ވެރިކަންކުރާ މާލޭގެ މޭޔަރުގެ ހައިސިއްޔަތުން މިއަދު ރައްޔިތުންނަށް އަމާންކަމާއި ރައްކާތެރިކަން ނެތް ކަމުގެ އިހުސާސް ކުރެވޭ ކަމަށް މާލެ ސިޓީގެ މޭޔަރު އާދަމް އާޒިމް މިއަދު ވިދާޅުވެއްޖެއެވެ.
އާޒިމް މިދަފައިން ވިދާޅުވެފައި ވަނީ ނިމިދިޔަ ސަރުކާރުގައި ރޯޑް ޑިވޮލޮޕްމެންޓް ކޯޕަރޭޝަން (އާރްޑީސީ)ގެ މެނޭޖިން ޑިރެކްޓަރުކަން ކުރެއްވި މޫސާ އަލިމަނިކު (މޫކޭ)ގެ ގެއަށް ރޭގެ ދަންވަރު ފުލުހުން ވަނުމުން އެކަމާ ކަންބޮޑުވުން ފާޅުކުރައްވައި ސޯޝަލް މީޑިއާގައި ކުރެއްވި ޕޯސްޓެއްގައެވެ.
އެ ޕޯސްޓުގައި އާޒިމް ވިދާޅުވީ މައިންނާއި ޅަދަރީން ރޭގަނޑު އަރާމުކުރާ ވަގުތު، ގޭގެއަށް ވަދެ އާއިލާގެ ނިދި ގެއްލުވާލައި ފުލުހުން ރެއިޑްތައް ހިންގުމުން، އާއިލާތައް ވައްޓާލެވެނީ ވަރަށް ބޮޑު ބިރުވެރިކަމެއްގެ ތެރެއަށް ކަމަށެވެ.
މިފަދަ ކަންކަން ހިނގާތަން ފެނުމަކީ ވަރަށް ބޮޑު މާޔޫސް ކަމެއް ކަމެއް ކަމަށް އާޒިމް ވިދާޅުވިއެވެ. އެގޮތުން މީގެ ކުރިން ވެސް މިފަދަ ކަންކަން ތަޖުރިބާކުރެވިފައި ހުރި ކަމަށް އޭނާ ފަހަގަކުރެއްވިއެވެ.
އާޒިމް ވިދާޅުވީ އަމިއްލައަށް އުފަންކުރުވާ އިންޓެލިޖެންސް ރިޕޯޓާއި ފްރޭމްކުރުމަށް ހެކި ބަހައްޓައިގެން ހިންގި ރޭޑުތަކުން އެތައް އާއިލާތަކަކަށް އަނިޔާއާއި ހިތާމައިގެ އިތުރުން ބޭއިންސާފު ލިބިފައިވާ ކަމަށެވެ. އަދި މިއަދާ ހަމައަށްވެސް މިފަދަ ބޮޑެތި ޖަރީމާތައް ހިނގި ފަރާތްތައް އިންސާފުގެ ކުރިމަައްޗަށް ގެނެވިފައި ނުވާކަމަށް ވިދާޅުވިއެވެ.
"މިފަދަ ހިތާމަވެރިކަންކަން، އަމިއްލައަށް ތަހައްމަލުކޮށްފައިވާ މީހެއްގެ ހައިސިއްޔަތުން ދަންނަވަން އޮތީ، ޤާނޫނު ތަންފީޒު ކުރައްވާ ފަރާތްތަކުގެ އަމަލުތަކުގައި ޕްރޮފެޝަނަލިޒަމް ދަމަހައްޓަވައި ދެއްވާށެވެ،" އާޒިމް ވިދާޅުވިއެވެ.
މީގެ އިތުރުން ލިބިފައިވާ ބާރު، ބަދަލު ހިފުމުގެ ވަސީލަތެއްގެ ގޮތުގައި ބޭނުންކުރުމުން ދުރުހެލިވެތިބުމަށް ފުލުންހުންގެ މުއައްސާސާއަށް އޭނާ ގޮވައިލެއްވިއެވެ.
އަދި އެ ފަދަ ކަންކަމުގެ ސަބަބުން ރާއްޖޭގެ މޭޔަރުގަ ހައިސިއްޔަތުން، މިއަދު މާލޭގެ ރައްޔިތުނަށް އަމާންކަމާއި ރައްކާތެރިކަން ނެތްކަމުގެ އިހްސާސް އިންތިހާއަށް ކުރެވޭ ކަމަށް އާޒިމް ވިދާޅުވިއެވެ.
އާޒިމް މިފަދައިން ވިދާޅުވެ ކަންބޮޑުވުން ފާޅުކުރެއްވިއިރު، ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ވެރިކަމުގައި އާޒިމްގެ އަމިއްލަފުޅު ބޭބެ، މިހާރުގެ މަޖިލިސް މެންބަރު މުޙައްމަދު ނާޒިމްގެ ގެކޮޅު ވެސް ފުލުހުން ދަންވަރު ރެއިޑުކޮށްފައިވެއެވެ.
އޭރު ނާޒިމަކީ ޑިފެންސް މިނިސްޓަރެވެ. އޭނާގެ ގެއަށް ފުލުހުން ވަދެ، ރެއިޑުކުރީ ފިސްތޯލައެއް އޭނާ ގެންގުޅުއްވާކަމަށް ބުނެއެވެ. ފުލުހުން އެ ގެއިން ނިކުތީ ފިސްތޯލައެއް ހޯދައިގެންނެވެ. އެ ނޫނަސް، ކަންބޮޑުވުންހުރި މިފަދަ ގިނަ މައްސަލަތަކެއް ޔާމީންގެ ވެރިކަމުގައި ފެންމަތިވެފައިވެއެވެ.
މީގެ އިތުރުން ކުރީގެ ރައީސް މުޙައްމަދު ނަޝީދުގެ ވެރިކަމުގައި ސިފައިން މެދުވެރިކޮށް ކްރިމިނަލް ކޯޓުގެ ކުރީގެ އިސް ގާޒީ އަބްދުﷲ މުހައްމަދު (އަބްދުﷲ ގާޒީ) ހައްޔަރު ކުރި މައްސަލަ ވެސް މި ފަދަ މައްސަލަތަކުގެ ތެރޭ ފާހަގަކޮށްލެވެއެވެ.
މޫކޭގެ ގެއަށް ދަންވަރު ފުލުހުން ވަދެ، ރެއިޑުކުރުމާ ގުޅިގެން ވާދަވެރި ގިނަ ސިޔާސީ ބޭފުޅުން އަންނަނީ ފާޑުކިޔުން ރައްދުކުރަމުންނެވެ.