އެމްޓީސީސީގެ ސީއީއޯގެ މަގާމުގައި މިދިޔަ އެމްޑީޕީގެ ވެރިކަމުގައި ހުންނެވި އާދަމް އާޒިމް، މިއަދު އޮތް މާލޭ ސިޓީ ކައުންސިލްގެ މޭޔަރު ބައި އިލެކްޝަން ކާމިޔާބުކުރައްވައިފިއެވެ.
ހުސްވެފައިވާ މާލޭ ސިޓީގެ ހުސްވެފައިވާ މޭޔަރު ކަމާއި، މާފަންނު ދެކުރު ދާއިރާ، މެދުހެންވޭރު ދާއިރާ، ހެންވޭރު ދެކުނު ދާއިރާގެ ކައުންސިލް މެންބަރު އިންތިޚާބުކުރަން ބާއްވާ ބައި އިލެކްޝަންގެ ވޯޓުލުން މިއަދު ހެނދުނު 8:00 އިން ހަވީރު 5:00 އާ ހަމައަށް ވަނީ ކުރިއަށް ގެންގޮސްފައެވެ.
ވަގުތީ ނަތީޖާތައް ދައްކާ ގޮތުން، އާޒިމް ވަނީ 7،621 ވޯޓު ހޯއްދަވައިފައެވެ. އެއީ، ވޯޓުލާން ނުކުތް 17،500 މީހުންގެ ތެރެއިންނެވެ.
މޭޔަރުކަމަށް އާޒިމްގެ އިތުރުން ވާދަކުރެއްވި ބޭފުޅުންގެ ނަތީޖާތައް:
- އާއިޝަތު އާޒިމާ ޝަކޫރު - ޕީއެންސީ - ލިބުނު ވޯޓު: 5،032
- ޝުއައިބު އަލީ (ފުރަހަނި) - އަމިއްލަ ގޮތުން - ލިބުނު ވޯޓު: 125
- ހުސައިން ވަހީދު - ޕީއެންއެފްގެ ތާއީދާއެކު އަމިއްލަ ގޮތުން - ލިބުނު ވޯޓު: 1،888
- މުހައްމަދު ސައިފް ފާތިހު - ދަ ޑިމޮކްރެޓްސް - ލިބުނު ވޯޓު: 2،336
ފާހަގަކޮށްލެވޭ ގޮތުގައި މި އިންތިޚާބުގައި ވޯޓުލާން ނުކުތް މީހުންގެ އަދަދު މަދެވެ. އެހެންވެ، އިލެކްޝަންސް ކޮމިޝަން (އީސީ)ން ވެސް މީގެ ކުރިން ވަނީ ކަންބޮޑުވުން ފާޅުކުރައްވައިފައެވެ. ވޯޓުލުމުގެ ހައްގު 54،680 މީހުންނަށް ލިބިފައިވާއިރު ވޯޓުލާން ނުކުމެފައިވަނީ 17،500 މީހުންނެވެ.
ދަނގެތިދާއިރާގެ މެންބަރު މުޙައްމަދު ނާޒިމްގެ ކޮއްކޮ އާޒިމަކީ ވަރަށް ހިންގުންތެރި ބޭފުޅެކެވެ. ނިމިދިޔަ ސަރުކާރުގެ ގިނަ ވައުދުތަކެއް ފުއްދެވުމަށްޓަކައި އެންމެ ގިނަ ޕްރޮޖެކްޓް ހިންގެވީ ސީދާ އާޒިމްގެ ބެލުމުގެ ދަށުންނެވެ. އާޒިމް އެމްޓީސީސީގައި އިސްކޮށް ހުންނަވައިގެން އެއް ފަހަރާ އެތައް މިލިއަން ރުފިޔާއެއްގެ ބޮޑެތި ޕްރޮޖެކްޓްތައް ހިންގެވިއެވެ.
އާޒިމް މީގެ ކުރިން ވަނީ އެސްޓީއޯއާއި އެމްޑަބްލިޔުއެސްސީގެ މެނޭޖިން ޑިރެކްޓަރުކަން ވެސް ކުރައްވައިފައެވެ.
މާލޭ ސިޓީގެ މޭޔަރުކަން ހުސްވެފައިވަނީ ކުރިން އެ މަގާމުގައި ހުންނެވި މިހާރުގެ ރައީސް ޑރ. މުހައްމަދު މުއިއްޒު ރިޔާސީ އިންތިޚާބު ކާމިޔާބު ކުރެއްވުމާ ގުޅިގެންނެވެ. އެ މަނިކުފާނު ވެރިކަމާ ހަވާލުވެވަޑައިގަތުމަށް ނޮބެމްބަރު 17 ގައި ވަނީ މޭޔަރުކަމުން އިސްތިއުފާ ދެއްވައިފައެވެ.
އޭގެ ފަހުން، މާލޭ ސިޓީ ކައުންސިލްގެ ތިން ދާއިރާއެއްގެ ކައުންސިލަރުން ވެސް ވަނީ ސަރުކާރުގެ ބައެއް މަގާމުތަކާ ހަވާލުވެވަޑައިގަންނަވަން މަގާމުން އިސްތިއުފާ ދެއްވައިފައެވެ.