ހުޅުމާލޭ ފަޅު ތެރޭގައި އޮތް ޑްރެޖަރެއްގައި މަސައްކަތް ކުރަނިކޮށް، އަނިޔާވެގެން ބިދޭސީއަކު މިއަދު މަރުވެއްޖެއެވެ.
މި ހާދިސާ ހިނގާފައިވަނީ ހުޅުމާލޭ ފަޅުތެރޭގައި މިއަދު ހެނދުނު 10:38 އެހާކަންހާއިރެވެ.
ފުލުހުން ބުނީ، ހުޅުމާލޭ ފަޅުގައި އޮތް ޑްރެޖަރެއްގައި މަސައްކަތް ކުރަމުންދިޔަ ބިދޭސީއަކަށް އަނިޔާވެގެން ހުޅުމާލޭ ހޮސްޕިޓަލަށް ގެންދިޔައިރު ވެސް އެ މީހާ މަރުވެފައިވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށެވެ.
މި ހާދިސާގައި މަރުވެފައިވަނީ އުމުރުން 30 އަހަރުގެ އިންޑިއާއަށް ނިސްބަތްވާ ފިރިހެނެކެވެ.
މި ހާދިސާއާ ގުޅިގެން ބަލަން ޖެހޭ ކަންކަން ފުލުހުން ބަލަމުން އަންނަ ކަމަށް މީޑިއާ އޮފިޝަލް ވިދާޅުވިއެވެ.
ރާއްޖޭގައި އެފަދަ މަސައްކަތްތައް ކުރާއިރު، މަސައްކަތްތެރިންގެ ރައްކާތެރިކަން އެންމެ ފުރިހަމަ ގޮތެއްގައި ކަށަވަރުނުކުރެވޭ ކަމަށް ބުނެ މީހުން އަބަދު ވެސް ކަންބޮޑުވުން ފާޅުކުރެއެވެ. މި ފަދަ ހިތާމަވެރި ހާދިސާތައް މީގެ ކުރީން ވެސް ހިނގާފައި އެބަހުއްޓެވެ.