ހުޅުމާލު ދެވަނަ ފިޔަވަހީގެ އަތިރިމަތީގައި ހަދައިފައި ހުރި ހަޓުތައް ނަގަން ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)އިން ދީފައިވާ މުއްދަތު އަނެއްކާވެސް އިތުރުކޮށްފިއެވެ.
މިދިޔަ އަންގާރަ ދުވަހު އެޗްޑީސީން ވަނީ، ހުޅުމާލެ ދެވަނަ ފިޔަވީގެ ރުއްގަނޑު ތިނެއްގެ ބީޗް ސަރަހައްދުގައި އަމިއްލަ ފަރާތްތަކުން ހަދާފައިވާ ހަޓުތަކާއި އެތަނުގައި ބަހައްޓާފައިވާ ތަކެތި މި މަހުގެ 30ގެ ކުރިން ނަގަން އަންގާފައެވެ.
ނަމަވެސް މިރޭ ނެރުނު އިއުލާނެއްގައި އެ މުއްދަތު ވަނީ އަންނަ މަހުގެ 15އާ ހަމައަށް އިތުރުކޮށްފައެވެ.
އެ ކޯޕަރޭޝަނުން ބުނީ އެ ސަރަހައްދުގައި ވަގުތީ ހަޓުތަކެއް ޖަހައިގެން އަމިއްލަ ގޮތުން ވިޔަފާރިކުރަމުންދާތީ، އެކަމާ ގުޅޭ ގޮތުން ގިނަ ބައެއްގެ ޝަކުވާ ލިބެމުން އަންނަ ކަމަށެވެ.
"ގިނަ ރައްޔިތުންގެ ކަންބޮޑުވުންތަކަށް ރިއާޔަތްކޮށް، މި ސަރަހައްދު އިތުރަށް ތަރައްގީކޮށް ވަސީލަތްތައް ގާއިމް ކުރުމަށް މި ކޯޕަރޭޝަނުން ދަނީ މަސައްކަތް ކުރަމުން. އަދި މި ސަރަހައްދު ތަރައްގީކޮށް ނިމުމުން، ކަނޑައެޅޭ އުސޫލެއްގެ ދަށުން ވިޔަފާރިތަކަށް އަލުން ހުޅުވާލާނެ،" އެޗްޑީސީން ބުންޏެވެ.
ހުޅުމާލޭ ދެވަނަ ފިޔަވަހީގެ ބީޗް ސަރަހައްދުގައި ހަދާފައިވާ ހަޓްތައް-- ފޮޓޯ/ އެޗްޑީސީ
އެޗްޑީސީން ވަނީ އެ ހަޓުތައް ނަގައި ބަދަލުކުރާނެ ތަނެއް މިދިޔަ ހޮނިހިރު ދުވަހު ދައްކާފައެވެ. އެގޮތުން ހުޅުމާލޭ ދެވަނަ ފިޔަވަހީގެ ބީޗު ސަރަހައްދު ތަރައްގީކުރަން ރޭވިފައިވާތީ، އެ ސަރަހައްދުގައި ހަދާފައިވާ ހަޓުތައް ޖެހިގެން އޮތް ހުސް ސަރަހައްދަށް ބަދަލުކުރަން އެ ކޯޕަރޭޝަނުން ވަނީ ބުނެފައެވެ.
އެޗްޑީސީން މީގެ ކުރިން ބުނީ، ދެވިފައިވާ މުއްދަތުގައި އެ ތަކެތި ނަގާފައި ނުވާނަމަ، އެ ކޯޕަރޭޝަނުން ތަކެތި ނަގައި އެ ސަރަހައްދު ސާފުކުރުމުގެ މަސައްކަތް ކުރިއަށް ގެންދާނެ ކަމަށެވެ. އަދި ސާފުކުރުމުގެ މަސައްކަތުގެ ތެރެއިން ތަކެއްޗަށް ލިބޭ ގެއްލުމަށް އެ ކޯޕަރޭޝަނުން ޒިންމާ ނުވާނެކަމަށް ވެސް އެޗްޑީސީން ބުންޏެވެ.
ހުޅުމާލޭގެ ދެވަނަ ފިޔަވަހީގެ ބީޗް ސަރަހައްދަކީ ހަޓުތައް ހަދައި، އެކިއެކި ވިޔަފާރީގެ ބޭނުމަށް ގިނަ އަދަދެއްގެ މީހުން ބޭނުންކުރާ ތަނެކެވެ. ނަމަވެސް އެ ސަރަހައްދަކީ އަދި ތަރައްގީކުރުމުގެ މަރުހަލާގައި އޮތް ސަރަހައްދަކަށް ވާތީއާއި، ވަސީލަތްތައް ގާއިމްވެފައި ނުވާތީ އެފަދަ މަސައްކަތްތައް ކުރުމުން ގިނަ ދަތިތަކެއް ކުރިމަތިވާ ކަމަށް އެޗްޑީސީން ބުންޏެވެ.