ރައީސް ޑރ. މުހައްމަދު މުއިއްޒު އަޒުލުކުރަން ޕާލިމެންޓްރީ ގުރޫޕް (ޕީޖީ)ން ނިންމާފައިވާ ކަމަށާއި މިހާރު އޮތް ނިންމުނަށް ބަދަލެއް ނާންނަ ނަމަ، ރައްޔިތުންގެ މަޖިލީހުގައި މިހާރު ކުރިއަށްދާ ދައުރު ނިމުމުގެ ކުރިން އެ މައްސަލަ ހުށަހަޅާނެ ކަމަށް އިދިކޮޅު އެމްޑީޕީން ބުނެފިއެވެ.
އެމްޑީޕީގެ އަޣުލަބިއްޔަތު އޮންނަ މަޖިލީހުން އިއްޔެ ތިން ވަޒީރަކަށް ރުހުން ނުދިން ނަމަވެސް، ރައީސް އެ ބޭފުޅުން އަލުން މަގާމަށް އައްޔަން ކުރެއްވުމާ ގުޅިގެން އެ ޕާޓީން ބޭއްވި ނޫސްވެރިންގެ ބައްދަލުވުމެއްގައި ޕީޖީ ލީޑަރު މުހައްމަދު ރަޝީދު ހުސައިން (ބިގޭ) ވިދާޅުވީ، ރައީސް އަޒުލު ކުރުމުގެ މައްސަލަ ހުށަހަޅަން ބޭނުންވާ ވަރަށް ވުރެ އިތުރަށް މިހާރު ސޮއި ލިބިފައިވާ ކަމަށެވެ.
"އަޅުގަނޑުމެން މިކަމާ ގުޅޭ ގޮތުން ޕާޓީ ލީޑާޝީޕް ލެވެލްގައި ވެސް މަޝްވަރާ ކުރުމަށް ފަހު މިކަން ކުރިއަށް މިގެންދަނީ، އެހެންވީމަ އެ ހުށަހެޅުން އަދި ހުށަހަޅާނީ މާދަންތޯ އަނެއް ދުވަހުންތޯ އަޅުގަނޑުމެން މިދަނީ ވަގުތާއި ހާލަތަށް ބަލާފައި، އެ ހުށަހެޅުން އަޅަން ޖެހޭ އެންމެ ރަނގަޅު ވަގުތުގައި އަޅުގަނޑުމެން ހުށަހަޅާނީ،" އޭނާ ވިދާޅުވިއެވެ.
އެ މައްސަލަ ހުށަހަޅަނީ ކޮން ތާރީޚަކުތޯ ނޫސްވެރިން ތަކުރާރުކޮށް ސުވާލުކުރުމުން ވެސް އެ ޕާޓީން ސީދާ ތާރީޚެއް ދޭން ދެކޮޅު ހެދިއެވެ.
"ޕާލިމެންޓްރީ ގުރޫޕުން އަޅުގަނޑުމެން ނިންމާ ކަންކަން އެހެން ގޮތަކަށް ބަދަލު ނުކުރާހާ ހިނދަކު އަޅުގަނޑުމެން ތަންފީޒުކުރާނަން. އެހެންވީމަ އަޅުގަނޑުމެންގެ މި ދައުރު ހަމަވަނީ މެއި 27 ވަނަ ދުވަހު، އޭގެ ކުރީގައި މިކަން އަޅުގަނޑުމެން ކުރިއަށްގެންދަން މިހާރު އޮތް ގޮތުންވެއްޖެއްޔާ ޖެހޭނެ،" ބިގޭ ވިދާޅުވިއެވެ.
އޭނާ ވިދާޅުވި ގޮތުގައި، އެ މައްސަލަ ހުށަހެޅުމަށް ތާއިދުކޮށް މިހާރު މެންބަރުން ގެންދަވަނީ ސޮއިކުރައްވަމުންނެވެ. އޭގެ ތެރޭގައި ސަރުކާރު ކޯލިޝަންގެ މެންބަރަކު ހިމެނިފައި ނުވި ނަމަވެސް، އެ ކޯލިޝަންގެ މެންބަރުންތަކެއް ވެސް ސޮއިކުރަން ޝައުގުވެރިކަން ފާޅުކޮށްފައިވާ ކަމަށް އޭނާ ވިދާޅުވިއެވެ.
ނަމަވެސް އެ މެންބަރުންނާ ގުޅޭ ތަފުސީލެއް އެ ޕާޓީން ހާމައެއް ނުކުރެއެވެ.
"އަޅުގަނޑުމެން މިކުރާ މަސައްކަތުގައި މިހާ ތަފްސީލްކޮށް، ވަރަށް ފެށިގެން އަންނަ ވަގުތެއްގައި ހުރިހާ މައުލޫމާތެއް ހިއްސާ ކުރުމަކީ އަޅުގަނޑުމެން މިކުރާ މަސައްކަތުގައި އުނދަގޫތަކެއް ދިމާވެދާނެ ކަމަކަށްވާތީ ވަގުތާ ގުޅޭ ގޮތަށް އަޅުގަނޑުމެން އެ ވާހަކަތައް އަޅުގަނޑުމެން ތިބޭފުޅުންނާ ހިއްސާކުރަމުންދާނަން،" ބިގޭ ވިދާޅުވިއެވެ.
ރައީސް އަޒުލު ކުރުމުގެ މަސައްކަތް ފަސޭހަ ކުރުމަށް މީގެ ކުރިން އެމްޑީޕީން ވަނީ މަޖިލީހުގެ ގަވާއިދަށް އިސްލާހެއް ގެނެސްފައެވެ. އެގޮތުން އެއްވެސް ދާއިރާއެއްގެ ގޮނޑިއެއް ހުސްވެއްޖެ ނަމަ، އެ ގޮނޑިއެއް ނުލައި މަޖިލީހުގެ ޖުމުލަ މެންބަރުންގެ އަދަދު ގުނާ ގޮތަށް ގަވާއިދަށް އިސްލާހުވަނީ ގެނެސްފައެވެ.
އެހެންވެ، މިހާރު މަޖިލީހުން ރައީސް އަޒުލުކުރަން ބޭނުންވާނީ 54 މެންބަރުންގެ ވޯޓެވެ. ކުރިން ގަވާއިދު އޮތް ގޮތުން، ރައީސް އަޒުލުކުރަން 58 މެންބަރުންގެ ސޮއި ބޭނުންވާނެއެވެ.
އިދިކޮޅު އެމްޑީޕީއާއި ދަ ޑިމޮކްރެޓްސްއިން ގުޅިގެން ސަރުކާރާ ދެކޮޅަށް މަސައްކަތްކުރަން މި ފަހުން އެއްބަސްވެފައިވާއިރު، އެ ދެ ޕާޓީގައި މިހާރު 56 މެންބަރުން އެބަތިއްބެވެ. އެހެންވެ، ދެ ޕާޓީން ބޭނުންވެއްޖެ ނަމަ ރައީސް އަޒުލުކުރެވޭ ވަރަށް ވޯޓު ހަމަވާނެއެވެ.
އެ މައްސަލައިގައި، މިއަދު ބަންޑާރަނައިބުގެ އޮފީހުގެ ފަރާތުންވަނީ، ސަރުކާރާ އިދިކޮޅު މެންބަރުންނަށް އެކަނި ރައީސް އަޒުލުކުރެވޭ ގޮތަށް މަޖިލީހުގެ ގަވާއިދަށް އިސްލާހު ގެނައި މައްސަލަ، ސުޕްރީމް ކޯޓަށް ހުށަހަޅައިފައެވެ.