ސަރުކާރުގެ ޚަރަދުގައި ބޯންމެރޯ ޓްރާންސްޕްލާންޓް ހަދަން ރާއްޖޭން ބޭރަށް ދިޔަ ހަ ކުއްޖަކު ފަރުވާއަށް ފަހު އެނބުރި ގައުމަށް އަތުވެއްޖެއެވެ.
މޯލްޑިވިއަން ބްލަޑް ސާވިސަސް އިން އެކްސްގައި ކުރި ޕޯސްޓެއްގައި ބުނީ، އެތަނުގެ އެހީގައި ބޯންމެރޯ ޓްރާންސްޕްލާންޓް ހެދުމަށް ފޮނުވި ހަ ކުއްޖަކު ފަރުވާއަށް ފަހު އެނބުރި ރާއްޖެއަށް އައިސްފައިވާ ކަމަށެވެ.
އެކަމަކީ ތެލެސީމިއާ ކުދިންނަށް އިތުރު ފަރުވާ ހޯދައިދޭން ކުރާ މަސައްކަތް ހާމަވާ ކަމެއް ކަމަށް ބްލަޑް ސާވިސަސްއިން ބުނެފައިވެއެވެ.
ބޯންމެރޯ ޓްރާސްޕްލާންޓަށް ފަހު އެނބުރި ރާއްޖެއަށް އައިސްފައި ވަނީ މިދިޔަ އަހަރު ތެރޭގައި ފަރުވާއަށް ފޮނުވި ހަ ކުދިންނެވެ.
މީގެ ކުރިން ބޯންމެރޯ ކްރޮސްމެޗް ޓެސްޓަކީ ވަރަށް ދަތި ހާލުން ހެދޭ އެއްޗެކެޗެވެ. އެގޮތުން، ބޯންމެރޯ މެޗްކުރުމަށް ހަދާ ޓެސްޓު ވެސް ޑޯނާއާއި ބަލިމީހާ ރާއްޖޭން ބޭރަށް ގޮސްގެން ނޫނީ ނުހެދެއެވެ. އެހެން ނަމަވެސް ރައީސް ޑރ. މުޙައްމަދު މުޢިއްޒުގެ އިސްނެންގެވުމުގެ މަތީން މިހާރު ރާއްޖޭގައި ތިބެގެން އެ ޓެސްޓް ހެދޭނެ އިންތިޒާމް ވަނީ ސަރުކާރުން ހަމަޖައްސާފައެވެ.
އޭގެއިތުރުން، ތެލެސީމިއާގެ ފަރުވާ ހޯދާ ކުދިންނަށް މި ސަރުކާރުން ޚާއްސަ އަހަންމިއްޔަތުކަމެއް ދޭނެ ކަމަށް ރައީސް ޑރ. މުހައްމަދު މުއިއްޒު މީގެ ކުރިން ވެސް ވިދާޅުވިއެވެ. އެގޮތުން މި ސަރުކާރުން ވަނީ ތެލެސީމިއާ ކުދިންނަށް ޚާއްސަ ހޮސްޕިޓަލެއް ގާއިމް ކުރަން މަސައްކަތް ފަށާފައެވެ.