ރާއްޖޭގެ އިގުތިސާދީ ސަރަހައްދުގައި މަސްވެރިކަން ކުރަނިކޮށް ދިވެހި ދޯންޏަކަށް ބޭރު ސިފައިން އަރައި، އެމީހުން ދޯންޏަށް އެރި ކަމުގެ ހެކި މަސްވެރިންގެ ފޯނުތަކުން ނައްތާލަން މަސައްކަތް ކޮށްފައިވާ ކަމަށް ބޮޑުކަންނެލި މަސްވެރިންގެ ޔޫނިއަނުން މިއަދު ބުނެފިއެވެ.
ބޮޑުކަންނެލި މަސްވެރިންގެ ޔޫނިއަންގެ ރައީސް ހުސައިން ނަޝީދު "ސަން"އަށް ވިދާޅުވީ، އެ މައްސަލަ ދިމާވީ ހއ. އިހަވަންދޫ "މާހޯރަ 3" ދޯންޏަށް ކަމަށެވެ. އެގޮތުން އެ ދޯންޏަށް ބޭރުގެ ސިފައިންތަކެއް އަރައި، އެ ގަޑީގައި މަސްވެރިން ނެގި ފޯޓާއާއި ވީޑިއޯ ޑިލީޓް ކުރުވި ކަމަށް އޭނާ ވިދާޅުވިއެވެ.
ނަޝީދު ވިދާޅުވީ އެތާ ކައިރި އޮތް، އދ. މަހިބަދުއަށް ނިސްބަތްވާ އަސުރުމާ-3އަށް ވެސް ސިފައިން އެރި ނަމަވެސް، އެ މީހުން އަތުން ވީޑިއޯ އަދި ފޮޓޯ ޑިލީޓް ކުރަން މަޖުބޫރު ކޮށްފައިނުވާކަމަށެވެ.
ރާއްޖޭގެ ކަނޑުގެ ސަރަހައްދުގައި އޮއްވައި އަސުރުމާ 3 ދޯންޏަށް ބޭރު ސިފައިން އެރިކަމަށް މައުލޫމާތު ލިބިފައިވާ އެމްއެންޑީއެފުން ބުނީ އިއްޔެ މެންދުރު ފަހުއެވެ. އެއީ ކޮން ގައުމެއްގެ ސިފައިންނެއް ކަމަށް އެމްއެންޑީއެފުން ނުބުނެއެވެ.
އެ މައްސަލައާ ގުޅިގެން ކަންބޮޑުވުން ފާޅުކުރައްވައި، ފިޝަރީޒް މިނިސްޓަރު އަހުމަދު ޝިޔާމު މީގެ ކުރިން ވިދާޅުވި ގޮތުގައި އަސުރުމާ-3 ދޯންޏަށް ބޭރު ސިފައިންތަކެއް އެރީ އެ ދޯނި ހއ. ތުރާކުނުގެ އިރުމަތިން 72 މޭލު ބޭރުގައި ބޮޑުކަންނެލީގެ މަސްވެރިކަން ކުރުމުގައި ހަރަކާތްތެރިވަމުން ދަނިކޮށެވެ. އެސިފައިން އުޅަނދަށް އަރައި، މަސްވެރިންނާ ސުވާލުކުރި ކަމަށް ވެސް މިނިސްޓަރު ވިދާޅުވިއެވެ.
އިއްޔެ ބޮޑު ކަންނެލި ޔޫނިއަނުން ބުނެފައިވާ ގޮތުގައި އިއްޔެ ދިވެހި ތިން ދޯންޏަކަށް ބޭރު ސިފައިން އެރީ ހަތިޔާރާއެކުއެވެ. އަދި އެ ދޯނިން އެ މީހުން ފޭބީ ދެ ގަޑިއިރު ފަހުން ކަމަށް ވެސް އެ ޔޫނިއަނުން ބުންޏެވެ.