އާބަންކޯގެ މެނޭޖިން ޑިރެކްޓަރަކަށް ރައީސް ޑރ. މުހައްމަދު މުއިއްޒު އައްޔަންކުރެއްވި، އިބްރާހިމް ފަޒުލް ރަޝީދު އެ މަގާމަށް އައްޔަންކުރައްވާފައިވަނީ ވަޒީރު ފެންވަރުގައިކަން މިއަދު ރައީސް އޮފީހުން ހާމަކޮށްފިއެވެ.
ސަރުކާރަށް ވަނީ ވަޒީރު ފެންވަރުގައާއި ނައިބު ވަޒީރުންގެ ގޮތުގައި ވެސް ގިނަ ބަޔަކު އައްޔަންކޮށްފައެވެ.
ރައީސް އޮފީހުގެ ރަސްމީ ވެބްސައިޓުން މިހާރު ފެންނަ ގޮތުގައި، އާބަންކޯގެ މެނޭޖިން ޑިރެކްޓަރުގެ މަގާމަށް ފަޒުލް އައްޔަންކޮށްފައިވަނީ ވަޒީރު ބޭފުޅެއްގެ ފެންވަރުގައެވެ. މީގެ ކުރިން ރައީސް އޮފީހުގެ ލިސްޓުގައި ފަޒުލްގެ ނަމެއް ނެތެވެ.
ފާހަގަކޮށްލެވޭ ގޮތުގައި މިއީ ކުންފުންޏެއްގެ މެނޭޖިން ޑިރެކްޓަރުގެ މަގާމަށް ވަޒީރު ފެންވަރުގައި ބޭފުޅަކު އައްޔަންކުރެއްވި ފުރަތަމަ ފަހަރެވެ.
އާބަންކޯގެ މެނޭޖިން ޑިރެކްޓަރުކަމަށް އައްޔަންކުރެއްވުމާ ހަމައަށް ފަޒުލް ހުންނެވީ މި ހިނގާ 19 ވަނަ މަޖިލީހުގެ ފެލިދޫ ދާއިރާގެ މެންބަރުގެ ގޮތުގައެވެ. އޭގެ ކުރިން، ޕީޕީއެމްގެ ފުރަތަމަ ސަރުކާރުގައި ވެސް ފަޒުލް ވަނީ އެމްޑަބްލިއުއެސްސީގެ މެނޭޖިން ޑިރެކްޓަރުކަން ކުރައްވައިފައެވެ. އެކަމަކު، އެއީ ވަޒީރު ފެންވަރުގައެއް ނޫނެވެ.
ފަޒުލް ހިމެނޭހެން އެމްއެންޔޫގެ ޗާންސެލަރާއި އައިޔޫއެމްގެ ޗާންސެލަރު ވެސް ވަޒީރު ފެންވަރުގައި އައްޔަންކޮށްފައި --
އޭނާގެ އިތުރުން ވެސް، ކޮމިޝަނަރު އޮފް ސްޕޯޓްސްގެ ގޮތުގައި އައްޔަންކުރައްވާފައިވާ ޕީޕީއެމްގެ ކުރީގެ ސެކެޓަރީ ޖެނެރަލް މުހައްމަދު ތޮލާލް ވެސް އައްޔަންކުރައްވާފައިވަނީ ވަޒީރު ބޭފުޅެއްގެ ފެންވަރުގައެވެ. އަދި، ތޮލާލްގެ އަނބިކަނބަލުން ޝެރީނާ އަބްދުލް ސަމަދަކީ ވެސް ފޮރިން މިނިސްޓްރީގެ ސްޓޭޓު މިނިސްޓަރެކެވެ.
މީގެ އިތުރުން، ކުރިން ސްޓޭޓް މިނިސްޓަރު ފެންވަރުގައި ތިއްބަވައި ޔުނިވާސިޓީގެ ޗާންސްލެރުން ވެސް ވަނީ ވަޒީރު ބޭފުޅުންގެ ފެންވަރަށް ބަދަލުކޮށްފައެވެ. އެގޮތުން، ގައުމީ ޔުނިވާސިޓީގެ ޗާންސެލަރަކަށް އައްޔަންކުރެއްވި ޑރ. މަހުމޫދު ޝައުގީއާއި އިސްލާމިކް މިނިސްޓްރީގެ ޗާންސެލަރަކަށް އައްޔަންކުރެއްވި ޑރ. މުހައްމަދު ޒާހިރު ހުސައިން ވެސް، އެ މަގާމަށް އައްޔަންކުރައްވާފައިވަނީ ވަޒީރު ބޭފުޅެއްގެ ފެންވަރުގައެވެ.
ފާހަގަކޮށްލަންޖެހޭ ގޮތުގައި ސަރުކާރުގައި މިހާރު ވެސް ކެބިނެޓުގައި ހިމެނިވަޑައިގަންނަވާ 22 ވަޒީރުން ނުހިމެނޭހެން ވަޒީރު ފެންވަރުގައި 21 ބޭފުޅުން ތިއްބަވައެވެ.