އިއްޔެ ރައްޔިތުންގެ މަޖިލީހުން ރުހުންނުދޭން ފާސްކުރި ތިން ވަޒީރުންނަށް ރުހުމެއް ނެތް ކަމަށާއި، އެ ބޭފުޅުން އަލުން އެ މަގާމުތަކަށް އައްޔަންކުރެއްވިދާނެތޯ ގާނޫނީ ލަފާ ހޯދަމުން އަންނަ ކަމަށް އިދިކޮޅު އެމްޑީޕީން މިއަދު ބުނެފިއެވެ.
ރައްޔިތުންގެ މަޖިލީހުން ބަންޑާރަނައިބާއި ދެ ވަޒީރަކަށް ރުހުންނުދޭން އިއްޔެ ވަނީ ފާސްކޮށްފައެވެ. އެކަމަކު، ރައީސް ޑރ. މުހައްމަދު މުއިއްޒު ވަނީ ހަމަ އެ ތިން ބޭފުޅުން އަނބުރާ އެ މަގާމުތައް އިއްޔެ އައްޔަންކުރައްވައިފައެވެ.
"ސަން"އިން ކުރި ސުވާލަކަށް ޖަވާބުދެއްވަމުން އެމްޑީޕީގެ ސީނިއާ މެންބަރު އަދި މަޖިލީހުގެ ހުޅުމާލޭ ދާއިރާގެ މެންބަރު އަލީ ނިޔާޒު ވިދާޅުވީ، އެ ބޭފުޅުން އަލުން ވަޒީރުކަމަށް އައްޔަންކުރުމަކީ ވަރަށް ބޮޑު ގާނޫނީ ބަހުސެއް އޮތް ކަމެއް ކަމަށެވެ.
އެހެންވެ، އެއީ ރައީސަށް ކުރެއްވޭނެ ކަމެއްތޯއާއި އެ ކަމުގައި ދެން އަމަލުކުރެވިދާނެ ގޮތްތަކެއް ހޯދަން ގާނޫނީ ލަފާ ހޯދަމުން އަންނަ ކަމަށް ނިޔާޒު ވިދާޅުވިއެވެ.
"އަޅުގަނޑުމެންގެ ސްޓޭންޑް ވަރަށް ސާފު ދެއްތޯ. އެ ބޭފުޅުންނަށް ރުހުން ނެތްކަން. އެ ސްޓޭންޑެއް ބަދަލެއް ނުވޭ،" އޭނާ ވިދާޅުވިއެވެ.
އޭނާ ވިދާޅުވީ، މަޖިލީހުން ރުހުން ނުދޭން ފާސްކުރި ބޭފުޅުންތަކެއް އަލުން ވަޒީރުކަމަށް އައްޔަންކުރެއްވިދާނެތޯ އެއީ ވެސް ގާނޫނީ ސުވާލެއް ކަމަށެވެ. އަދި، އެ ކަމުގައި ބަލަންޖެހޭ ބައިވަރު ކަންކަން ހުރުމުން ގާނޫނީ ލަފާ ހޯދުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވިއެވެ.
އެމްޑީޕީން އެ މައްސަލައިގައި އަމަލުކުރާނެ ގޮތެއް މަޝްވަރާ ކުރަމުން އަންނަ ކަމަށް ވެސް ނިޔާޒު ވިދާޅުވިއެވެ.
އިއްޔެ މަޖިލީހުން ރުހުންނުދިން ތިން ވަޒީރުންނަކީ:
- ބަންޑާރަނައިބު އަހުމަދު އުޝާމް
- އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު
- ބޯހިޔާވަހިކަމާ ބެހޭ ވަޒީރު ޑރ. އަލީ ހައިދަރު
އެ ތިން ބޭފުޅުންނަކީ ވެސް މަޖިލީހުގެ މެޖޯރިޓީ އޮތް އެމްޑީޕީން ރުހުންނުދޭން ނިންމާފައިވާ މެންބަރުންނެވެ.
އެކަމަކު، އިއްޔެ އިރުއޮއްސުނުއިރު ރައީސް އޮފީހުގައި އޮތް ރަސްމިއްޔާތެއްގައި ރައީސް މުއިއްޒު ވަނީ އެ ތިން ބޭފުޅުން އަލުން މަގާމަށް އައްޔަންކުރައްވައިފައެވެ. އެހެންވެ، އެ ތިން ބޭފުޅުން ވަނީ ސުޕްރީމް ކޯޓުގެ ފަނޑިޔާރު އަލްއުސްތާޛު ހުސްނުއްސުއޫދުގެ ކުރިފުޅުމަތީގައި ވަޒީރުކަމުގެ ހުވައި އަލުން ކުރައްވައިފައެވެ.