮމިޓީގެ ހުރިހާ މެންބަރުންވެސް ތިއްބަވައިގެން ކޮމިޓީއަށް ތެދު ސައްހަ މައުލޫމާތު ދެއްވުމަށް ފިނޭންސް މިނިސްޓަރަށް ދަންނަވަން އަޅުގަނޑަށް ފެނޭ،" ނާޒިމް ފާހަގަކުރެއްވިއެވެ.
މާމިގިލި ދާއިރާގެ މެންބަރު ގާސިމް އިބްރާހީމް މުގައްރިރަކަށް އިންނެވި ކޮމެޓީން މިނިސްޓަރު ހާޒިރު ކުރަން ފާސްކުރީ އިއްތިފާގުންނެވެ.
މިދިޔަ މާޗް މަހުގެ ތެރޭގައި އެމްއެމްއޭއިން ބުނީ ދައުލަތުގެ މާލީ ހާލަތު ފެންނަން އޮތީ ރަނގަޅަށް ކަމަށާއި ނަމަވެސް އަދިވެސް ގޮންޖެހުންތަކެއް އެބަހުރި ކަމަށެވެ.
މިގޮތުން، އެމްއެމްއޭއިން މީގެކުރިން ބުނީ މި ވަގުތަށް އޮތް އެންމެ ބޮޑު އެއް ގޮންޖެހުމަކީ ބޭރު ފައިސާގެ ސެކިއުރިޓީ ދެމެހެއްޓުން ކަމަށެވެ.