ސީދާ ރައީސް ޑރ. މުޙައްމަދު މުއިއްޒަށް ސުވާލާއި ކަންބޮޑުވުންތަކާއި ޝަކުވާ ހުށަހެޅުމަށް ޚާއްސަ ޕޯޓަލް މިރޭ އިފްތިހާހުކޮށްފިއެވެ.
މިރޭ އޮތް އަހާ ފޯރަމުގެ ތެރެއިން މި ޕޯޓަލް އިފްތިތާހުކޮށްދެއްވީ ރައީސް ޑރ. މުޙައްމަދު މުއިއްޒެވެ.
"ރައްޔިތުންގެ އަޑު"ގެ ނަމުގައި އުފެއްދި މި ޕޯޓަލް މެދުވެރިކޮށް ސުވާލު ފޮނުވޭނީ އީފާސް މެދުވެރިކޮށް ލޮގިންވެގެންނެވެ. މިރެއިން ފެށިގެން އެ ޕޯޓަލް ލައިވްވާނެއެވެ.
މީގެ 18 ދުވަސް ކުރިން ރައްޔިތުންގެ މަޖިލީހުގައި ރިޔާސީ ބަޔާން އިއްވަވަމުން ރައީސް ވަނީ ސީދާ އެ މަނިކުފާނަށް ސުވާލު ފޮނުވޭނެ ނިޒާމެއް ގާއިމްކުރައްވާނެ ކަމަށް ވިދާޅުވެފައެވެ.
ރައްޔިތުންގެ އަޑު --
މިރޭ ޕޯޓަލް އިފްތިތާހުކޮށްދެއްވުމަށްފަހު ވާހަކަފުޅުދައްކަވަމުން ރައީސް ވިދާޅުވީ ކެމްޕޭން ތެރޭގައި ވެސް އެ މަނިކުފާނު ދެންނެވި އެއް ވާހަކައަކީ ރައްޔިތުންނާ ގާތުން މަސައްކަތްޕުޅުކުރައްވަން ބޭނުންފުޅުވެވަޑައިގަންނަވާކަން ކަމަށެވެ.
މި ޕޯޓަލާއެކު އެ ކަމަށް ފަހިވާނެ ކަމަށް ވެސް ރައީސް ވިދާޅުވިއެވެ.
"ރައްޔިތުންގެ ޚާދިމެއްގެ ގޮތުގައި ހުރެގެން މަަސައްކަތް ކުރެވެންޏާ އަޅުގަނޑާ ރައްޔިތުންނާ ގާތުން މަސައްކަތް ކުރަން މަގުތައް ފަހިކުރަން ޖެހޭނެ. ބޭނުންވޭ އެ ގޮތަށް ކުރަން،" ރައީސް ވިދާޅުވިއެވެ.
ސިލްސިލާކޮށް ކުރިއަށް ގެންދާ އަހާ ފޯރަމަކީ ވެސް ރައްޔިތުންނާ ގާތުން، ރައްޔިތުންގެ ޚިޔާލާއި މަޝްވަރާއާއެކު ސަރުކާރު ހިންގުމުގެ ބޭނުމުގައި ކުރިއަށް ގެންދާ ފޯރަމެއްކަމަށް މީގެ ކުރިން ސަރުކާރުން ވަނީ ބުނެފައެވެ.
ހަމައެއާއެކު "ރައީސްގެ ޖަވާބު"ގެ ނަމުގައި މިހާރު ވެސް ކޮންމެ ދުވަހަކު ވީޑިއޯ ކްލިޕެއްގެ ޒަރީއާއިން ރައީސް ގެންދަވަނީ އާންމު ރައްޔިތުންގެ ސުވާލަށް ޖަވާބު ދެއްވަމުންނެވެ.
މީގެ އިތުރުން މިހާރު ވެސް އެ މަނިކުފާނު ގެންދަވަނީ ރާއްޖޭގެ ހުރިހާ އަތޮޅަކަށް ދަތުރުފުޅު ކުރައްވައި، ހުރިހާ ރަށެއްގެ ކައުންސިލުތަކާ ވެސް ބައްދަލުކުރެއްވުމަށް ޚާއްސަ ދަތުރުފުޅެއް ކުރައްވަމުންނެވެ.
ދެފުށް ފެންނަ ހާމަކަން ބޮޑު ސަރުކާރެއް ހިންގުމަކީ ރައީސްގެ އެއް ވައުދުފުޅެވެ.