ސައުދީ އަރަބިއާގެ އަލް ނަސްރުގެ ސެނެގާލް ތަރި ސާޑިއޯ މާނޭ ކައިވެނިކޮށްފިއެވެ.
އެފްރިކާ ކަޕް އޮފް ނޭޝަންސް (އެފްކޮން) ފެށެން ދުވަސްކޮޅަކަށް ވެފައިވަނިކޮށް، މާނޭ ކައިވެނިކޮށްފައިވަނީ އޭނާ ގިނަ ދުވަސްތަކެއް ވަންދެން ލޯބީގެ ގޮތުން ގުޅިގެން އުޅުނު އައިޝާ ޓަމްބާއާއެވެ.
މީގެ ކުރިން ލިވަޕޫލާއި ބަޔާން މިއުނިކަށް ކުޅުނު މާނޭގެ ކައިވެނި ކުރިއަށްގެންގޮސްފައިވަނީ ސެނެގާލްގެ ވެރިކަން ކުރާ ސިޓީ، ޑަކާގެ ކެއުރް މަސާގައި މިދިޔަ އާދީއްތަ ދުވަހުއެވެ. މިހާރު ސޯޝަލް މީޑިއާގައި ވެސް މާނޭގެ ކައިވެނީގެ ފޮޓޯތައް ދަނީ އާންމުވަމުންނެވެ.
މަނޭގެ ކައިވެނީގެ ފޮޓޯތައް ފުރަތަމަ އާންމުކޮށްފައިވަނީ އެ ކައިވެނި ހަފުލާގެ ފޮޓޯތައް ނެގި "މެގްވިޝަން އިވެންޓްސް"ގެ އިންސްޓަގްރާމްގައެވެ. އެ ހަފުލާގައި ބައިވެރިވެފައިވަނީ މާނޭ އާއި އައިޝާގެ އެކުވެރިންނާއި އާއިލާ މެންބަރުންގެ އިތުރުން ސެނެގާލް ޓީމުގެ ކުޅުންތެރިންނެވެ.
ޕޯޗުގަލް ތަރި ކްރިސްޓިއާނޯ ރޮނާލްޑޯއާއެކު އަލް ނަސްރަށް ކުޅޭ މާނޭ، ސެނެގާލަށް ގޮސްފައިވަނީ އެފްކޮންގައި ވާދަކުރުމަށް ގައުމީ ޓީމުގެ ފަރިތަކުރުންތަކަށެވެ. ގައުމީ ޓީމުގެ ފަރިތަކުރުންތަކާ ގުޅުމުގެ ކުރިން މާނޭ ވަނީ ސެނެގާލްގައި އޭނާގެ ހަރަދުގައި ތަރައްގީކުރި ސްޓޭޑިއަމް ވެސް ރަސްމީކޮށް ހުޅުވުމަށްފަހުއެވެ.