ޑިޒްނީއިން އެންމެ ފަހުން ނެރުނު އާ ކެރެކްޓާތަކުގެ ތެރޭގައި ހިމެނޭ "މޮއާނާ"ގެ ދެވަނަ ބަޔަކީ މި އަހަރު ޑިޒްނީން ނެރޭނެ އެންމެ ކާމިޔާބު ފިލްމަށްވާނެ ކަމަށް އެނަލިސްޓުން ލަފާކޮށްފިއެވެ.
އަންނަ މަހު 27 ގައި ޕްރިމިއާ ކުރުމަށް ހަމަޖެހިފައިވާ މޮއާނާގެ ދެވަނަ ބަޔަކީ 2016 ވަނަ އަހަރު ނެރުނު ފުރަތަމަ ފިލްމުގެ ހާދިސާތަކަށް ފަހު އެއާ ގުޅިގެން ކަންތައް ވާ ގޮތްތައް ދައްކަައިދޭ ފިލްމެއްކަން ޓްރެއިލާއިން ދައްކައެވެ.
މޮއާނާގެ ދެވަނަ ބައި ނެރެނީ އެމެރިކާގެ ބޮޑު ޗުއްޓީއަކާ ދިމާކޮށެވެ. އެއާ ގުޅިގެން މި ފިލްމު ބޮކްސް އޮފީހުގައި ބޮޑު ކާމިޔާބީއެއް ހޯދާނެ ކަމަށް އެނަލިސްޓުން ލަފާ ކުރެއެވެ. އެގޮތުން، އެމެރިކާ މި ފިލްމު 100 މިލިއަން ޑޮލަރާ އެކު ޕްރިމިއާ ކުރާނެ ކަމަށް ވަނީ ލަފާކޮށްފައެވެ.
އެ އާމްދަނީގެ އޯޕެނިންއަށް މޮއާނާއަށް ލިބިއްޖެ ނަމަ މި ފިލްމު ވެގެން ދާނީ މި ދުވަސްވަރު އަޅުވާ އެންމެ ބޮޑު އޯޕެނިން އަށެވެ. މި ރިކޯޑު މީގެ ކުރީން ގާއިމު ކޮށްފައިވެސް އޮތީ ޑިޒްނީ އިންނެވެ. އެއީ، ޑިޒްނީއިން މިހާތަނަށް ނެރުނު އެންމެ ކާމިޔާބު އެނިމޭޓެޑް ފިލްމު "ފްރޯޒެން" އެވެ. ފްރޯޒެންގެ ދެވަނަ ފިލްމަށް ވަނީ 92 މިލިއަން ޑޮލަރުގެ އޯޕެނިން އެއް ލިބިފައެވެ. ނަމަވެސް، މޮއާނާ ލަފާކުރަނީ މި ރިކޯޑު މުގުރާލުމަށެވެ.
މޮއާނާގެ އާމްދަނީގެ ލަފާ ކުރުންތަކަށް ބަލާއިރު މިއީ މި އަހަރު ޑިޒްނީއަށް ނެރެވޭ އެންމެ ކާމިޔާބު ފިލްމަށްވުން އެކަށީގެންވެއެވެ.
މޮއާނާގެ ދެވަނަ ބައިގެ މުހިއްމު ރޯލުތަކަށް އަޑު އަޅާފައިވަނީ ޑްވޭން ރޮކް ޖޯންސަންއާއި އޯލީ ކަރަވާލޯއާއި ނިކޯލް ޝާޒިންގާ އެވެ.