ދިވެހިރާއްޖޭގެ މިނިވަންކަމުގެ ދިފާއުގައި އަމިއްލަ ފައިމައްޗަށް ތެދުވަންޖެހޭކަން ހާމަކޮށްދެއްވައި އެ ކަމަށް މަސައްކަތްކޮށްދެއްވި މޭސްތިރިއަކީ ރައީސް ޑރ. މުޙައްމަދު މުއިއްޒުކަމަށް ޗީފް އޮފް ޑިފެންސް ފޯސް ލެފްޓިނަންޓް ޖެނެރަލް އަބްދުއްރަހީމް އަބްދުއްލަތީފް މިރޭ ވިދާޅުވެއްޖެއެވެ.
އޭނާ މިފަދައިން ވިދާޅުވީ މިރޭ ނ. މާފަރު އިންޓަނޭޝަނަލް އެއާޕޯޓުގައި އެމްއެންޑީއެފްގެ އެއާކޯގެ ޚިދުމަތާއި ޔޫއޭވީ ސިފައިންގެ ޚިދުމަތް ތައާރަފްކުރުމަށް ބޭއްވި ޚާއްސަ ރަސްމިއްޔާތުގައި ވާހަކަދައްކަވަމުންނެވެ.
ޗީފް ވިދާޅުވީ ރާއްޖޭގައި އެންމެ ފުރަތަމަ ވައިގެ މަގުން އަސްކަރީ ޚިދުމަތް ފެށުނީ 1974ވަނަ އަހަރެވެ. އެއިރު އުފެދުނު އެއާކްރާފްޓް ސެކްޝަން ފަހުން އުވައިލުމަށްފަހު 2009ވަނަ އަހަރު އަލުން އެއާ ވިންގެއް އަސްކަރިއްޔާގައި އުފައްދައި ކޯސްޓްގާޑުގެ ބެލުމުގެ ދަށުން ހިންގި ކަމަށް ވިދާޅުވިއެވެ.
ނަމަވެސް، ވައިގެ ޚިދުމަތުގެ ތާރީޚެއް އޮތް ނަމަވެސް އޭގެ ތެރެއިން ގިނަ ދުވަހު މި ޚިދުމަތް ދެމުން އައި ބޭރުގެ ފަރާތްތަކަށް ބަރޯސާވެގެން ކަމަށް ޗީފް ވިދާޅުވިއެވެ.
އެއާ ޚިލާފަށް އަމިއްލަ ފައިމައްޗަށް ތެދުވެ، ރާއްޖޭގެ އަމިއްލަ މިނިވަންކަން، ދިވެހީން އަމިއްލައަށް ހިމާޔަތްކުރުމުގެ ވިސްނުންފުޅު ގެންގުޅުއްވީ ރައީސް ޑރ. މުއިއްޒުކަމަށް ޗީފް އޮފް ޑިފެންސް ފޯސް ވިދާޅުވިއެވެ.
ޗީފް އޮފް ޑިފެންސް ފޯސް ލެފްޓިނަންޓް ޖެނެރަލް އަބްދުއްރަހީމް އަބްދުއްލަތީފާއި ރައީސް ޑރ. މުއިއްޒު -- ފޮޓޯ/ ރައީސް އޮފީސް
"މި ގޮތުން ބަދަލުކުރުމުގެ ސިޔާސަތަކާއެކު ދިވެހި ގައުމުގެ ދިފާއުގައި ދިވެހިން އަމިއްލައަށް ފައިމައްޗަށް ތެދުވާންޖެހޭނެކަމަށް ވިދާޅުވެ ދިވެހި އަސްކަރިއްޔާގައި އެއާކޯ އުފެއްދެވުމުގެ އެންމެ އިސް މޭސްތިރިއަކީ އިއްޒަތްތެރި ކޮމާންޑާ އިން ޗީފް. ޒަމާނީ ވަސީލަތްތަކާއެކު ޔޫއޭވީ ހޯއްދަވައިދެއްވައި ސިފައިންގެ އަސްކަރީ ގާބިލުކަމް މިއަދު މިވަނީ އެތައް ގުނައެއް މައްޗަށް ޖައްސަވައިދެއްވައިފައި،" މިއީ ގައުމީ ސަލާމަތަށް ލިބިގެންދާ ވަރަށް ބޮޑު ކުރިއެރުމެއްކަން ފާހަގަކުރައްވައި، ޗީފް އަބްދުއްރަހީމް ވިދާޅުވިއެވެ.
އެއާއެކު ޗީފް ވިދާޅުވީ ދިވެހި އަސްކަރިއްޔާއަށް ހޯއްދަވައިދެއްވާ ވަސީލަތްތަކުގެ ބޭނުން އެންމެ ފުރިހަމަ ގޮތުގައި ހިފަައި، ރާއްޖޭގެ މިނިވަންކަމާއި އިސްތިގުލާލާއި އިސްލާމްދީން ހިމާޔަތްކޮށްދޭނެ ކަމަށެވެ.
އަދި އެކަމުގައި އެއްވެސް ފަސްޖެހުމެއްނެތި ކޮންމެ ސިފައިންގެ މީހަކު ވެސް ދެމިހުންނާނެކަމުގެ ޔަގީންކަން ދިވެހި ރައްޔިތުންނަށާއި ރައީސުލްޖުމްހޫރިއްޔާއަށް އަރުވާކަމަށް ޗީފް ވިދާޅުވިއެވެ.
ޗީފް ވިދާޅުވީ މިރޭ ފެށި އެއާކޯގެ ޚިދުމަތާއެކު ރާއްޖޭގެ ސަރަހައްދާއި، ރާއްޖޭގެ އިގްތިޞާދީ ލޭނާރު ބިނާވެފައި އޮތް ކަނޑުފަޅުގެ ސަރަހައްދު ހިމާޔަތްކޮށް، ރައްކާތެރިކަމާއި ސަލާމަތް ކަށަވަރު
"ރެއާއި ދުވާލު ހުއްޓުމެއްނެތި ރާއްޖެ ބެލެހެއްޓުމުގެ ގާބިލްކަން ސިފައިންނަށް ލިބިގެންދިއުމަކީ ދިވެހި ކާބަފައިންގެ އެއުރެންގެ ލެޔާއި ފުރާނައިން މި ގައުމަށް ޓަކައި ވެވަޑައިގެންނެވި ގުރުބާނީގެ ހައްގުގައި ވެސް އެޅިގެންދިޔަ ވަރަށް ހަރުދަނާ ފިޔަވަޅެއް. އަދި މިއިީ މިނިވަންކަމުގެ ރަމްޒުކަމުގައި ރަތާއި، ފެއްސާއި ހުދުގެ އައުދާނަ ދިދައަށް މިނިވަންކަމާއެކު ވިހުރިލާން ލިބޭ ހިތްވަރާއި ބާރެއް،" ޗީފް ވިދާޅުވިއެވެ.
ހަމައެއާއެކު މި ކަމުން ހާމަވަނީ ދިވެހީންގެ ކިބައިގައި ދިވެހި ގައުމު ހިމާޔަތްކުރުމުގެ ހިތްވަރާއި ގާބިލްކަން ހުރިކަން ކަމަށް ވެސް ޗީފް ވިދާޅުވިއެވެ.