ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ މައްސަލަ، ފީފާގެ ސަސްޕެންޝަނަކާ ހިސާބަށް ނުގޮސް ހައްލުކުރެއްވުމަށް މަސައްކަތްކުރައްވާނެ ކަމަށް ސްޕޯޓްސް ކޮމިޝަނަރު މުހައްމަދު ތޮލާލް މިއަދު ވިދާޅުވެއްޖެއެވެ.
މިމަހުގެ 31 ވަނަ ދުވަހު އެފްއޭއެމްގެ އިންތިޚާބު ބޭއްވުމަށް އެ އިދާރާއިން މަސައްކަތްކުރަމުންދާ އިރު، ސްޕޯޓްސް ކޮމިޝަނަރު ތޮލާލް ވަނީ އެ މަސައްކަތް ހުއްޓާލުމަށް އަންގަވައިފައެވެ. ނަމަވެސް މިހާތަނަށް އެފްއޭއެމުން އިންތިޚާބުގެ މަސައްކަތް މަޑުޖައްސާލައިފައެއް ނުވެއެވެ.
ކުޅިވަރާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި އެފްއޭއެމްގެ މައްސަލައާ ގުޅޭގޮތުން ވާހަކަދައްކަވަމުން ތޮލާލް ވިދާޅުވީ، އެފްއޭއެމްގެ ހިންގާ ކޮމިޓީގެ ދައުރު ހަމަވާން އަދި ހައެއްކަ މަސް އޮތް އިރު، އެކަމަށް އަވަސް އަރުވާލައިގެން އުޅެން ނުޖެހޭ ކަމަށާއި މައްސަލަތައް ހައްލުކޮށްގެން، ވީހާވެސް ބޮޑަށް އެންމެ އިންސާފުވެރިކޮށް، މަސްލަހަތު އެންމެ ފުށޫނާރާނެ ގޮތަކަށް އިންތިހާބުގެ ކަންތައްތައް ކުރިއަށްގެންދެވޭތޯ މަސައްކަތްކުރަން ޖެހޭ ކަމަށެވެ. އަދި ފީފާގެ ސަސްޕެންޝަންގެ ވާހަކައަކީ އިންތިޚާބާ ދިމާކޮށް އަބަދުވެސް އަންނަ ވާހަކައެއްކަން އޭނާ ފާހަގަކުރެއްވިއެވެ.
"ރާއްޖެއަށް އަބަދުވެސް މި ސަސްޕެންޝަންގައި އިންޒާރު އަންނަމުންދޭ. ކޮންމެ ފަހަރަކު ވެސް މި އިންތިޚާބާ ދިމާކޮށްފައި އަންނަ އެއްޗެއް އެއީ. އެހެންވީމާ މިފަހަރު ވެސް ސަސްޕެންޝަންގެ ވާހަކަ ނާންނާނެއެކޭ އަޅުގަނޑު ނުދަންނަވާނަން. އެހެންނަމަވެސް ސަސްޕެންޑު ނުވެ، އަޅުގަނޑުމެންނަށް ކުރިއަށްދެވޭތޯ އެއީ އަޅުގަނޑުމެން ކުރަން ޖެހޭނެ ކަމެއް. އަޅުގަނޑުމެން އެކަން އެގޮތަށް ކުރުމަށްޓަކައި މަޝްވަރާކުރަން ޖެހޭ ފަރާތްތަކާ މަޝްވަރާކުރަމުން ގެންދާނަން،" އޭނާ ވިދާޅުވިއެވެ.
ތޮލާލް ވިދާޅުވީ އެސޯސިއޭޝަނެއް ކަމަށްވާ ނަމަ، ރާއްޖޭގައި އަމަލުކުރަން އެ އެސޯސިއޭޝަނަކަށް ލާޒިމުކުރާ ގާނޫނުތަކާއި ގަވާއިދުތަކާއި އެސޯސިއޭޝަންގެ ހިންގާ ގަވާއިދުގެ ތެރޭގައި އެ އެސޯސިއޭޝަނެއް ހަރަކާތްތެރިވާން ޖެހޭނެ ކަމަށާއި އެއީ ވަރަށް ބޮޑަށް ބާރުއަޅާ ކަމެއް ކަމަށެވެ. އަދި އެސޯސިއޭޝަންތަކުން ވެސް ފުރިހަމަކުރަން ޖެހޭ އިޖުރާއަތުތައް ފުރިހަމަކޮށް، އެސޯސިއޭޝަންގައި ފުރިހަމަވާން ޖެހޭ ހުރިހާ ކަމެއް ފުރިހަމަވެގެން ކުރިއަށްދާ ކަމަށްވާ ނަމަ، ފީފާގެ ގަވައިދުތަކާ ހިލާފު ނުވާނެ ކަމަށް ވިދާޅުވިއެވެ.
"އަޅުގަނޑުމެންގެ ގާނޫނުތަކާއި ގަވާއިދުތަކުގައެއް ނުހުރޭ ފީފާ ނޫނީ އޭއެފްސީގެ ސްޓެޓިއުޓްސްތަކާ ހިލާފަށް ކަންކަމެއް ކުރާކަށް. އެހެންނަމަވެސް އަޅުގަނޑު ގަބޫލުކުރަން ފީފާގެ ސްޓެޓިއުޓްސްއާ ކޮމްޕްލައި ވާންޖެހޭ، އަދި އެގޮތަށް އަޅުގަނޑުމެންގެ ގާނޫނާއި ގަވާއިދާއި އެސޯސިއޭޝަންގެ ހިންގާ ގަވާއިދާ ވެސް ކޮމްޕައި ވާންޖެހޭ. ކޮމްޕްލައި ނުވާ ކަމަށްވާ ނަމަ، އެކަންކަން ރަނގަޅުކުރުމަށްޓަކައި، އެކަންކަން ބަދަލުކުރުމަށްޓަކައި ކުރަންޖެހޭ ކަންކަމަށް އިރުޝާދުދެމުން ދާނަން. ދެން މި އަންނަނީ ސަސްޕެންޝަނަކާ ހިސާބަށް ގޮސްފިއްޔާ ދެން ކިހިނެއްހޭ ހަދާނީ. އެ ހިސާބަށް ދިޔައީމާ، އެ ވާހަކަ ދައްކަން އަޅުގަނޑަށް ހީވަނީ އެންމެ ރަނގަޅު ގޮތަކީ،" އޭނާ ވިދާޅުވިއެވެ.
ތޮލާލް އިތުރަށް ވިދާޅުވީ ސަސްޕެންޝަނަކާ ހަމައަށް ގެންދަން އެސޯސިއޭޝަނުން މަސައްކަތްކުރާ ކަމަށްވާ ނަމަ، އެ އެސޯސިއޭޝަނަކަށް އެއްބާރުލުން ދޭން ކޮންމެވެސް ވަރެއްގެ ހުއްޓުންތަކެއް އަންނާނެ ކަމަށާއި އެސޯސިއޭޝަނުން ވެސް މަސައްކަތްކުރަންވީ ސަސްޕެންޝަނަކާ ހިސާބަށް ދިޔަ ނުދީ، ކަންކަން ހައްލުވެގެން، ހުރިހާ އެންމެންނަށް ބައިވެރިވެވިގެން އެންމެންގެ ކުޅިވަރެއްގެ ގޮތުގައި ކުޅިވަރު ކުރިއަށްގެންދިއުމަށްޓަކައި ކުރަންޖެހޭ ކަންކަން ކުރުމަށް ކަމަށެވެ.