ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ހިލޭ މެޑިކަލް ޗެކަޕް ހެދޭނެގޮތް ހެދުމުގެ ސިޔާސަތުގެ ދަށުން މިއަދުން ފެށިގެން އުމުރުން 50 އަހަރުން މަތީގެ މީހުންނަށް އާސަންދައިގެ ދަށުން މެޑިކަލް ޗެކަޕް ހެދުމުގެ ސިޔާސަތު އެކުލަވާލައި ތަންފީޒުކުރަން ފަށައިފިއެވެ.
އާސަންދައިގެ ދަށުން ހިލޭ ކޮންމެ މީހަކަށް ވެސް އަހަރަކު ދެ ފަހަރު މެޑިކަލް ޗެކަޕް ހެދޭގޮތް ހެދުމަކީ ރައީސް މުއިއްޒުގެ ރިޔާސީ ވައުދުފުޅެކެވެ.
ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އިން މިއަދު ބުނީ، މިހާރު އުމުރުން 50 އަހަރުން މަތީގެ މީހުންނަށް އާސަންދައިގެ ދަށުން ހިލޭ މެޑިކަލް ޗެކަޕް ހެދޭނެ ކަމަށެވެ. އަދި، ދެވަނަ މެޑިކަލް ޗެކަޕެއް ހަދަން ޖެހޭ މީހުންނަށް ޑޮކްޓަރެއްގެ ލިޔުމާ އެކު މެޑިކަލް ދެވަނަ މެޑިކަލް ޗެކަޕެއް ވެސް އާސަންދައިގެ ދަށުން ހެދޭނެއެވެ.
މިހާރު ހަމައެކަނި އުމުރުން 50 އަހަރުން މަތީގެ މީހުންނަށް އާސަންދައިގެ ދަށުން މެޑިކަލް ޗެކަޕް ހެދުނަސް،
- އޭޕްރީލް 1 އިން ފެށިގެން 35 އަހަރާއި 49 އަހަރާ ދެމެދުގެ މީހުންނަށް ހިލޭ މެޑިކަލް ޗެކަޕް ހެދޭނެ
- އޭޕްރީލް 1 އިން ފެށިގެން 19 އަހަރުން ދަށުގެ ކުދިންނަށް ހިލޭ މެޑިކަލް ޗެކަޕް ހެދޭނެ
- ޖުލައި 1 އިން ފެށިގެން 19 އަހަރާއި 34 އަހަރާ ދެމެދުގެ މީހުންނަށް ހިލޭ މެޑިކަލް ޗެކަޕް ހެދޭނެ
މިހާރު މެޑިކަލް ޗެކަޕް ހެދޭ އުމުރުފުރާގެ ބޭފުޅުން މެޑިކަލް ޗެކަޕް ހަދަން ބޭނުންވާ މަރުކަޒަކުން މެޑިކަލް ޗެކަޕަށް އެދި ނަންނޯޓު ކުރެވޭނެއެވެ. އެޕޮއިންޓްމަންޓު ހަމަޖެހުމުން، އެ މަރުކަޒަކުން ބުނާ ތާރީޚެއްގައި ދިއުމުން މެޑިކަލް ޗެކަޕް ހެދޭނެއެވެ. އެކަމަކު، އަދި މެޑިކަލް ޗެކަޕް ހެދޭނީ ހަމައެކަނި ސަރުކާރުގެ ހޮސްޕިޓަލްތަކުންނެވެ.
މެޑިކަލް ޗެކަޕް ހަދަން އެޕޮއިންޓްމަންޓު ހަދަން ގުޅާނީ، 7226614 ނަންބަރަށެވެ.
އައިޖީއެމްއެޗުގެ ސީއީއޯ އިބްރާހިމް އަބްދުއްރައްޒާގު ހަލީމް މިއަދު ވިދާޅުވީ، މި ޚިދުމަތް ފުޅާވެގެން އަންނައިރު ޑިމާންޑާ އެއްވަރަށް ޚިދުމަތްދިނުމަށް އެ ހޮސްޕިޓަލުގައި ހާއްސަ ކްލިނިކެއް ވެސް ތައްޔާރުކުރަން ރާވާފައިވާ ކަމަށެވެ. އަދި، ހުޅުމާލޭ ހޮސްޕިޓަލުގައި ވެސް އެ ކަމަށް ހާއްސަ ކްލިނިކެއް ތައްޔާރުކޮށްފައިވާނެ ކަމަށް އޭނާ ވިދާޅުވިއެވެ.
"ވާންޖެހޭ ހުރިހާ ތައްޔާރީއެއްގެ ތަފުސީލު ހޮސްޕިޓަލުން އެ ބޭފުޅުންނަށް އަރުވާނެ. އެއަށް ފަހު އެ ބޭފުޅުންގެ އެޕޮއިންޓްމަންޓު ހަމަޖެހިފައި އޮންނަ ދުވަހު ވަޑައިގެންފައި ހެލްތު ޗެކަޕަށް ހާއްސަކުރެވިފައިވާ ބަޓަނެއް އިންނާނެ. އޭގެން ޓޯކަންއެއް ނަންގަވާފައި ކައުންޓަރަށް ވަޑައިގެންނެވީމާ މެމޯއެއް ހައްދަވައިގެން އެ ބޭފުޅުން ގައިޑް ކޮށްދެއްވާނެ ހެލްތު ޗެކަޕް އޮންނަ ތަނަށް،" އޭނާ ވިދާޅުވިއެވެ.
މެޑިކަލް ޗެކަޕް ހަދަން ފެށުމާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން -- ސަން ފޮޓޯ: އިންފިނިޓް މޫވްމަންޓްސް/ މުހައްމަދު މާވީ
މެޑިކަލް ޗެކަޕް ހެދުމުގެ މަގުސަދަކީ ބޮޑު ބައްޔެއްވުމުގެ ކުރިން އެ ބައްޔެއް ދެނެގަތުމެވެ.
އާސަންދައިގެ ދަށުން މެޑިކަލް ޗެކަޕް ހަދަން ފެށުން އިފްތިތާހުކުރަން މިއަދު ހެނދުނު ބޭއްވި ނޫސްވެރިންގެ ބައްދަލުވުމެއްގައި އެންސްޕާގެ ސީއީއޯ ހީނާ ވަލީދު ވިދާޅުވީ، ޕްރޮގްރާމްގެ ތެރެއިން އެއްކުރެވޭ މައުލޫމާތުތަކުގެ އަލީގައި ސިއްހީ ޚިދުމަތްތައް ފޯރުކޮށްދިނުމާއި ސަރުކާރުގެ ސިޔާސަތުތައް ހަރުދަނާކުރުން ކަމަށެވެ.
އެންސްޕާއިން އެކުލަވާލައިފައިވާ އުސޫލުގެ ތެރެއިން ވަކިވަކި އުމުރުފުރާތަކަށް ޚާއްސަކޮށް އާސަންދަ ކުންފުނިން ކަނޑައަޅާފައިވާ މެޑިކަލް ޗެކަޕް ޕެކޭޖުތައް، އެ އުމުރުފުރާގެ ކޮންމެ މީހަކަށް އަހަރަކު އެއް ފަހަރު ބޭނުން ކުރެވޭނެއެވެ. ނަމަވެސް، ޑޮކްޓަރުގެ ލަފާގެ މަތިން އެއް މެޑިކަލް ޗެކަޕް ހަދާފައިވާ ފަރާތްތަކަށް އަހަރުގެ ތެރޭގައި ދެވަނަ މެޑިކަލް ޗެކަޕެއް ވެސް ހެދޭނެ ކަމަށް އެ އުސޫލު ބަޔާން ކުރެއެވެ.
މެޑިކަލް ޗެކަޕް ފުރިހަމަ ކުރިކަމަށް އާސަންދައިން ބަލަނީ، ޕެކޭޖުގައި ހިމެނޭ ހުރިހާ ޚިދުމަތެއް ލިބިގަތުމުންނެވެ. މެޑިކަލް ޗެކަޕްގެ ނަތީޖާ އެންސްޕާއިން ކަނޑައަޅާ ގޮތެއްގެ މަތިން، ޚިދުމަތްދޭ މަރުކަޒުތަކުން އެ ކުންފުންޏާ ހިއްސާ ކުރާނެއެވެ.
މި ޚިދުމަތްތައް އާސަންދަ މެދުވެރިކޮށް ފޯރުކޮށްދިނުމަށް ރައީސް ޑރ. މުހައްމަދު މުއިއްޒުގެ ކެބިނެޓުން ނިންމެވީ، މި މަހުގެ ފަސްވަނަ ދުވަހުއެވެ. ދަރިމައިވުމުގެ ފަރުވާ އާސަންދައިން ދިނުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އަދި، ފުރަތަމަ 14 ހަފުތާ ތެރޭގައި ކުރަން ވެސް ނިންމަވާފައިވާ ކަމެކެވެ.