މިއުޒިކް އިންޑަސްޓްރީގެ އެންމެ މަގުބޫލު ތަރީންގެ ތެރޭގައި ހިމެނޭ ޖެނިފާ ލޮޕޭޒް (ޖޭލޯ) އަށް ފާޑުކިޔުންތަކެއް އަމާޒުވެފައިވާ ދަނޑިވަޅެއްގައި އޭނާގެ ޓުއާތައް ކެންސަލު ކޮށްލައިފިއެވެ.
"ލަވް ޑޯންޓް ކޯސްޓް އަ ތިންގް"އާއި "އޮން ދަ ފްލޯ" ފަދަ ބޮޑެތި ހިޓުތަކާ އެކު މަގުބޫލުކަން ހޯދި ލަވަކިޔުންތެރިޔާ ޖޭލޯއަކީ އެތައް ޒުވާނުންނެއް ބޮޑުވަމުން އައިއިރު އަޑު އަހައި އުޅުން ލަވަކިޔުންތެރިޔެކެވެ. އެތައް އަހަރެއް ވަންދެއް ޖޭލޯއަށް މުޅި ދުނިޔޭގެ އެކި ކަންކޮޅުތަކުގައި ލޯބި އޮތެވެ. ނަމަވެސް، އެ ލޯބި މިހާރު ފޫއްސަށް ބަދަލުވެއްޖެކަން ސޯޝަލް މީޑިއާއިން އެނގެއެވެ.
އެކި ސަބަބުތަކާއެކު ޖޭލޯއަށް އޮތް ލޯބި ގެއްލި މިހާރު އޭނާ ދެކެ ފޭނުންވެސް ތިބީ ރުޅި އައިސްފައެވެ. އެކަން ވަނީ މި ފާއިތުވި ތިން މަހެއްގެ ތެރޭގައި ވަރަށް ބޮޑަށް އިތުރުވެފައެވެ.
ޖޭލޯ ވަނީ މިއަހަރު ކުރީ ކޮޅުގައި އޭނާގެ އާ އަލްބަމް އިއުލާނު ކުރުމުގެ ތެރޭގައި ޓުއާއެއް ވެސް އިއުލާނު ކޮށްފައެވެ. އެމެރިކާގެ އެކި ކަންކޮޅުތަކުގެ އިތުރުން ޔޫރަޕުގެ ބައެއް ގައުމުތަކުގައި ވެސް ޓުއާ ކުރާނެ ކަމަށް ޖޭލޯ ހާމަކުރިއެވެ.
އެއަށްފަހު ދާދިފަހުން ސޯޝަލް މީޑިއާގައި ޖޭލޯ ބުނީ ޓުއާ މިވަގުތު ބޭއްވެން ނެތް ކަމެވެ. އަދި އެކަމާ ވަރަށް ހިތާމަ ކުރާ ކަމަށް ޖޭލޯ ފާހަގަކުރިއެވެ.
ޖޭލޯ ބުނިގޮތުގައި ޓުއާ ކެންސަލު ކުރުމަށް ނިންމާފައިވަނީ އާއިލާއާއެކު ވަގުތު ހޭދަކުރުމަށް ބޭނުންވާތީއެވެ. ނަމަވެސް އެއަށްފަހު އިތުރު ސަބަބެއް ދީފައެއް ނުވެއެވެ.
ޖޭލޯގެ ޓުއާއަށް ޓިކެޓު ގަތް ފޭނުންގެ ޓިކެޓު ރީފަންޑު ކޮށްދޭނެ ކަމަށް އޭނާ ވަނީ ހާމަކޮށްފައެވެ.
ޖޭލޯގެ މުޅި ކެރިއަރުގައި ވެސް އެކި ކަހަލަ ކޮންޓްރޮވާސީތައް ވަނީ އޭނާއަށް ރައްދުވެފައެވެ. ނަމަވެސް، އޭނާގެ އެންމެ ފަހުގެ އަލްބަމްއާ އެކު އެ ހުރިހާ ކަމެއް ވަނީ އަނެއްކާ އަލުން ފެންމަތިވެފައެވެ.
ޖޭލޯ އަލަށް ނެރުނު އަލްބަމަކީ އޭނާ އަމިއްލައަށް ލިޔެ ޑައިރެކްޓުކޮށް އުފައްދައި ފިލްމަކާ އެކު ރިލީޒްކުރި އަލްބަމެކެވެ. ނަމަވެސް، އެއިން އެއްވެސް ލަވައެއް ކަމުނުދާ ކަމަށް އެތައް ބަޔަކު ބުނަމުން އައިއިރު އޭނާގެ ހުރިހާ ހުނަރެއް ގުޅިފައިވަނީ ކުރީގެ ލަވަކިޔުންތެރިއެއް ކަމަށްވާ އާލިއާއާ ކަމަށް ބުނެ ފާޑުކިޔަން ފެށީ އެހާ ހިސާބުންނެވެ.
އާރުއެންބީ ލަވަކިޔުންތެރިޔާ އާލިޔާގެ ސާމްޕަލްތަކަކާއި އޭނާގެ ވޯކަލްތައް ބޭނުންކޮށްގެން އަމިއްލަ ކެރިއަރެއް އުފެއްދި ކަމަށް ބުނެ ތަފާތު ތުހުމަތުތަކެއް ޖޭލޯއަށް ވަނީ ރައްދުކޮށްފައެވެ. އެ ސަބަބާ ހުރެ އަމިއްލަ އެއްވެސް ހުނަރެއް ނުހުންނަ ތަރިއެއްގެ ގޮތުގައި ޖޭލޯ ވަނީ ލޭބަލްވެފައެވެ.