ޓެލްއަވީވު (5 މެއި 2024): ޣައްޒާގެ އާންމުންނާ ދެކޮޅަށް ކޮންމެ ދުވަހަކު އިސްރާއީލު ހިންގާ ގަތުލުއާންމުތަކާއި ހަނގުރާމައިގެ ޖަރީމާތަކާއި ނަސްލު ނައްތާލުމުގެ ޖަރީމާތައް ކަވަރުކުރާ ހަމައެކަނި ނިއުސް ޗެނެލްކަމަށްވާ ގަތަރުގެ އަލްޖަޒީރާ ޗެނެލް މަނާކުރަން ޔަހޫދީ އިސްރާއީލުން ނިންމައިފިއެވެ.
އިސްރާއީލުގެ ހަނގުރާމައިގެ ކެބިނެޓްގެ އިއްތިފާގުން މިއަދު ނިންމާފައިވަނީ އިސްރާއީލުގެ އެތެރޭގައާއި އިސްރާއީލުން ވެރިވެގެންފައިވާ ފަލަސްތީނުގެ ސަރަހައްދުތަކުގައި އަލްޖަޒީރާ ޗެނެލް މަނާކުރުމަށެވެ. ޚަބަރުތައް ކަވަރު ކުރުމުގެ ފުރުސަތު އެޗެނެލަށް ނުދިނުމަށެވެ.
ޣައްޒާގެ އާންމުންނާ ދެކޮޅަށް ކޮންމެ ދުވަހަކު އިސްރާއީލު ހިންގާ ގަތުލުއާންމުތަކާއި ހަނގުރާމައިގެ ޖަރީމާތަކާއި ނަސްލު ނައްތާލުމުގެ ޖަރީމާތަކާއި އޭގެ ހަގީގަތް، ޔަހޫދީ މަހުޖަނުން ކޮންޓްރޯލްކުރާ ހުޅަނގުގެ މެއިންސްޓްރީމް މީޑިއާތަކުން ކަވަރެއް ނުކުރެއެވެ.
އިސްރާއީލުގެ އަނިޔާވެރިކަމުގެ ޚަބަރުތައް ފަތުރަން ބީބީސީއާއި ސީއެންއެންފަދަ ޔަހޫދީ މަހުޖަނުން ކޮންޓްރޯލްކުރާ ހުޅަނގުގެ މީޑިއާތައް ވަރަށް ބޮޑަށް ފަސްޖެހެއެވެ. ފަހަތު ފަޔަށް ބުރަވެއެވެ. އަދި ފަލަސްތީނުގެ މައްސަލައިގެ ހަގީގަތް އޮޅުވާލުމަށް އެމީޑީއާތަކުން ކެނޑިނޭޅި މަސައްކަތް ކުރެއެވެ.
ހުޅަނގުގެ މީޑިއާތަކުން ފަލަސްތީނުގެ މިނިވަންކަމުގެ ޖިހާދު ސިފަކުރަނީ ޓެރަރިޒަމްގެ ގޮތުގައެވެ. އަދި ފަލަސްތީނުގެ މިނިވަންކަމާ ދެކޮޅަށް އިސްރާއީލު ހިންގާ ސްޓޭޓް ޓެރަރިޒަމްގެ އަމަލުތަކާއި ފަލަސްތީނުގެ އާންމުން މެރުމާއި ހޮސްޕިޓަލްތަކަށާއި އާންމުންގެ ގެދޮރަށް ބޮންއަޅައި އެތައް ހާހަކުން އާންމުން މެރުމަށް އިސްރާއީލުން ހިންގާ ލާއިންސާނީ ޖަރީމާތަކާއި ގަތުލުއާންމުތަކަކީ އަމިއްލަ ނަފުސުގެ ދިފާއުގައި އިސްރާއީލު ކުރާކަންކަންކަމަށް ސިފަކޮށް ހަގީގަތް އޮޅުވާލުމަށް ޔަހޫދީން ކޮންޓްރޯލްކުރާ ހުޅަނގުގެ މީޑިއާތަކުން މަސައްކަތް ކުރެއެވެ.
ޣައްޒާގެ އައްނާސިރު ހޮސްޕިޓަލާއި އައްޝިފާ ހޮސްޕިޓަލުގެ ގޯތިތެރޭގައި އިސްރާއީލުން 400 އެއްހާ މީހުން މަރައި އެމީހުން ބޮޑެތި ކަށްވަޅުތަކުގައި ވަޅުލާފައިވާ ޖަރީމާތައް ފަޅައި އެރުމުންވެސް ޔަހޫދީން ކޮންޓްރޯލްކުރާ ހުޅަނގުގެ މީޑިއާ ތަކުން ގެންދަނީ އެކަމަށް މާބޮޑު ސަމާލުކަމެއް ދިނުމަށް ފަސްޖެހެމުންނެވެ.
މިއާ ޚިލާފަށް އަލްޖަޒީރާއިން ގެންދަނީ އިސްރާއީލުގެ މިޖަރީމާތައް ވަރަށް ބޮޑަށް ކަވަރުކުރަމުންނެވެ. އިސްރާއީލުގެ އަނިޔާވެރިކަމާއި އެއަނިޔާވެރިކަމަށް ހުޅަނގުގެ ބާރުތަކުން ދޭ އެހީތަކާއި އެއްބާރުލުން ދުނިޔެއަށް ހާމަކުރަމުންނެވެ.
އަދި ފަލަސްތީނު މައްސަލައިގެ އަސްލަކީ އިސްރާއީލުން ފަލަސްތީނުގެ ބިންތައް ގަދަބާރުން ހިފައި އެބިންތަކަށް ވެރިވެގަތުމާއި ފަލަސްތީނުގެ ރައްޔިތުން އެމީހުންގެ އަމިއްލަ ވަޒަނުން ބޭރުކޮށްލުންކަން އަލްޖަޒީރާއިން ގެންދަނީ ވަރަށް ރަނގަނޅަށް ބުނެދީ ފަލަސްތީނު މައްސަލައިގެ ހަގީގަތް ދުނިޔެއަށް ހާމަކުރަމުންނެވެ. މިސަބަބުތަކަށްޓަކައި ޔަހޫދީ އިސްރާއީލުން އަލްޖަޒީރާ މަނާކުރަން މަސައްކަތްކުރާތާ އެތައް މަހެއް ވެއްޖެއެވެ.
ދާދިފަހުން އިސްރާއީލުގެ ޕާލަމެންޓުންވަނީ އަލްޖަޒީރާ މަނާކުރުމުގެ ބާރު އިސްރާއީލުގެ ސަރުކާރަށް ލިބިދޭ ގާނޫނެއްވެސް ފާސްކޮށްފައެވެ. ހަގީގަތް ހާމަކުރާތީ އިސްރާއީލުންވަނީ އަލްޖަޒީރާގެ އެތައް މުރާސިލަކު ޣައްޒާއާއި ހުޅަނގު އައްސޭރީގައި މަރާލާފައެވެ. އަދި އަލްޖަޒީރާގެ މުރާސިލުންނަށް ބިރުދެއްކުމަށްޓަކައި އިސްރާއީލުންވަނީ އަލްޖަޒީރާގެ އެތައް މުރާސިލެއްގެ އާއިލާތައްވެސް މަރާލާފައެވެ. މީގެތެރޭގައި އަލްޖަޒީރާގެ މުރާސިލުންގެ މައިން ބަފައިންނާއި އަނބިދަރިން ހިމެނެއެވެ.