ރާއްޖޭގައި އިންޑިއާ ޕައިލެޓުން އޮޕަރޭޓުކުރާ، އެ ގައުމުން ރާއްޖެއަށް ހަދިޔާކުރި ވައިގެ އުޅަނދުތައް ވަކި ހާލަތްތަކެއްގައި އަލުން އޮޕަރޭޓުކުރުމާ ގުޅޭގޮތުން އެއްބަސްވުމަކާ ހަމައަށް އާދެވިފައިވާކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީން މިއަދު ބުނެފިއެވެ.
އިންޑިއާއާއި، ރާއްޖޭގެ އިސްވެރިންގެ މައްޗަށް އެކުލެވޭ މަތީފަންތީގެ ކޯ ގްރޫޕުގައި މަޝްވަރާކުރަނީ ރާއްޖޭގައި ތިބި އިންޑިއާގެ ސިފައިން ރާއްޖެއިން ބޭލުވުމާ ގުޅޭގޮތުންނެވެ.
އެ މަޝްވަރާތަކުގެ ދެވަނަ ބައްދަލުވުން އޮތީ މިއަދު އިންޑިއާގައެވެ.
ދިވެހި ސަރުކާރުން ބުނީ ރާއްޖޭގައި ތިބި ހުރިހާ އިންޑިއާ ސިފައިން މޭ މަހުގެ 10ގެ ކުރިން ރާއްޖެއިން ބޭލުވުމަށް މިއަދުގެ މަޝްވަރާތަކުގައި، އިންޑިއާއިން އެއްބަސްވެފައިވާކަމަށެވެ.
މިއަދު ކުރެވުނު މަޝްވަރާތަކުގެ މައުލޫމާތު އާންމުކުރަމުން އިންޑިއާގެ އެކްސްޓާނަލް އެފެއާޒް މިނިސްޓްރީން ބުނީ، އިންޑިއާގެ ވައިގެ އުޅަނދުފަހަރު ރާއްޖޭގައި އިންސާނީ އެހީތެރިކަން ފޯރުކޮށްދިނުމަށާއި، ސިއްހީ ހާލަތްތަކުގައި މެޑިކަލް އިވެކިއުޝޭނަށް ބޭނުންކުރެވިދާނެ ގޮތަކާމެދު ދެ ގައުމުގެ ދެމެދު މަޝްވަރާކުރެވުނު ކަމަށެވެ. އަދި އެ ބޭނުންކުރާނެ ގޮތްތަކަކާމެދު އެއްބަސްވުމަކާ ހަމައަށް ވެސް އާދެވުނުކަމަށް އެކްސްޓާނަލް އެފެއާޒް މިނިސްޓްރީން ވަނީ ބުނެފައެވެ.
މީގެ އިތުރުން، ދެ ގައުމުގެ ދެމެދުގައި ހުރި މައްސަލަތަކުގެ ވާހަކައާއި، މިހާރު އޮތް ގުޅުން އިތުރަސް ހަރުދަނާކުރުމުގެ މަޝްވަރާ ވެސް ބައްދަލުވުމުގައި ކޮށްފައިވާކަމަށް ވަނީ ބުނެފައެވެ.
އޭގެ ތެރޭގައި އިންޑިއާގެ ބައިވެރިވުމާއެކު ރާއްޖޭގައި ހިންގާ މަޝްރޫތައް ކުރިއަށްގެންދިއުމުގެ މަޝްވަރާތައް ވެސް ހިމެނެއެވެ.
މިއަދުގެ ބައްދަލުވުމާ ގުޅޭގޮތުން އިންޑިއާގެ ފަރާތުން މާ ތަފްސީލީ ގޮތެއްގައި މައުލޫމާތު ހިއްސާކޮށްފައެއް ނުވެއެވެ.
މި ސަރުކާރުގެ އެންމެ ބޮޑު އެއް ވައުދަކީ ރާއްޖޭގައި ތިބި އިންޑިއާ ސިފައިން އަނބުރާ ފޮނުވައިލުމެވެ. ވައުދާ އެއްގޮތަށް ރައީސް ޑރ. މުހައްމަދު މުއިއްޒު ވަނީ މާޗު މަހުގެ 15ވަނަ ދުވަހުގެ ކުރިން އިންޑިއާ ސިފައިން އަނބުރާ ގެންދަން އެ ގައުމުގެ ސަރުކާރުގައި އެދިވަޑައިގެންފައެވެ.