އުމުރުން 25 އަހަރުން މަތީގެ ދިވެހި އަންނެހުންނަށް ހާއްސަކޮށްގެން، ރައްޔިތުންގެ މަޖިލީހާއި ޔުނައިޓެޑް ނޭޝަންސް ޑިވޮލޮޕްމަންޓު ޕްރޮގްރާމް (ޔޫއެންޑީޕީ) ގުޅިގެން ބާއްވާ "ޕްރެކްޓިސް ޕާލަމެންޓް ފޯ ވިމެން"ގެ ހަވަނަ ޕްރޮގްރާމުގައި ބައިވެރިވުމުގެ ފުރުސަތު ހުޅުވާލައިފިއެވެ.
މި ޕްރޮގްރާމް އޮންނާނީ އަންނަ ފެބްރުއަރީ މަހުގެ 18 އިން 24ގެ ނިޔަލަށެވެ.
ޑިމޮކްރެޓިކް މަރުހަލާތަކުގައި އަންހެނުންގެ ބައިވެރިވުން އިތުރުކޮށް، މުޖުތަމައަށް ބަދަލު ގެނައުމަށް މަސައްކަތްކުރާ ބަޔަަކަށް އަންހެނުން ހެދުމަކީ މި ޕްރޮގްރާމުގެ އެއް މަގުސަދެވެ.
ހަމައެއާ އެކު، އިންތިޚާބުކުރެވޭ މަގާމުތަކަށް ވާދަކުރުމުގެ ފުރުސަތު އަންހެނުންނަށް ހޯދައިދިނުމާއި، ޤައުމުގެ ނިންމުންތައް ނިންމުމުގެ މަރުހަލާތަކުގައި އަންހެނުން އިތުރަށް ބައިވެރިކުރުމަކީ ވެސް، މި ސިލްސިލާ ޕްރޮގްރާމުގެ އަމާޒެކެވެ.
މާލޭގައި މި ޕްރޮގްރާމް ބޭއްވުނު ނަމަވެސް، މޭލެ ސަރަހައްދުން ބޭރުގައި ދިރިއުޅޭ ފަރާތްތަކަށް މާލެއަށް ދަތުރުކުރުމާއި، އެކަމާ ގުޅުންހުރި އެހީތެރިކަން އިންތިޒާމުކުރާ ފަރާތުން ފޯރުކޮށްދިނުމަށް ހަމަޖެހިފައިވެއެވެ.
ރާއްޖޭގެ އެކި ކަންކޮޅުތަކުން 250 އަށްވުރެ ގިނަ މީހުން ވޭތުވެދިޔަ ޕްރެކްޓިސް ޕާލަމެންޓުތަކުގައި ބައިވެރިވެފައިވެއެވެ. އޭގެ ތެރޭގައި، އަންހެނުންނާއި، ޒުވާނުންނާއި، ނުކުޅެދުންތެރިކަން ހުންނަ ފަރާތްތައް ހިމެނެއެވެ.
މި ޕްރޮގްރާމުގެ ތެރޭގައި މަދަނީ ތައުލީމުގެ މައިގަނޑު ކަންކަމާއި، ރައްޔިތުންގެ މަޖިލީހުގެ މުހިއްމު މަރުހަލާތަކާއި، ކަމާގުޅުންހުރި ސިޔާސަތުތަކާ ބެހޭގޮތުން ބައިވެރިންނަށް މައުލޫމާތު ދިނުން ހިމެނެއެވެ. އަދި، މަޖިލީހުގެ ޖަލްސާއެއްގެ ނަމޫނާ މާދީރީ ބާއްވައި، މަޖިލީހުގެ މަސައްކަތްތައް ކުރިއަށްދާ ގޮތް ތަޖުރިބާކުރުމުގެ ފުރުސަތު ލިބޭނެއެވެ.
މި ޕްރޮގްރާމުގައި ބައިވެރިވުމަށް ރަޖިސްޓާކުރުމަށް، ފުރިހަމަ ނަމާއި އައިޑީ ކާޑު ނަންބަރު އަދި ދިރިއުޅޭ ރަށުގެ މައުލޫމާތު ޖެހުމަށް ފަހު، ޔޫއެންޑީޕީގެ ނަންބަރު 9397651 އަށް މެސެޖުކުރަން ވަނީ އެދިފައެވެ.