ބްރަސަލްސް (26 މޭ 2024): ހަނގުރާމައިގެ ޖަރީމާއާއި ގަތުލުއާންމު ހިންގުމުގެ ކުށުގައި އިސްރާއީލުގެ އިސްވެރިން ހައްޔަރުކުރުމުގެ އަމުރެއް ނެރެދިނުމަށް ބައިނަލްއަގުވާމީ ޖިނާއީ ކޯޓު (އައިސީސީ)ން އެދިފައިވާ މައްސަލައިގައި ޔޫރަޕްގެ އިއްތިހާދު (އީޔޫ)ގެ ބައެއް ގައުމުތަކުން އެ ކޯޓަށް އިންޒާރުދީ އެ ކޯޓުގެ ފަނޑިޔާރުންނަށް ބިރުދައްކަމުން ގެންދާތީ އެކަން އެ އިއްތިހާދުން ކުށްވެރިކޮށްފިއެވެ.
ޔޫރަޕްގެ އިއްތިހާދުގެ ޚާރިޖީ ކަންތައްތަކާ ބެހޭ ވެރިޔާ ޖޯސެޕް ބޮރެލް ވިދާޅުވި ގޮތުގައި ޔޫރަޕްގެ ގައުމުތަކަކީ ބައިނަލްއަގުވާމީ މުމައްސަސާތަކަށް އިހުތިރާމުކޮށް އެ މުއައްސަސާތަކުން ނެރޭ ގަރާރުތަކާއި އަމުރުތަކަށް ކިޔަމަންވެ އެކަން ތަންފީޒު ކުރުމަށް އެހެން ގައުމުތަކަށް ބާރުއަޅައި ނަސީހަތްތެރިވަމުން ގެންދާ ގައުމުތަކަކަށްވާއިރު އައިސީސީން އިސްރާއީލުގެ ވެރިން ހައްޔަރުކުރުމުގެ އަމުރަކަށް އެދުމުން އެ ކަމާ ދެކޮޅަށް ޔޫރަޕްގެ މަދު ގައުމުތަކެއް ނަމަވެސް ތެދުވުމަކީ މުޅި ޔޫރަޕް ލަދުގަންނަންޖެހޭ ކަމެކެވެ.
މިގޮތަށް ޔޫރަޕްގެ ގައުމުތަކުން އަމަލުކުރާނަމަ ޔޫރަޕަށް ދުނިޔޭގެ އެހެން ގައުމުތަކަށް ނަމޫނާ ދެއްކިދާނެތޯ ބޮރެލްވަނީ ސުވާލުކުރައްވާފައެވެ.
ހަނގުރާމައިގެ ޖަރީމާއާއި ގަތުލުއާންމު ހިންގުމުގެ ކުށުގައި އިސްރާއީލުގެ އިސްވެރިން ހައްޔަރުކުރުމުގެ އަމުރެއް ނެރެދިނުމަށް އައިސީސީގެ ޕްރޮސެކިއުޓަރު އެކޯޓުގެ ފަނޑިޔާރުންގެ ކިބައިން އެދިވަޑައިގަތުމުން ޔޫރަޕްގެ މަދު ގައުމުތަކަކުން ވަނީ އެ ކަމާ ދެކޮޅަށް އިސްރާއީލުގެ ދިފާއުގައި ވާހަކަދައްކައި އެ ކޯޓަށް ބިރުދެއްކުމުގެ މޭރުމަކުން ބަޔާންތައް ދީފައެވެ.
މި މައްސަލައިގައި އިސްރާއީލުގެ ޖަރީމާތައް ދިފާއުކޮށް ބައިނަލްއަގުވާމީ ކޯޓަށް ގޮންޖަހައި ވާހަކަދެއްކި ޔޫރަޕްގެ ގައުމުތަކުގެ ތެރޭގައި އިނގިރޭސިވިލާތާއި އޮސްޓްރިޔާ އަދި އިޓަލީ ހިމެނެއެވެ.
ޔޫރަޕްގެ ގައުމަކަށްނުވި ނަމަވެސް ހުޅަނގުގެ އެންމެ ބޮޑު ބާރުކަމަށްވާ އެމެރިކާއިން ވެސް ވަނީ އިސްރާއީލުގެ ޖަރީމާތައް ދިފާއުކޮށް ބައިނަލްއަގުވާމީ ކޯޓަށް ބިރުދެއްކުމުގެ މޭރުމަކުން ވާހަކަދައްކާފައެވެ. އަދި، އެމެރިކާގެ ކޮންގްރެސްގެ ހަރުކަށި ބައެއް މެންބަރުންވަނީ ބައިނަލްއަގުވާމީ ކޯޓު (އައިސީސީ)ގެ ޕްރޮސެކިއުޓަރާއި އެ ކޯޓުގެ ފަނޑިޔާރުންނާ ދެކޮޅަށް އެމެރިކާއިން ދަތިކުރުމުގެ ފިޔަވަޅުތައް އެޅުމަށް ވެސް އެމެރިކާ ސަރުކާރުގެ ކިބައިން އެދިފައެވެ.
އައިސީސީގެ ޕްރޮސެކިއުޓަރާއި އެ ކޯޓުގެ ބައެއް ފަނޑިޔާރުން ވެސް ވަނީ އެމެރިކާއާއި ޔޫރަޕްގެ ބައެއް ގައުމުތަކުގެ ބައެއް މަސްއޫލުވެރިން އެ ބޭފުޅުންނަށް ބިރުދެއްކުމުގެ މެސެޖްތައް ފޮނުވަމުންދާ ކަމަށް ވިދާޅުވެ، ކަންބޮޑުވާކަން ހާމަކުރައްވައި ވާހަކަދައްކަވާފައެވެ.
ޔޫރަޕްގެ އިއްތިހާދުގެ ޚާރިޖީ ކަންތައްތަކާބެހޭ ވެރިޔާ ޖޯސެޕް ބޮރެލް ވިދާޅުވި ގޮތުގައި ޔޫރަޕަށް މިއަދު އޮތީ ދެގޮތުންކުރެ އެއްގޮތް ގަބޫލުކުރުމެވެ. ފުރަތަމަ ގޮތަކީ އިސްރާއީލުގެ ޖަރީމާތައް ދިފާއުކޮށް ބައިނަލްއަގުވާމީ ކޯޓަށް ގޮންޖެހުމުގެ ހުތުރު އަމަލުތަކާގެން ކުރިއަށް ދިޔުމެވެ. ދެވަނަ ގޮތަކީ އިސްރާއީލަށް ވެސް އަދި އެހެން ގައުމަކަށް ވެސް ނުބަލައި ހަމައާއި އިންސާފަށް ބަލައިގެން ބައިނަލްއަގުވާމީ ނިޒާމު ދެމެހެއްޓުމެވެ. އަދި، ބައިނަލްއަގުވާމީ ކޯޓާއި މުއައްސަސާތަކަށް އިހުތިރާމްކުރުމެވެ.
ބައިނަލްއަގުވާމީ ކޯޓާއި މުއައްސަސާތަކަށް އިހުތިރާމުނުކޮށްފި ނަމަ ދުނިޔޭގައި މިހާރު މި އޮތް ނިޒާމު ރޫޅި ދުނިޔެއަކީ ހަމައެއް ލަމައެއްނެތް ޖަންގަލީގެ ނިޒާމު އޮންނަ ތަނަކަށް ބަދަލުވެގެންދާން މާ ގިނަ ދުވަހެއް ނުނަގާނެ ކަމަށް ވިދާޅުވެ، ބޮރެލް ޔޫރަޕްގެ ގައުމުތަކަށް އިންޒާރުދެއްވިއެވެ.