ސަރުކާރުގެ އެހީގައި ބޯންމެރޯ ޓްރާންސްޕްލާންޓް ހަދަން ރާއްޖެއިން ބޭރަށް ފޮނުވި 14 ކުދިންގެ ތެރެއިން ތިން ކުއްޖަކު ފަރުވާ ފުރިހަމަކޮށްފައިވާ ކަމަށް މޯލްޑިވިއަން ބްލަޑް ސާވިސަސް (އެމްބީއެސް)އިން ބުނެފިއެވެ.
ދައުލަތުގެ މީޑިއާގެ 'ރާއްޖެ މިއަދު' ޕްރޮގްރާމްގައި ވާހަކަދައްކަވަމުން އެމްބީއެސްގެ އެސޯސިއޭޓް ސްޕެޝަލިސްޓް އިން ޕީޑިއަޓްރިކްސް ޑރ. އަހުމަދު އުމަރު ވިދާޅުވީ މިއަހަރުގެ މިހާތަނަށް 14 ކުއްޖަކު، ޒަކާތު ފަންޑުގެ ދަށުން ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާފައިވާ ކަމަށެވެ. އަދި އޭގެ ތެރެއިން ތިން ކުއްޖެއްގެ ބޯންމެރޯ ޓްރާންސްޕްލާންޓް ކާމިޔާބުވެފައިވާ ކަމަށް ޑރ. އުމަރު ވިދާޅުވިއެވެ.
އޭގެ ތެރެއިން ދެ ކުދިން ފަރުވާ ފުރިހަމަކޮށް، ރާއްޖެއިން ބޭރުގައި ފަރުވާއަށް ހޭދަކުރަންޖެހޭ މުއްދަތު ނިންމާ މިހާރު ރާއްޖެ އަތުވެއްޖެ ކަމަށް އޭނާ ވިދާޅުވިއެވެ. އަދި ތިންވަނަ ކުއްޖާ ދެ ހަފުތާތެރޭ ރާއްޖެއަށް އަންނާނެ ކަމަށް ވިދާޅުވިއެވެ.
ނަމަވެސް އެ 14 ކުދިންގެ ތެރެއިން އެއް ކުއްޖަކު ނިޔާވެފައިވާ ކަމަށް ޑރ. އުމަރު ވިދާޅުވިއެވެ.
"ހިތާމަޔާއެކު ފާހަގަކޮށްލަން އަޅުގަނޑުމެން ފޮނުވި އެއް ކުއްޖަކު ނިޔާވެފަ ވެސްވޭ ދާދިފަހުން. މިދިޔަ ހަފުތާތެރޭ. ބާކީ ތިބި ކުދިންގެ ތެރެއިން ފަރުވާ ހޯދާ އެހެން ކުދިންގެ އެއްވެސް ކޮމްޕްލިކޭޝަންއެއް އަދި އޮތް ކަމަކަށް މައުލޫމާތު ލިބިފައެއް ނެތް،" ޑރ. އުމަރު ވިދާޅުވިއެވެ.
ޒަކާތު ފަންޑުގެ އެހީގައި ކޮންމެ އަހަރަކު 10 ކުދިން، ބޯންމެރޯ ހެދުމަށް ފޮނުވުމަށް ސަރުކާރުން ވަނީ ނިންމާފައެވެ.
ޑރ. އުމަރު ވިދާޅުވީ މިހާރު ކުރަމުންދާ މަސައްކަތަކީ 2025ވަނަ އަހަރު ސަރުކާރުގެ އެހީގައި ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާނެ ކުދިން ކަނޑައެޅުމުގެ މަސައްކަތް ކަމަށެވެ.
ބޯންމެރޯ ހެދުމަށް ތެލެސީމިއާ ޕޭޝަންޓުން ކަނޑައަޅާއިރު ބަލާނެ މިންގަނޑުތަކެއް ހުންނާނެކަން ފާހަގަކުރައްވާ ޑރ. އުމަރު ވިދާޅުވީ އޭގެ ތެރެއިން ގިނަ ޓެސްޓުތަކެއް ހަދާނެ ކަމަށެވެ. އަދި ބޯންމެރޯއަށް ފޮނުވާ ކުދިން ކަނޑައަޅާއިރު، ބޯންމެރޯ ކާމިޔާބުވާނެ ކަމަށް ބޮޑަށް ބެލެވޭ ކުދިންނަށް ސަމާލުކަން ދޭނެކަމަށް އޭނާ ވިދާޅުވިއެވެ.
މި ސަރަހައްދުގައި ނިސްބަތުން އެންމެ ގިނަ ތެލެސީމިއާ ބަލި މީހުން ތިބީ ދިވެހިރާއްޖޭގައެވެ.
އެގޮތުން ތެލަސީމިއާ ޕޭޝަންޓުންގެ ދަފުތަރުގައި 959 ފަރާތެއް މިވަގުތު ތިބިއިރު އޭގެ ތެރެއިން މިވަގުތު ދުނިޔޭގައި ތިބީ 666 މީހުންނެވެ. އެއީ ރާއްޖޭގެ މުޅި އާބާދީގެ 16.6 ޕަސަންޓު މީހުންނެވެ.
ޑރ. އުމަރު ވިދާޅުވި ގޮތުގައި އަހަރެއްގެ ތެރޭ 25 ކުދިން ތެލަސީމިއާ ކުދިންގެ ގޮތުގައި ދަފުތަރުވަމުން އައި ނަމަވެސް މިހާރު އެ އަދަދު 20އިން ދަށަށް ގެނެވިފައިވާ ކަމަށެވެ. އެގޮތުން މިއަހަރުގެ މިހާތަނަށް 14 ކުދިން ދަފުތަރުވެފައިވާ ކަމަށް އޭނާ ވިދާޅުވިއެވެ.
ރާއްޖޭގައި ތެލެސީމިއާ ކޮންޓްރޯލް ކުރުމަށް ދިހަ އަހަރު ދުވަހުގެ މާސްޓާ ޕެލޭނެއް މިހާރު ވަނީ އެކުލަވާލައިފައެވެ. މި ޕްލޭން އެކުލަވާލައިފައި ވަނީ މިއަހަރުން ފެށިގެން 2034ވަނަ އަހަރުގެ ނިޔަލަށެވެ.