ތ. އަތޮޅުން ދަތުރުކުރަމުން ދިޔަ "އެމްއާރް ސްޕީޑް" ނަމަކަށް ކިޔާ ލޯންޗެއް ދިޔަވަމުން ދަނިކޮށް އެމްއެންޑީއެފްއިން އެ ލޯންޗުގައި ތިބި 19 މީހަކު މިއަދު ސަލާމަތްކޮށްފިއެވެ.
'ސަން'އަށް މައުލޫމާތު ދެއްވަމުން އެމްއެންޑީއެފްގެ މީޑިއާ އޮފިޝަލަކު ވިދާޅުވީ، އެއީ މާލެއިން ފުރައިގެން ތ. އަތޮޅަށް ދަތުރުކުރި ލޯންޗެއް ކަމަށެވެ. އެ ލޯންޗް ތ. ބުރުނީގެ ހަތަރު ނޯޓިކަލް މޭލު ބޭރުން ދަތުރުކުރަމުންދަނިކޮށް ދިޔަވެ އަޑިއަށްދާކަމުގެ ރިޕޯޓް ލިބުނީ މެންދުރުފަހު 3:55 ހާއިރުކަމަށް ސިފައިން ބުންޏެވެ.
އެ ރިޕޯޓް ލިބުމުން އެމްއެންޑީއެފް ސެންޓްރަލް އޭރިއާ ކޮމާންޑް، ކޯސްޓްގާޑް ހާބާ ކްރާފްޓްއިން ދ. ކުޑަހުވަދޫއިން އެސަރަހައްދަށް ދަތުރުކޮށް ޕަމްޕް ޖައްސައިގެން ދިޔަގަނޑު ކޮންޓްރޯލްކުރި ކަމަށް އެމްއެންޑީއެފުން ބުންޏެވެ.
ދިޔަވަމުން ދިޔަ "އެމްއާރް ސްޕީޑް" ލޯންޗުން މީހުން ސަލާމަތް ކުރުމުގައި އެމްއެންޑީއެފުން ހަރަކާތްތެރިވަނީ-- ފޮޓޯ/ އެމްއެންޑީއެފް
އެ ލޯންޗުގައި ތިބީ 16 ފަސިންޖަރުންނާއި، ތިން ފަޅުވެރިން ކަމަށާއި އެ އެންމެން ތ. ބުރުންޏަށް ގެންގޮސްފައިވާ ކަމަށް ވެސް ސިފައިން ބުންޏެވެ. އަދި އެ މީހުން ގެންދިޔައީ އެ ރަށުގެ ހިޔަލަ ކިޔާ ލޯންޗުން ކަމަށް ވެސް ފާހަގަކުރިއެވެ.
އެމްއެންޑީއެފުން ބުނީ އެ ހާދިސާގައި އެއްވެސް މީހަކަށް އަނިޔާއެއްވެފައި ނުވާ ކަމަށެވެ. އަދި، ލޯންޗުވެސް ރައްކާތެރިކަމާއެކު ބުރުންޏަށް ގެންދެވިފައިވާކަން އޭނާ ވަނީ ފާހަގަ ކޮށްފައެވެ.