މި ސަރުކާރުން ތެލެސީމިއާ ޕޭޝެންޓުން މަދުކުރުމަށާއި މި ބަލި ކޮންޓްރޯލް ކޮށް މެނޭޖު ކުރަން މަސައްކަތް ކުރާނެ ކަމަށް ހެލްތު މިނިސްޓްރު ޑރ. އަބްދުﷲ ޚަލީލު ވިދާޅުވެއްޖެއެވެ.
މިއަދު މުޅި ދުނިޔޭގައި ފާހަގަކުރާ ތެލެސީމިއާ ދުވަހާ ގުޅިގެން މިނިސްޓަރު ޚަލީލް އެކްސްގައި ކުރެއްވި ޕޯސްޓެއްގައި ވިދާޅުވީ، މި ބަލި ތަހަންމަލް ކުރާ އެންމެންނަށް އެންމެ އެދެވިގެންވާ ފަރުވާ ފޯރުކޮށްދިނުމަށް މަސައްކަތް ކުރައްވާނެ ކަމަށެވެ.
އަދި މި ސަރުކާރުން މަސައްކަތް ކުރާނީ ތެލެސީމިއާ ޕޭޝަންޓުން މަދުކޮށް، ބަލި ކޮންޓްރޯލް ކުރުމަށާއި ވަކިވަކި ފަރުދުންނަށް ރަނގަޅު ސިއްހީ ފަރުވާ ފޯރުކޮށްދިނުމަށް ކަމަށް ވެސް ޚަލީލް ވިދާޅުވިއެވެ.
ތެލެސީމިއާގެ ފަރުވާ ހޯދާ ކުދިންނަށް މި ސަރުކާރުން ޚާއްސަ އަހަންމިއްޔަތުކަމެއް ދޭނެ ކަމަށް ރައީސް ޑރ. މުހައްމަދު މުއިއްޒު މީގެ ކުރިން ވެސް ވިދާޅުވިއެވެ. އެގޮތުން މި ސަރުކާރުން ވަނީ ތެލެސީމިއާ ކުދިންނަށް ޚާއްސަ ހޮސްޕިޓަލެއް ގާއިމް ކުރަން މަސައްކަތް ފަށާފައެވެ.
މި ސަރުކާރުން ވަނީ ހިލޭ ބޯންމެރޯ ހަދަން ތެލެސީމިއާ ފަސް ޕޭޝަންޓުން ރާއްޖޭން ބޭރަށް ފޮނުވާފައެވެ. އަދި ތެލަސީމިއާ ކުދިންގެ އިނާޔަތް ދިނުމަށް މި އަހަރުގެ ބަޖެޓުގައި ހިމެނިފައި ނެތް ނަމަވެސް އަންނަ އަހަރުގެ ބަޖެޓުގައި ހިމަނައިގެން އެ ފައިސާ ދޭން ފަށާނެ ކަމަށް ވެސް ރައީސް ވިދާޅުވިއެވެ.
މޯލްޑިވިއަން ބްލަޑް ސާވިސަސްގެ ތަފާސްހިސާބުތަކުން ދައްކާގޮތުގައި ރާއްޖޭގައި 659 ތެލެސީމިއާ ޕޭޝަންޓުން އުޅެއެވެ.