ކުރިއަތް އޮތް 2028 ވަނަ އަހަރުގެ ރިޔާސީ އިންތިޚާބުގައި ރައްޔިތުން ވޯޓުދެއްވައިފި ނަމަ ސަރުކާރު ހިންގަވާނީ 10 މިނިސްޓްރީއާއި 100 ނުވަތަ 200 އެއްހައި ސިޔާސީ މަގާމު ލައިގެން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
މިދިޔަ ރިޔާސީ އިންތިޚާބުގައި ވެސް އުމަރު އަމިއްލަ ގޮތުން ވާދަކުރެއްވިއެވެ. އެކަމަކު، ލިބިވަޑައިގަތީ 6,293 ވޯޓެވެ.
ސަންގެ މި ހަފުތާގެ 'އެޑިޓަރުގެ ސުވާލު' ޕްރޮގްރާމްގައި ބައިވެރިވެވަޑައިގެން ވާހަކަދައްކަވަމުން އުމަރު ވިދާޅުވީ، ކުރިއަށް އޮތް 2028 ވަނަ އަހަރުގެ ރިޔާސީ އިންތިޚާބުގައި ވެސް އޭނާ ވާދަކުރައްވާނެ ކަމަށެވެ. އެ އިންތިޚާބަށް ވެސް ނުކުންނަވާނީ 'ހައްލަކީ އުމަރު' ސްލޯގަން ހިއްޕަވައިގެން، ކުރިން ވެސް ވަމުން އައި ވައުދުތައް ހިއްޕަވައިގެން ކަމަށް އޭނާ ވިދާޅުވިއެވެ.
"އަޅުގަނޑަށް ވަރަށް ޔަގީން އިރާދަކުރެއްވިއްޔާމުން 2028ގެ އިންތިޚާބަކީ ތަފާތު އިންތިޚާބަކަށްވާނެކަން. މިހާރު ދިވެހިން މި ދަނީ ދަސްކުރަމުން ސިޔާސީ ޕާޓީތަކަކީ ކޯޗެއްކަން،" އޭނާ ވިދާޅުވިއެވެ.
އުމަރު ނަސީރު: އޭނާ ވިދާޅުވީ، މަގާމުތަކަށް ލާނީ ގާބިލު މީހުން ކަމަށް -- ސަން ފޮޓޯ
އުމަރު ވިދާޅުވީ، މުޅި ދުނިޔޭގައި ވެސް މިހާރު ކުދި ކެންޑިޑޭޓުން ބޮޑެތި ޕާޓީތަކުގެ މައްޗަށް ކުރި ހޯދަމުން އަންނަ ކަމަށެވެ. އެހެންވެ، ރާއްޖޭގެ ރައްޔިތުންނަށް ވެސް ސިޔާސީ ޕާޓީތަކުން ކުރަނީ ކީއްކަން އެނގި، 2028 އަންނައިރު ޕާޓީތައް ދަސްވެފައި ތިބޭނެ ކަމަށް އޭނާ ގަބޫލުކުރައްވައެވެ.
"ދިވެހިރާއްޖެއިން ކޮރަޕްޝަން އަޅުގަނޑު ފުނޑުފުނޑުކޮށްލާނަން. އިސްލާމީ ޝަރީއަތުގައި ހުރި ހުކުމްތައް ކޮރަޕްޝަނާ ދެކޮޅަށް ވެސް އަންނާނެ. އިސްލާމީ ޝަރީއަތުގައި ހުރި ހުކުމްތައް މަސްތުވާއެއްޗެއްސާ ދެކޮޅަށް ވެސް އަންނާނެ. އިސްލާމީ ޝަރީއަތުގައި ހުރި ހުކުމްތައް މީހުން މެރުމާ ދެކޮޅަށް ވެސް އަންނާނެ،" އޭނާ ވިދާޅުވިއެވެ.
"... ޓެކްސްތައް ކުޑަކުރެވިގެންދާނެ. ވަރަށް ކުޑަކުޑަ ސަރުކާރަކަށް ވެގެންދާނީ،"
ކުޑަކުޑަ ސަރުކާރެއް ހިންގެވުމަކީ ނިމިދިޔަ 2023ގެ ރިޔާސީ އިންތިޚާބުގައި ވެސް އުމަރުގެ މުހިންމު ރިޔާސީ ވައުދެކެވެ. އޭނާ ގަބޫލުކުރައްވާ ގޮތުގައި، މިހާރު ސަރުކާރުތައް ހިންގަނީ އިންތިހާއަށް ބޭކާރު މުވައްޒަފުންނާއި އިދާރާތައް ހައްދަވައިގެންނެވެ.
"ކެބިނެޓުގައި 10 ވަރަކަށް 12 ވަރަކަށް ވަޒީރުން ތިބޭނީ. މުޅި ސަރުކާރު ހިންގުމުގައި ތިބޭނީ ގާތްގަނޑަކަށް ސިޔާސީ މަގާމުތަކުގައި 100، 200 އެއްހައި މީހުން،" އޭނާ ވިދާޅުވިއެވެ.
އުމަރު ވިދާޅުވީ، އެއްވެސް މަގާމަކަށް އާދައިގެ މީހުން ނުލައްވާނެ ކަމަށެވެ. އޭނާގެ ވެރިކަމެއްގައި ސިޔާސީ މަގާމުތަކުގައާއި ސަރުކާރުގެ އިސް ސަފުގައި ތިބޭނީ އެންމެ މޮޅު، އެންމެ ގާބިލު، އެންމެ ކިޔަވައިގެން ހުރި މީހުން ކަމަށެވެ.
ވެރިކަން ލިބުނު ނަމަވެސް ކޮއްކޮއިންނާއި ބޭބޭއިންނާއި އަންހެނުންނާއި ދަރިންނަށް ވަޒީފާ ނުދެއްވާނެ ކަމަށް އޭނާ ވިދާޅުވިއެވެ.
"ގާބިލުކަމާއި އެ މީހާގެ ތަޖުރިބާއާއި ތައުލީމުގެ މައްޗަށް މެނުވީ ސަރުކާރު ބިނާއެއް ނުކުރެވޭނެ. އިރާދަކުރެއްވިއްޔާ އޭގެ ސަރުކާރެއް އަޅުގަނޑު ބިނާކުރާނީ،" އޭނާ ވިދާޅުވިއެވެ.
އުމަރު ނަސީރު އެޑިޓަރުގެ ސުވާލު ޕްރޮގްރާމްގައި: އޭނާ ވިދާޅުވީ، ގާތް މީހުންނަށް ވަޒީފާތައް ނުދޭނެ ކަމަށް -- ސަން ފޮޓޯ
މިހާރު މި ހިނގާ ރައީސް ޑރ. މުހައްމަދު މުއިއްޒުގެ ސަރުކާރުގައި ފުރަތަމަ 22 މިނިސްޓްރީ އޮތެވެ. އިއްޔެ، ހައުސިން މިނިސްޓްރީއާއި ކޮންސްޓްރަކްޝަން މިނިސްޓްރީ އެއްކޮށްލުމުން މިހާރު ވެސް 21 މިނިސްޓްރީ އެބައޮތެވެ.
މި ސަރުކާރުގެ ސިޔާސީ މަގާމުތަކުގައި ތިބީ ކިތައް މުވައްޒަފުންކަން ވެސް ސަރުކާރުން ރަސްމީކޮށް ހާމަކޮށްފައެއް ނުވެއެވެ.
މިދިޔަ ރިޔާސީ އިންތިޚާބުގެ ކުރިން 2008 ވަނަ އަހަރު ބޭއްވި ފުރަތަމަ މަލްޓި ޕާޓީ ރިޔާސީ އިންތިޚާބުގައި ވެސް އުމަރު ވާދަކުރެއްވިއެވެ. އެ އިންތިޚާބުގައި އުމަރަށް ލިބިވަޑައިގަތީ 2،472 ވޯޓެވެ. އޭގެ ފަހުން، ޕީޕީއެމް އުފެއްދުމުގައި އުމަރު އިސް ދައުރެއް އަދާކުރެއްވިއެވެ. އެ ޕާޓީގެ ޓިކެޓަށް 2013 ވަނަ އަހަރުގެ ރިޔާސީ ޕްރައިމަރީގައި ވެސް ވާދަކުރެއްވިއެވެ.
އެކަމަކު، އެ ފަހަރު ޕީޕީއެމް ޓިކެޓާ އެކު ވެރިކަމަށް ވަޑައިގަތީ ކުރީގެ ރައީސް އަބްދުﷲ ޔާމީން އަބްދުލްގައްޔޫމެވެ. އެ މަނިކުފާނުގެ ވެރިކަމުގައި ހޯމް މިނިސްޓަރުކަން އުމަރަށް ދެއްވިއެވެ. ނަމަވެސް، ވަކި ހިސާބަކުން އުމަރު އަމިއްލަފުޅަށް މަގާމުން އިސްތިއުފާދެއްވިއެވެ.